Իսկ ո՞վ ասաց` չենք ուզում արտահերթ ընտրություններ. Արծվիկ Մինասյան

ՀՅԴ ԳՄ անդամ ԱՐԾՎԻԿ ՄԻՆԱՍՅԱՆԻ գնահատմամբ, որպեսզի վայրկյան առաջ լուծվի Նիկոլ Փաշինյանի հրաժարականի հարցը, պետք է Հանրապետության հրապարակը լեփ-լեցուն լիներ, որպեսզի որեւէ իշխանություն չկարողանա որեւէ բան անել:

- Սա հնարավորություն կտա պահ առաջ կանգնեցնել երկրի կործանումը: Ուստի` ուզում եմ դիմել նաեւ այն մարդկանց, ովքեր որոշակի անտարբերություն են դրսեւորում կամ մտածում են, թե սա աթոռակռիվ է կամ իշխանության կռիվ է: Բացարձակ` ոչ, այդպիսի բան չկա: Գիտեք, ամենահեշտը  կլիներ ասել, որ` դե եթե չեք ուզում, ժողովուրդ, մենք էլ ի՞նչ անենք, հնարավոր ամեն ինչ արեցինք: Բայց սա Հայրենիքի փրկության հարց է, այլ ոչ թե իշխանության եւ ընդդիմության կռիվ, ոչ էլ իշխող եւ ընդդիմադիր կուսակցությունների կռիվ: Սա շատ պարզ եւ հստակ ձեւակերպված օրակարգ է` պետք է փրկենք Հայրենիքը եւ չգիտակցող կամ հանցագործության մեջ թաղված իշխանությանը հեռացնենք, որն ամեն գնով փորձում է պահպանել իր դրիքերը եւ չնահանջել: Զարմանում եմ այն մարդկանց վրա, ովքեր մտածում են, թե հրապարակում կանգնած մարդիկ իշխանություն են ուզում: Այդպիսի բան չկա:

– Իշխանությունը շարունակում է հարց բարձրացնել, թե ինչո՞ւ եք պահանջում Փաշինյանի հրաժարականը, այլ ոչ թե արտահերթ խորհրդարանական ընտրություններ:

– Սա իրենց հերթական սոփեստությունն է: Սկզբում ասում էին` ինչո՞ւ չեք ասում, թե ով է ձեր վարչապետի թեկնածուն, եւ երբ միասնական թեկնածուն ներկայացվեց, հիմա էլ թեկնածուին են քննադատում` ամեն մի արատավոր երեւույթ հիշեցնելով ու փորձելով կապել անցյալի հետ: Իսկ ո՞վ ասաց չենք ուզում արտահերթ ընտրություններ, բայց իրենք պատրա՞ստ են, հայտարարե՞լ են դրա մասին, թե՞ հերթական անգամ փորձում են իրենց դավաճանությունը քողարկել ապօրինի կամ կեղծ ու ստահակին բնորոշ հայտարարություններով: Սա ոչ այլ ինչ է, քան պարզապես մանկամտություն: Ինչպես ասում է հայտնի դասականը` մեխն էլ, մուրճն էլ իրենց ձեռքում է, եթե կարող են, թող կազմակերպեն, ինչի՞ չեն անում: Օրինակ` ինչո՞ւ Փաշինյանը հրաժարական չի տալիս, վախենո՞ւմ է, որ 7 օրվա մեջ կարող է իր «Իմ քայլը» խմբակցությունը ցրվի ու չկարողանա ընտրել այլ վարչապետ: Սա նշանակում է, որ բոլորը գերի են դարձել մեկ մարդու պարզ ցանկությանը: Իսկ այդ մարդու ցանկությունն աթոռին սոսնձված մնալն է եւ իր ազգադավ քաղաքականությունը շարունակելը:

– Պարոն Մինասյան, մտավախություն չունե՞ք, որ այսպիսի տեմպերով հնարավոր է Ամանորն էլ դիմավորեք Հանրապետության հրապարակում` վրանների տակ Նիկոլ Փաշինյանի հրաժարականը պահանջելով:

– Սա համառ, հետեւողական եւ նյարդային պայքար է: Մենք որեւէ ժամկետային սահմանափակում չենք դնում: Չենք ասում` վաղը լուծում ենք այս հարցը եւ վերջ: Պետք է հասնենք այն վիճակին, որ իշխանությունը հեռացվի եւ նոր իշխանություն ձեւավորվի, ու այն լինի լեգիտիմության բարձր մակարդակի վրա, որպեսզի որեւէ մեկի մոտ կասկած չառաջանա ապագա իշխանության` թե՛ միջազգային, թե՛ ներպետական հարաբերություններում գործողությունների արդյունավետության եւ վստահության առումով: Սա է նաեւ պատճառներից մեկը, որ չենք ուզում տուրք տալ հասարակության առանձին ներկայացուցիչների կողմից ծայրահեղ գործողությունների կոչերին, այլ փորձում ենք մեր ուժերի ներածի չափով զսպել: Բայց ոչինչ բացառել չես կարող, որովհետեւ, ի վերջո, մարդկանց նյարդերը տեղի են տալիս: Օրինակ` զոհված սեփական որդու դիակը չտեսած մարդը, անհետ կորածի ծնողը, հարազատը, բարեկամը, Հայրենիքը սեփական ծնողի նման ընդունած անձը նյարդային վիճակում է: Սա պետք է իրենք գիտակցեն, որ չեն կարող անվերջ 15-20 մեքենաներով շրջապատված այստեղ կամ այնտեղ գնալ, անհնար է: Ինչքան ուշացնում է Նիկոլ Փաշինյանն իր որոշումը, այնքան ավելի խորացնում է ներքաղաքական, ներհասարակական եւ բոլոր ուղղություններով ճգնաժամերը: Եվ, ցավոք, այնքան թուլացնում է մեր երկրի անվտանգությունը, նույնիսկ մարդկանց բարոյականությունն է սկսում արդեն ոտնատակ տալ, երբ տարբեր խմբերի գործուղում է Հայրենիքի փրկության շարժման գործողություններն իբր քննադատելու կամ տարբեր տիպի խարդավանքներ հրահրելու միջոցով քաղաքացիական բախումներ առաջացնելու նպատակով: Սա անթույլատրելի է, ուղղակի, հանցագործությունները շարունակելու փորձ է իր կողմից: Խորհուրդ կտամ եւ շատ կուզենամ, որ ի վերջո, այս խորհուրդն ընկալի որպես ՀՀ քաղաքացու հորդոր` Նիկո՛լ, վայրկյան առաջ հեռացի՛ր, որպեսզի պետությունն ու ազգը կարողանան իրենց մեջքը ուղղել եւ շտկել այն ավերածությունը, որ դու ու քո խմբակը թույլ եք տվել: Կանգնե՛ք արդար դատարանի առաջ, եւ այդ ժամանակ ձեր մեղավորությունն ու անմեղությունը կապացուցվի: Եթե ձեզ համարում եք անմեղ, խնդրեմ` արդար դատարանի մոտ ներկայացրեք ձեր անմեղությունը, այլ ոչ թե կաբինետներում, չպատասխանելով հնչող մեղադրանքներին, փորձեք օժանդակություն ստանալ Հեյդար Ալիեւից եւ ադրբեջանական գործալներից: Այսօր Նիկոլ Փաշինյանի կողքին, ըստ էության, որպես պետություն, կանգնած է Հեյդար Ալիեւը: Նա է պաշտպանում Նիկոլ Փաշինյանին: Սա պետք  է հուշի մեր բազմաթիվ քաղաքացիներին, որ գործ ունենք իսկապես դավաճանական եւ շատ լուրջ հանցագործության հետ: Հանցագործին այսպես թողնելը նշանակում է պարզապես երկիր եւ պետականություն կորցնել:

ՀՐԱՆՏ ՍԱՐԱՖՅԱՆ

Այս թեմայով Գյումրիում բացվեց «Ազգի ձայնի» եւ «Ուժեղ Հայաստան Ռուսաստանի հետ. հանուն նոր միության» շարժման գրասենյակը Անարդար ա, որ լոռեցի էս տղեն սպանվեց գերության մեջ. Արամ Գեւորգյան Քծնում են Նիկոլին, որ հայտնվեն նախընտրական դժբախտ ցուցակում. Աճեմյան ԱՀԱ ԹԵ ՈՒՐ Է ՆԻԿՈԼԸ ՏԱՆՈՒՄ ՀԱՅԱՍՏԱՆԸ ԱԶԳԱԴԱՎՈՒԹՅԱՆ 88 ԵՐԱՆԳՆԵՐԸ