ԿԱՐՃ ԼՈՒՐԵՐ

ՀՐԱԺԵՇՏ «ՊԱՀԱԾՈՅԻ  ՏՈՒՓԵՐԻ» ՄՏԱԾՈՂՈՒԹՅԱՆԸ

30.06.2017 19:00 ՔԱՂԱՔԱԿԱՆ ՎԵՐԼՈՒԾՈՒԹՅՈՒՆ
ՀՐԱԺԵՇՏ «ՊԱՀԱԾՈՅԻ  ՏՈՒՓԵՐԻ» ՄՏԱԾՈՂՈՒԹՅԱՆԸ


2016-ի ապրիլյան պատերազմից հետո առաջնագծում կախած պահածոյի դատարկ տուփերը, որոնք ծառայում էին որպես ազդանշանային համակարգ, դարձան նախարար Սեյրան Օհանյանի անփույթ, անպատասխանատու աշխատանքի խորհրդանիշ: Եվ ընդհանրապես, նաեւ ռազմական ոլորտից դուրս «գեղական կարգով» աշխատելը ասոցացվում է «պահածոյի տուփերի» մտածողության հետ: Բայց, բնականաբար, ամեն ինչ իր ավարտն էլ է ունենում:ՊԱՇՏՈՆՅԱՆԵՐԸ` 
ՀԱՆՐԱՅԻՆ 
ՈՒՇԱԴՐՈՒԹՅԱՆ 
«ԿՐԱԿԻ» ՆԵՐՔՈ
Պաշտպանության ոլորտում նորարարական մոտեցումներով աչքի ընկնող նախարար Վիգեն Սարգսյանը իր վերջին ասուլիսին ներկայացրեց «պահածոյի տուփերի» համախտանիշը հաղթահարող գործիքներից մեկը` թափանցիկություն այնտեղ, ուր չկա պետական կամ ռազմական գաղտնիքի հարց: 
Դա վերաբերում է թեկուզ այն խնդրին, թե պաշտոնյաների զավակներից ովքեր են ծառայել, իսկ ովքեր` ոչ: Առիթը սաքունցների կողմից հղված հարցումն էր` 48 անձանց վերաբերյալ: Անշուշտ, Սաքունցը` որպես այդպիսին, շատ հակակրելի դեմք է, եւ անցյալում, երբ նա կոպիտ էր արտահայտվել Սեյրան Օհանյանի մասին, զինվորականները իրավամբ պատասխանել էին, որ ավելի լավ է լինել միոտանի, քան` չորքոտանի: Բայց, օրինակ, Վիգեն Սարգսյանը երբեւէ որեւէ մեկին որակումներ չի տվել, այդ թվում` նման կերպարներին, բայց օգտագործել է հարմար առիթը` բավարարելու հանրության հետաքրքրասիրությունը: Նախարարը վստահեցրեց, որ երկու պաշտոնյայի զինծառայող զավակներ էլ առողջական խնդիրներ ունեն, զորացրվելու ցուցման ենթակա են, բայց չեն զորացրում, քանի որ պաշտոնյաների զավակներ են, կարող է շահարկման առարկա դառնալ: Նախարարի խոսքով` զինծառայողներից մեկի հայրն անձամբ է խնդրել, որ չզորացրեն:
Բայց այդ ամենը բանավոր համառոտ խոսքով չի սահմանափակվել: Հարցում ուղարկողները ՊՆ-ից ստացել են մանրամասն գրավոր պատասխան, եւ հիմա ամբողջ համացանցով մեկ քաղաքացիները «գզում» են այն պաշտոնյաներին, ում զավակները չեն ծառայել բանակում: Հատկապես բացասական արձագանքի են արժանանում այն ազդեցիկ դեմքերը, ում զավակները չեն ծառայել` այլեւս ՀՀ քաղաքացի չլինելու պատճառով: 
Սակայն թափանցիկության ապահովման առումով պաշտոնյաների զավակների հարցը միակը չէր: Պաշտպանության նախարարը կրկին հիշեցրեց «Ազգ-բանակ» ծրագրի շրջանակում գործող «Դիտակետ» ծրագիրը, եւ մանրամասնորեն բացատրեց, թե ինչպես են անանուն հարցումներ անցկացվելու բոլոր զորացրվածների հետ, ընդ որում` 50 հարցից բաղկացած հարցաշարով. «Նշվելու է միայն զորամասը, մենք ապահովելու ենք անոնիմությունը: Որից հետո բոլոր տվյալները հավաքվելու են մի ընդհանուր բազայում, ու արդեն սեպտեմբերին կունենանք այդ պատասխանների հիման վրա ձեւավորված ամբողջական պատկեր»: 
Բայց դա դեռ ամբողջը չէ: Վիգեն Սարգսյանը եւս մեկ անգամ նշեց` մինչեւ այս տարվա ավարտը լուծվելու է զոհված եւ առաջին կարգի հաշմանդամություն ստացած անօթեւան զինծառայողների ու նրանց ընտանիքների բնակարանային ապահովման հարցը: «Բավականին հերթ է գոյացել: Իմ գնահատականով` այդ ծրագրերին պակասում էր թափանցիկությունը, նաեւ հերթի ընթացքին առցանց հետեւելու հնարավորությունը»,- ասաց Վիգեն Սարգսյանը:

Հասունացել է Սահմանադրական փոփոխությունների անհրաժեշտությունը.Վարդան Այվազյան

ՀԱՆԳԻՍՏ ՏՈՆ` 
ՊԱՅԹՅՈՒՆԱՎՏԱՆԳ 
ՀԱՐՑԵՐԻ ՎԵՐԱԲԵՐՅԱԼ
Վիգեն Սարգսյանը նաեւ կոնկրետ թվեր ներկայացրեց` մազութային սուլթանատի դիվերսիայի վերաբերյալ. «Վերջին 10 օրվա ընթացքում մեր կողմից հաստատված տվյալներով` ադրբեջանական կողմն ունի հաստատված 8 զոհ, իսկ չհաստատված թիվը շատ ավելի մեծ է»: «Չհաստատված ասելով` նկատի ունենք այն, որ մենք գիտենք` պատժիչ գործողությունները կատարվել են արդյունավետ, ունենք դիտարկման արդյունք, բայց չունենք համապատասխան ապացույցներ»,- նշեց նախարարը: Նա նաեւ ասաց, որ այդ ութ զոհից դեռեւս ոչ մեկը հուղարկավորված չէ: Բացի այդ, ըստ Վիգեն Սարգսյանի, ադրբեջանական մամուլում որեւէ լուր այդ ութ զոհի մասին մինչ օրս չկա: 
Իսկ ինչ վերաբերում է Ադրբեջանի հետ հնարավոր պատերազմին, ապա. «Ես գրեթե համոզված եմ, որ լայնամասշտաբ պատերազմ պետք է չսկսվի պարզ պատճառով` որովհետեւ այդ պատերազմով Ղարաբաղի հարցը չի կարող լուծվել: Չկա այնպիսի զարգացում` պատերազմական գործողությունների, որով Ղարաբաղի հարցը կարող է լուծվել Ադրբեջանի համար օգուտով, եւ ընդհակառակը` կա շատ մեծ ռիսկ, որ լայնամասշտաբ պատերազմի պարագայում Ադրբեջանը կարող է ստանալ անուղղելի վնաս` ե՛ւ իր տնտեսության, ե՛ւ պետության համար»,- հայտարարեց Վիգեն Սարգսյանը եւ շարունակեց. «Ի դեպ, ես չեմ նվազեցնում այն վտանգները, որ լայնամասշտաբ պատերազմը կարող է ունենալ Հայաստանի համար: Բացարձակ մեկը մյուսին չի բացառում: Բայց մտածված գնալ լայնամասշտաբ պատերազմի` այս իրավիճակում անմտություն կլիներ Ադրբեջանի ղեկավարության կողմից»: 
Վիգեն Սարգսյանը նաեւ անդրադարձ կատարեց եւ այնպիսի ցավոտ հարցին, ինչպիսին է Ադրբեջանի կողմից ռուսական «Խրիզանտեմա» հակատանկային հրթիռային համալիրներ ստանալու, ինչի շուրջ քիչ չէին ԶԼՄ-ների էմոցիոնալ հրապարակումները: Նախարարը պատասխանը տվեց աշխարհի համար շատ ընկալելի լեզվով. «Ցանկացած զենքի մատակարարում Ադրբեջանին շատ բացասական եմ դիտում, առաջին պարզ պատճառով` որովհետեւ Ադրբեջանը անկանխատեսելի երկիր է ժողովրդական վերահսկողության մեխանիզմների բացակայության պատճառով, այսինքն` նրա ագրեսիվության մակարդակը պայմանավորված է միմիայն ներքին եւ վերլուծության դժվար ենթարկվող երբեմն խնդիրների համադրմամբ: Եվ այդ առումով` լինի դա ռուսական զենք, իսրայելական զենք, թուրքական զենք, ցանկացած զենքի մատակարարումը մեծ նոր ռիսկեր է ստեղծում, որովհետեւ դժվար է կանխատեսել, թե այդ երկրում ով է կայացնելու որոշումներ ցանկացած պահին, այդ թվում` առաջիկա ապագայում»: Իզուր չէր, որ շեշտվեց նաեւ իսրայելական եւ թուրքական զենքի առկայությունը, որի մասին շատերը հաճախ մոռանում են: Նա նաեւ հիշեցրեց Ռուսաստանի հետ իրականացվող  ծրագրի մասին. «Մենք Ռուսաստանի հետ ունենք փոխգործակցության մեր ծրագիրը` դա ռազմավարական գործընկերության դաշնակցային հարաբերություններով պայմանավորված ռազմատեխնիկական-ռազմաքաղաքական փոխգործակցության ծրագիր է, մենք բավարարված ենք նրանով, թե ինչպես է այդ ծրագիրը իրականացվում: Դա շատ հավակնոտ ծրագիր է, որը մենք պարբերաբար ընդլայնում ենք, եւ պետք է ասեմ, որ մեր խնդիրները, որոնք մենք բարձրացնում ենք այդ երկխոսության մեջ, շատ ավելի երկարատեւ եւ կայունացնող են, քան ուղղակի զենքի այս կամ այն քանակի մատակարարումը. մենք ստանում ենք այն զենք-զինամթերքը, որը գնում ենք Ռուսաստանում, մենք ստանում ենք զենք-զինամթերք ռազմատեխնիկական փոխգործակցության շրջանակներում, այն, ինչ որ մենք գնում ենք, մենք գնում ենք դաշնակցային սկզբունքով` ներքին գներով Ռուսաստանի, եւ դա մեզ համար շատ կարեւոր շուկա է զենքի ձեռքբերման, նաեւ զենք ձեռք բերելու փոխգործակցության ծրագրերով»: Բայց միաժամանակ. «Եթե որեւէ պաշտոնյա Հայաստանում Ձեզ երբեւէ ասի, որ շատ ոգեւորված է նրանից, որ ռուսական զենք է հայտնվել Ադրբեջանում, կարծում եմ` նա անկեղծ չի լինի Ձեզ հետ»: 

ԻՍԿ ԱՐԴՅՈ՞Ք ՎԱՏ ԲԱՆ Է 
ԱՆՎՏԱՆԳՈՒԹՅԱՆ ԱՐՏԱՀԱՆՈՒՄԸ
Ինչպես հայտնի է, Անվտանգության խորհրդի վերջին նիստին ՀՀ նախագահ Սերժ Սարգսյանը Սիրիայի հարցով հանձնարարական է տվել. «Հանձնարարվել է նաեւ շարունակել աշխատանքները գործընկեր երկրների եւ միջազգային կառույցների հետ սիրիահայերին տրամադրվող օժանդակության շարունակականությունն ապահովելու համար եւ պատրաստ լինել արձագանքելու հնարավոր ոչ բարենպաստ զարգացումներին` զուգահեռաբար ամրապնդելով եւ խորացնելով Հայաստանի ավանդական հարաբերությունների մակարդակը արաբական երկրների հետ»: 
Որոշ քարոզչամիջոցներ դրանից եզրակացություն են արել, իբր հենց հիմա ռուսների դրդմամբ Հայաստանը պատրաստվում է զորք ուղարկել Սիրիա, եւ դրա շուրջ սարքել էին հսկայական հիսթերիա` հեռուն գնացող եզրակացություններով: Վիգեն Սարգսյանը շատ սպառիչ պատասխան տվեց այդ հարցադրմանը: «Սիրիա լրացուցիչ` բացի հումանիտար աջակցության ծրագրից, որը մենք իրականացնում ենք, լրացուցիչ ծրագրերի իրականացման հարց այս պահին չի քննարկվել, հատկապես` այնտեղ զորք ուղարկելու կամ զինծառայողներ ուղարկելու հարց երեկ չի քննարկվել Անվտանգության խորհրդի նիստում»,- փոխանցեց պաշտպանության նախարարը` շարունակելով.  «Առհասարակ հնարավո՞ր է այդպիսի քննարկում, թե չէ` ես առիթ ունեցել եմ դրա մասին խոսելու իմ հանրային հարցազրույցներից մեկում, ասելով, որ ես չեմ բացառում, որ կարող է իրավիճակ ստեղծվի, երբ մենք ցանկություն ունենանք, որպես պետություն, մասնակցելու այնտեղ իրականացվող գործողություններին, եթե դրա համար լինեն բոլոր անհրաժեշտ նախապայմանները: Բայց, իհարկե, խոսքը չի գնում ժամկետային զինծառայողներով այնտեղ մասնակցելու մասին. ինչպես մեր բոլոր խաղաղապահ գործողություններին` միմիայն պայմանագրային զինծառայողներ եւ իրենց կամքով կարող են գործուղվել նման վայրեր: Դա է մեր քաղաքականությունը, եւ այդ քաղաքականությունը չի փոխվելու: Չեմ ակնկալում, որ առաջիկայում էդպիսի որոշում կայացվի»:
Այսինքն` այս պահին դրա անհրաժեշտությունը չկա, բայց ապագայում կարող է եւ լինել: Բայց հարց է ծագում` իսկ ի՞նչ վատ բան պետք է տեսնել մեր պրոֆեսիոնալ խաղաղապահների կողմից որեւէ տեղ առաքելություն իրականացնելու մեջ: Ավելորդ չէ հիշեցնել, որ ժամանակին ՆԱՏՕ-ի հետ համագործակցության շրջանակներում Սերժ Սարգսյանը հատուկ շեշտել էր հենց խաղաղապահական գործունեությունը: ՆԱՏՕ-ի շրջանակներում այս կամ այն երկիր գործուղված մեր խաղաղապահ զինծառայողների մասին գնահատականները շատ բարձր են: Այսինքն` այս կամ այն առաքելության համար անվտանգության արտահանումը հաջողությամբ ստացվում է: Եվ դա այնպիսի գործունեություն է, որը ե՛ւ քաղաքական, ե՛ւ ռազմաքաղաքական տեսանկյունից միջազգային ասպարեզում բարձրացնում է մեր երկրի քաշը: 
Բայց եթե արվում է ՆԱՏՕ-ի շրջանակներում, որին մեր երկիրը չի անդամակցում, ապա ինչո՞ւ հարկ եղած դեպքում նույնը չանել եւ ՀԱՊԿ-ի շրջանակներում: Առավել եւս, եթե խոսքը գաղթօջախներում ապրող մեր իսկ հայրենակիցների անվտանգության մասին է: 
Ու նաեւ հարկ է հիշել, որ այնպիսի գործունեությունը, ինչպիսին է անվտանգության արտահանումը, որոշ պարագաներում կարող է եւ շահութաբեր գործունեություն լինել... 

ՀԱՅԱՍՏԱՆ-ԵՄ՝ ԱՆՇՈՒՔ ՀՐԱԺԵՇՏ

ՔՆՆԱԴԱՏԵՔ, 
ԲԱՅՑ ՄԻ ԱՆՊԱՏՎԵՔ
Իսկ կառավարության նիստում նախագահ Սերժ Սարգսյանը նշելով հանդերձ, որ ներկայիս կազմը վարչապետ Կարեն Կարապետյանի գլխավորությամբ վայելում է ՀՀԿ-ի եւ ՀՀ նախագահի լիակատար վստահությունը, նաեւ շեշտեց թափանցիկ աշխատելու անհրաժեշտությունը` ելնելով կոռուպցիոն ռիսկերի նվազեցման հրամայականից: 
Բայց նաեւ աշխատելու մեջ նոր ոճ է լինելու: «Ես` որպես ՀՀ նախագահ եւ ՀՀԿ-ի ղեկավար, ինչպես նաեւ դուք բոլորդ, վստահ եմ, չունենք որեւէ նախապաշարում: Մենք պատրաստ ենք աշխատելու բոլոր կառուցողական ուժերի հետ գործադիր եւ օրենսդիր իշխանությունների շրջանակներում, ՏԻՄ-երում եւ անգամ նշված կառույցներից դուրս: Նման համագործակցության համար մեր կողմից միակ նախապայմանն է քաղաքավարության եւ բարեկրթության նորմերի պահպանումը: Ընդ որում, ընդգծեմ, որ քննադատությունը նշածս նորմերի խախտում չենք համարում: Հատկապես, եթե այն կառուցողական է եւ նպատակ ունի բարելավելու իրավիճակը»,- հայտարարեց Սերժ Սարգսյանը: 
Այսինքն` քննադատեք, բայց մի անպատվեք, եղեք կառուցողական, այլ ոչ թե ծայրահեղական: Ինչ վերաբերում է ծայրահեղականներին, ապա արդեն Րաֆֆի Հովհաննիսյանն ու ՕՐՕ դաշինքն իրար չեն հասկանում, իսկ ՊՊԾ գունդը գրաված գրոհայինները փորձում են դատավարությունը վերածել շոուի: Իր հերթին դա հանգեցնում է նաեւ իրավապահ կառույցների հետ որոշակի` տհաճ նստվածք թողնող միջադեպերի, որ լրատվական դաշտում եւ սոցիալական ցանցերում մեծ աղմուկի են հանգեցնում: Բայց, խոշոր հաշվով, դա ոչինչ չի փոխում, ու լիազորությունները գերազանցած ոստիկաններին խստագույն պատասխանատվության ենթարկելը նույնպես չի թեթեւացնելու պարտության կրած զինյալ խռովության մասնակիցների ճակատագիրը: 
ՀՈՎՀԱՆՆԵՍ ԳԱԼԱՋՅԱՆ

 

КОМСОМОЛЬСКАЯ ПРАВДА