Նախիջևանի հատվածում ադրբեջանական բանակն ամրացնում է դիրքերը. Ինչ էր գրում «Իրավունքը» 2 տարի առաջ

 Աշոտ Ասատրյան

Ռազմական վերլուծաբան Աշոտ Ասատրյանը ֆեյսբուքյան իր էջում գրել է.

«Նախիջևանի հատվածում ադրբեջանական բանակը պատրաստվում է ձմռանը ու հիմնականում հենց այդ պատճառով կատարվում են ինժեներական աշխատանքներ։ Հատկապես ամիսներ առաջ կառուցված նոր դիրքերն այս պահին պետք է ամրացնեն, որպեսզի ձմեռը զորքը չփախչի այդ վայրերից։

Այդ հատվածում հայկական բանակի հետ բախումների ժամանակ, իհարկե, չէին կարող բարելավել նոր դիրքերը, որոնց մի մասը այդպես էլ թողեցին ու հեռացան։ Ժամանակին դրա պատասխանը տրվեց, սակայն ինչպես նկատում ենք՝ կրկին մեր մարդասիրության ձեռքը կրակն ենք ընկել, քանի որ որոշ ժամանակ հրադադարի ռեժիմը պահպանելու և հանգիստ թողնելու արդյունքում կամաց-կամաց ամրացվել են դիրքերը, որի հետևանքով հիմա ինժեներական աշխատանքներ են կատարվում։

Ամիսներ առաջ դիրքերի մի մասը նույնիսկ զրկված էր սննդի համար նախատեսված ճանապարհից ու 3 օրը մեկ մի կերպ, մեր զինվորների հսկողությամբ, սնունդ էին բերում ծառայություն իրականացնող զինծառայողներին։ Այ հենց այդ շրջանում կոնկրետ ճնշումներ իրականացնելու դեպքում մի քանի օրերի ընթացքում նոր դիրքերը կդատարկվեին, չնայած որոշ դիրքերի դեպքում հենց այդպես է եղել, որովհետև սկզբնական շրջանում դիրքավորված վայրերից մի քանիսն են այժմ մնացել։

Մենք վերջապես պետք է հասկանանք, որ ադրբեջանցիների խոսքին երբեք հավատալ պետք չի, երբեք չպետք է փորձենք որևէ հարցում զգոնությունը թուլացնել։ Ցանկացած թուլության դեպքում ադրբեջանցին անցնում է իր սադրիչ գործողություններին»։

Ադրբեջանական զինված ուժերը ոչ մի տարածք չեն գրավել. Դավիթ Տոնոյան

Պաշտոնապես հայտարարում եմ, որ նախիջևանյան ուղղությամբ ադրբեջանական զինված ուժերը ոչ մի տարածք չեն գրավել, այսօր լրագրողների հետ հանդիպմանն ասաց ՀՀ Պաշտպանության նախարարի պաշտոնակատար Դավիթ Տոնոյանը։

«Դա եղել է միջդիրքային տարածություն, որը որ կրճատվել է, ընդ որում` Ադրբեջանի Հանրապետության տարածքում, որտեղ երբևիցե ՀՀ զինված ուժերը վերահսկողություն չեն իրականացրել: Մենք դիմել ենք որոշակի միջոցների, որպեսզի չեզոքացնենք հնարավոր գործողությունները, որ կարող էին տեղին ունենալ այդ պայմաններում», - ասաց Դավիթ Տոնոյանը։

Նա նշեց՝ հարակից բնակավայրերի մասով, կա որոշ խնդիր.

«Մենք հնարավորինս շփումների մեջ ենք տեղի բնակչության հետ, աշխատում ենք իրենց հետ, բացատրում ենք, որ այդ դիրքերի տեղափոխումը չպետք է սպառնալիք համարեն, ռիսկերը, որ գոյություն ունեն, մենք նվազեցրել ենք», - ասաց Դավիթ Տոնոյանը։

Պաշտպանության նախարարի պաշտոնակատարի խոսքով՝ խնդիրը մի քանի անգամ բարձրացվել է նաև մեր միջազգային գործընկերների առջև:

«Կարծում եմ` արդեն իսկ հանգուցալուծում կա», - ասաց Դ. Տոնոյանը։

Դավիթ Տոնոյանը՝ ՊՆ-ի կողմից շվեդական Gripen կործանիչներ ձեռք բերելու մասին

ՀՀ պաշտպանության նախարարի պաշտոնակատար Դավիթ Տոնոյանն անդրադարձել է շվեդական կործանիչներ գնելու վերաբերյալ մամուլում շրջանառվող լուրերին։

«Եկեք չկենտրոնանանք որևէ զինատեսակի վերաբերյալ ՀՀ ՊՆ որևէ առաջարկության վրա: Մենք բոլոր առաջարկություններն ուսումնասիրում ենք ու գնին, որակին ու մատակարարման ժամկետներին համապատասխան որոշումներ են կայացվում: Որևէ որոշում Gripen-ների վերաբերյալ այս պահին չկա»,- այսօր՝ նոյեմբերի 12-ին, լրագրողների հետ զրույցում նշեց Տոնոյանը։

Նա հավելեց, որ մեկ այլ գործընկերոջ կողմից այլ առաջարկ կա, որն ուսումնասիրվում է և մոտ ապագայում որոշում է կայացվելու ձեռքբերումների հետ կապված: 

Ադրբեջանի ԱԳՆ-ն արձագանքել է Նիկոլ Փաշինյանի հայտարարությանը

Ադրբեջանի արտաքին գործերի նախարարությունն արձագանքել է ՀՀ վարչապետի ժամանակավոր պաշտոնակատար Նիկոլ Փաշինյանի՝ «Փարիզի խաղաղության համաժողովի» շրջանակում ելույթին։ Միջանկյալ նշենք, որ իր խոսքում Փաշինյանը նշել է աշխարհի ժողովուրդների՝ օրենքի ուժով ազատ կամքի դրսևորմամբ սեփական ճակատագիրը տնօրինելու իրավունքի մասին:

Պաշտոնական Բաքուն ՀՀ վարչապետի պաշտոնակատարին կոչ է արել Լեռնային Ղարաբաղի հակամարտությունը լուծելու նպատակով «հայտարարություններից անցնել գործնական քայլերի»:

Հիշեցնենք, որ Նիկոլ Փաշինյանը նշել էր նաև, որ Լեռնային Ղարաբաղի ժողովրդի՝ տասնամյակներ շարունակվող պայքարն իր ճակատագիրը տնօրինելու համար դեռևս չի ստացել պատշաճ իրավական լուծում: 

«21-րդ դարում բացարձակապես անընդունելի է, որ ժողովրդի ինքնորոշման իրավունքը կիրառելու ցանկությունը կարող է վերածվել կենսաբանական սպառնալիքի»,- հայտարարել էր նա։