Մի՛ վռազեք` կարծիք հայտնել ռուսների դուրս գալու հետ կապված, Արցախի հարցը փակված չէ. Իսրայելյան

ՌԴ նախագահի մամուլի քարտուղար Դմիտրի Պեսկովը հաստատել է լուրերն այն մասին, որ մեկնարկել է Արցախից ռուս խաղաղապահների դուրսբերման գործընթացը: «Այո, դա իրոք այդպես է»,- այսպես է արձագանքել նա` ի պատասխան ճեպազրույցի ժամանակ հնչած համապատասխան հարցի, բայց այլ մանրամասներ չի նշել։ Այս մասին «Իրավունք»-ը զրուցել է «Վերածնվող Արցախ» շարժման համակարգող, «Հայկական աշխարհ» հասարակական կազմակերպության ղեկավար ԱՆԱՍՏԱՏ ԻՍՐԱՅԵԼՅԱՆԻ հետ:

«ՌՈՒՍ ԽԱՂԱՂԱՊԱՀՆԵՐԻ ԱՌԱՔԵԼՈՒԹՅՈՒՆԸ ԽՈՉԸՆԴՈՏՎԵԼ Է ՈՉ ԻՐԵՆՑ ՄԵՂՔՈՎ»

— Արդեն իսկ տարբեր մեկնաբանություններ կան` Արցախից ռուս խաղաղապահների վաղաժամ դուրս գալու հետ կապված: Ձեր գնահատմամբ` ի՞նչ է սա նշանակում:

— Ռուս խաղաղապահների Արցախում հիմա լինելն այդքան կարեւոր չէր` արցախահայության այնտեղից ամբողջովին դուրս գալուց հետո: Այն առաքելությամբ, որով ռուս խաղաղապահները մտել էին Արցախ, խոչընդոտվել է եւ չի իրականացվել ամբողջովին, բայց ոչ իրենց մեղքով:, Չմոռանանք, որ Հայաստանի իշխանության կողմից արձանագրվեց, թե` ճանաչում են ադրբեջանական տարածքային ամբողջությունը` Արցախով հանդերձ: Պետականորեն այս մոտեցումը ՀՀ իշխանությունների կողմից արդեն հնարավորություն չտվեց ռուս խաղաղապահներին` իրենց հետագա շարունակական գործողությունների համար: Բայց եկեք չվռազենք` ռուսների դուրս գալու հետ կապված մտքեր արտահայտել:

— Ի՞նչ նկատի ունեք, կարծում եք` դեռ հնարավո՞ր է իրադարձությունների անիվն այլ ուղղությամբ պտտել:

— Այս տարածաշրջանում արդեն լարվածության ուրիշ օջախներ են բռնկվում: Առաջին հերթին նկատի ունեմ Իրանի եւ Իսրայելի միջեւ առկա կռիվը: Ի վերջո, այդ կռիվը եթե ոչ այսօր, ապա վաղը լինելու է: Ընդհանրապես, ես համարում եմ Իսրայելին Ադրբեջանի հանցակիցը` 44-օրյա պատերազմի ժամանակ: Քանի որ Իսրայելը սատարել է Ադրբեջանին, վերջինս ունի պարտք` Իսրայելի առաջ: Այս համատեքստում տեսնում եմ հեռանկարում ավելի լուրջ բախումներ, իսկ ռուս խաղաղապահների Արցախից դուրս գալը հիմա մի քիչ մտածելու տեղ է թողնում: Դրա համար էլ ասում եմ` մի՛ վռազեք, այլ երկների ղեկավարները ավելի հեռատես են` համեմատած Հայաստանի հանրապետության ղեկավարի հետ, որը մի օրվա մասին է մտածում, իսկ վաղվա օրվա մասին չի մտածում: Այնպես որ, կարծում եմ` Արցախի հարցը շարունակություն դեռ ունենալու է: Արցախի հիմնախնդիրը փակված չէ, եւ այս մասին իրենց ելույթներում ու մեկնաբանություններում փաստում նաեւ ռուսաստանյան տարբեր քաղաքագետներ, դիվանագետներ:

«ԸՆԴԱՄԵՆԸ ՀԱՐՅՈՒՐ ՏԱՐՎԱ ՊԱՏՄՈՒԹՅՈՒՆ ՈՒՆԵՑՈՂԻՆ ԶԻՋՈՒՄ ԵՆՔ ՄԵՐ ՀԱԶԱՐԱՄՅԱ ՀՈՂԵՐԸ»

— Այնուհանդերձ, որոշ շրջանակներ մեղադրանքների սլաքներ են ուղղում, թե ինչու են ռուս խաղաղապահները դուրս գալիս Արցախից: Որքանո՞վ է տեղին նեղսրտելը դրանից` հայաստանյան իշխանության «Արցախն Ադրբեջան է» թեզից եւ Արցախի հայաթափումից հետո:

— Այստեղ ամենամեծ մեղավորությունը Հայաստանի Հանրապետության իշխանությանն է, մասնավորապես` մեղքը ՀՀ ղեկավարի հնչեցրած մտքերն են: Մենք պատմության մեջ չենք ունեցել ղեկավար, որ Արցախը երբեւէ ճանաչի Ադրբեջանի տարածքային ամբողջականության մեջ կամ Ադրբեջանի տարածք: Մինչդեռ այսօր այդ ամենը նա կրկնում է ՀՀ սահմանամերձ շրջանում, ինչպես, օրինակ, նույն Ոսկեպարում ասում է, թե սահմանամերձ գյուղը պետք է տրվի Ադրբեջանին, որովհետեւ իրենց տարածքն է: Սա ինչպե՞ս հասկանա մեր հազարամյա պատմություն ունեցող ազգը: Աննորմալ տրամաբանություն է, որ ընդամենը հարյուր տարվա պատմություն ունեցողին մենք այսօր զիջում ենք մեր հազարամյա հողերը եւ ասում` ձերն է:

— Պարոն Իսրայելյան, շարունակում է լարված մնալ իրավիճակը Ոսկեպարում: Ի՞նչ հանգուցալուծում եք տեսնում:

— Նույն պայմանավորված ծրագիրն է, ինչպես Արցախը հանձնվեց: Այսօր նույն կերպ փորձում են հանձնել Տավուշի գյուղերը: Բայց հասունացել է մի իրավիճակ, որ ընդհանրապես չպետք է թողնել, որ այսպես շարունակվի: Մեր խնդիրն այդ տեսակ մարդն է, որը նստած է երկրի ղեկավարի աթոռին: Արդեն չգիտեմ էլ ինչպես անվանեմ, որովհետեւ չի էլ վիրավորվում եւ վիրավորանքները համարում է նորմալ: Ուրիշներին մեղադրել պետք չէ` ո՛չ Ռուսաստանին, ո՛չ Արեւմուտքին, էլի եմ ասում` մենք խնդիր ունենք երկրի ղեկավարի հետ, որին օգտագործում են, որովհետեւ ինքն իրեն այդպես է դրսեւորել: Ընդհանրապես, հետագա գործողություններից ես դրական սպասելիքներ չունեմ` մինչեւ տեղի չունենա իշխանափոխություն, եւ այս մարդը չհեռանա իշխանության գլխից` իր պես մտածող բոլոր իշխանավորներով հանդերձ:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.

Այս թեմայով Հայ փոքրիկները օգնեցին ռուս դերասանին «գործն ավարտին հասցնել» Եթե բոլորի բողոքը մեկի նկատմամբ է՝ ի՞նչն է խանգարում կոնսոլիդացվենք եվ այդ մարդուն հեռացնենք. Իսրայելյան Մերժել ՀԱՊԿ-ը նշանակում է մերժել հայ-ռուսական ռազմավարական հարաբերությունները. Հարությունյան Պետք է համաձայնել Լավրովի պահանջին` ուղղված հայաստանյան իշխանություններին. ՀՀ նախկին վարչապետ Ռուսաստանի լռելու ռեսուրսներն արդեն ավարտված են, սպասեք ակտիվ գործողությունների. Հարությունյան