Որքա՞ն գումարային վնաս է կրել գյուղացին քննարկումն ուշացնելու արդյունքում. կառավարության ներկայացուցիչը լռում է. տեսանյութ

Հայաստանի Ազգային ժողովում ընթանում է խորհրդարանի արտահերթ նստաշրջանը, որի նախաձեռնողը ՀՀ կառավարությունն է:

Արտահերթ նստաշրջանի օրակարգում ընդգրկված է «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» Հայաստանի Հանրապետության օրենքում լրացումներ կատարելու մասին օրենքի նախագիծը: Հիմնական զեկուցող կառավարության ներկայացուցիչն իր պատասխաններով եւ հարցի ներկայացմամբ չգոհացրեց պատգամավորներին, ովքեր անդրադարձան իրենց ելույթներում եւ հարցերում:

ՍԻՄ նախագահ, ընդդիմադիր պատգամավոր  ՀԱՅԿ ԲԱԲՈՒԽԱՆՅԱՆԻ մի շարք հարցերին եւս կառավարության ներկայացուցիչ Ջրային կոմիտեի նախագահ Ինեսա Գաբայանը պատասխանեց ոչ լիարժեք, կցկտուր:

Իսկ հարցերը հետեւյալն էին. 

1. Որպեսզի պարզ լինի տարին սակավաջուր է, թե ոչ կարո՞ղ եք ասել հուլիսի մեկով  որքան ջուր կար ջրամբարներում,
2. Սեւանից հավելյալ ջրառից էլեկտրոէներգիայի լրացուցիչ վաճառքից որքա՞ն գումար է ստացվելու, ինչքա՞ն եք նախատեսել եւ ի՞նչ նպատակով է այն ծախսվելու,
3. Կարծիք կա, որ սխալ է ծախսվել այն 170 միլիոն խորանարդ մետր ջուրը, որը նախատեսված է եղել բաց թողնել Սեւանից՝ օրենքով,
4. Ձեր կարծիքով կա՞ ջրի մաֆիա, թե՞ ոչ, եթե այո՝ ապա ով է,
5. Ինչո՞ւ է էլեկտրոէներգիայի լրացուցիչ վաճառքից գումարը գնում արտաբյուջե եւ ոչ թե բյուջե,
6. Ինչո՞ւ չեն անցկացվել հանրային լսումներ այս հարցի վերաբերյալ: Շատ էկոլոգիական կազմակերպություններ դժգոհել են իրավիճակից, ահազանգում են ոչ միայն իրենք այլեւ Սեւան ազգային պարկից եւ նույնիսկ Բնապահպանության նախարարությունը,
7. Որքա՞ն գումարային վնաս է կրել արդեն իսկ գյուղացին, քանի որ մենք ուշացրել ենք քննարկումը եւ որքա՞ն կկրի, եթե ջուր չտանք եւ ինչքա՞ն է լինելու գումարային օգուտը բերքից, եթե ջուրը տրվի եւ գյուղացիները հավաքեն այն բերքը, որը ակնկալում են:

Վերոնշյալ հարցերին կառավարության ներկայացուցիչը չտվեց որեւէ կոնկրետ ու սպառիչ պատասխան: Նա միայն նշեց, որ հուլիսին ջրամբարներում կար 603 միլիոն խորանարդ մետը պահեստավորված ջուր:

Ինչ վերաբերում է ստացած էլեկտրոէներգիայի քանակին, այդ գումարը ծախսելու ուղություններին, արտաբյուջետային հաշիվներին, հանրային լսումներ չկազմակերպելուն ապա տիկին Գաբայանը հարցից անտեղյակ լինելով մեղքը գցեց ՀՀ Ֆինանսների, Բնապահպանության նախարարությունների վրա: Նա նաեւ չնշեց, գյուղացիության արդեն իսկ կրած վնասի չափը, իսկ այն, որ հանրային լսումներ չէին անցկացվել ընդունեց բացթողումը:

Անրդադառնալով ջրի մաֆիային տիկինը ասաց, որ կարծում է գոյություն ունի, բայց պետք է բացահայտենք, թե ովքեր են, ով է այդ մաֆիան: 

Արձագանքելով կառավարության ներկայացուցչին պարոն Բաբուխանյանը ասաց, որ էլեկտրոէներգիայի հարցը «ձեր բերած նախագծի կեսն է, եթե դուք չպետք է պատասխանեիք մեզ, ուրեմն ձեզ հետ միասին ֆիննախից մարդ գար: Նույնը էկոլոգիական հարցերն են»:

Անդրադառնալով ջրի մաֆիային Բաբուխանյանը հարցրեց, թե ինչո՞ւ չեք բացահայտում: Առաջին հերթին պետք է մեկուսացնենք ջրից, որպեսզի ջրի դեւը գնա: 

 

Մանրամասները տեսանյութում.

Ա. ՀԱԿՈԲՅԱՆ