«ԻՍԿԱՆԴԵՐԸ» ԿԻՐԱՌՎԵԼ Է ՇՈՒՇԻԻ ՈՒՂՂՈՒԹՅԱՄԲ. ԿԱՐԵՆ ՎՐԹԱՆԵՍՅԱՆ

Այսպիսով, կարծես թե Նիկոլը դեռ չի պատրաստվում հրաժարվել «իսկանդերային խաղից»: Սկզբում հայտարարելով, թե «Իսկանդերը» պայթել է 10 տոկոսով, նա, ըստ էության, փորձեց հարվածել ռուսներին: Հետո, թեեւ լացակումած հրաժարվեց ասածներից՝ պնդելով, թե ռուսական զենքը լավագույնն է աշխարհում, սակայն շտապեց մեղադրել սեփական երկրի զինվորականությանը, թե՝ իրեն խաբել են: Իսկ ահա նախօրեի հանրահավաքում սկսեց «բոչկա գլորել» ամենաանցանկալի անձ դարձած ԳՇ պետ Օնիկ Գասպարյանի ուղղությամբ՝ բացահայտ ակնարկելով, թե նա է իրեն «Իսկանդերի» կրակել-չկրակելու հարցում մոլորության մեջ է գցել:

Շուշիի գրավումը շատ տհաճ հարցերի մի շարան է առաջացնում

Այսքանի հետ մեկտեղ կան մասնագիտական պնդումներ, որ «Իսկանդերը», այնուամենայնիվ, արձակվել է: Մեզ հետ զրույցում նույնը պնդեց նաեւ ռազմական փորձագետ ԿԱՐԵՆ ՎՐԹԱՆԵՍՅԱՆԸ՝ ընդգծելով.

- Ես եւս պնդում եմ, որ «Իսկանդերը» օգտագործվել է արցախյան պատերազմի ընթացքում: Այդ պնդումը իրականացնում է ոչ միայն Մովսես Հակոբյանը, այլ նաեւ շատ ուրիշ մարդիկ, որոնց անունները լիազորված չեմ բարձրաձայնել: Ինչ վերաբերում է Փաշինյանի հայտարարությանը, ապա այն ինձ համար լրիվ անտրամաբանական է եւ որեւէ քննադատության չի դիմանում ո՛չ մասնագիտական, ո՛չ էլ այլ կոնտեքստում: «Իսկանդերը» կիրառվել է, եւ դա փաստ է:

- Ո՞ր ուղղության  վրա է կիրառվել:

- Կիրառվել է Շուշիի ուղղությամբ: Ավելին, այն աշխատել է անխափան` այնպես, ինչպես պետք է աշխատեր: Որեւէ խնդիր «Իսկանդերի» հրթիռների հետ չի եղել: Ավելին ասեմ. եթե ուշադրություն դարձնեք, Փաշինյանը եւս այդ «10 տոկոս պայթելը» պնդման ձեւով չի ձեւակերպել: Եվ դա պատահական չէ:

- Եթե Շուշիին է հարվածել, այդ դեպքում ինչո՞ւ մենք չտեսանք այն ավերածությունները, որոնք ենթադրվում էին «Իսկանդերի» գործարկման արդյունքում:

- «Իսկանդերով» հարվածել են այլեւս թշնամու վերահսկողության տակ անցած հատվածին: «Իսկանդերը» կիրառվում է կոնկրետ ենթակառուցվածքներին հարվածելու կամ զորքի կուտակումներին:

- Այս դեպքում ենթակառուցվածքի՞ է հարվածել, թե՝ զորքի:

- Զորքի: Այն հատվածում, որտեղ զորք է կուտակվել, խփել են, ինքը աշխատել է: Թե ինչքանով է հաջող եղել ընտրված հատվածը, դժվար է ասել ինձ: Առհասարակ, Շուշիի գրավում շատ տհաճ հարցերի մի շարան է առաջացնում:

- Մանրամասնեք խնդրեմ:

- Թշնամին երկու շաբաթից ավել կարողացել է Շուշի զորք բերել, սպառազինություն բերել այն ճանապարհներով, որտեղ նրանց դեմն առնելը շատ հեշտ էր՝ անգամ փոքր ռեսուրսներով:

- Մե՞նք ենք նրանց առաջ ճանապարհ բացել դեպի Շուշի:

- Ես չեմ կարող նման պնդում հիմա անել: Բայց հարց է առաջանում՝ ինչպե՞ս կարող էր նեղ, լեռնային, անտառային կածաններով այդ քանակի զորք բերվել: Ավելին, լրիվ անհասկանալի է, թե ով էր ղեկավարում Շուշիի պաշտպանությունը, ով էր ղեկավարում Հադրութի, Ջաբրայիլի պաշտպանությունը, ով էր, ի վերջո, Լելե Թեփեի աղետալի հակահարձակման հեղինակը: Այսօր չկան  այս հարցերի պատասխանատուները, էլ ուր մնաց «Իսկանդերի» մասին պատշաճ ձեւակերպումներ տան:

- Ո՞ր օրն է գործարկվել «Իսկանդերը»:

- Կոնկրետ օրը կդժվարանամ ասել, բայց վստահ կարող եմ ասել, որ դա եղել է պատերազմի վերջին օրերին: Այն դեպքում, երբ պետք էր օգտագործվեր պատերազմի երրորդ-չորրորդ օրը:

Մեծ է գայթակղությունը՝ կրկին դիմել ռազմական ավանտյուրայի

- Այսօր նոր պատերազմի վտանգ տեսնո՞ւմ եք հայ-ադրբեջանական սահմանին: Հաշվի առնելով, որ Ալիեւը շարունակում է հոխորտալ եւ հաթաթաներ տալ, որին հայաստանյան որեւէ գերատեսչություն, ըստ էության, չի պատասխանում:

- Թշնամին տրամադրված չէ, այո, շարունակել խաղալ ապրել: Հակառակը, էլ ավելի ագրեսիվ հայտարարություններ են հնչեցվում: Դրան գումարած՝ օր օրի նրանց բանակը վերազինվում է, իսկ մենք ի՞նչ ենք անում: Ակնհայտ է, որ թշնամու համար ստեղծվել է հարյուրամյակի շանսը` տեսնել նման կերպ թուլացած Հայաստանը: Նման պայմաններում շատ մեծ է գայթակղությունը՝ ինչ-ինչ պատրվակով կրկին դիմել ռազմական ավանտյուրայի: Եվ ՀՀ-ում պահպանվող անկայուն իրավիճակը հենց  այն հաճելի նվերն է, որը ցանկանում են տեսնել եւ օգտվել մեր թշնամիները: Իսկ ստեղծված իրավիճակի պատասխանատուները առկա իշխանություններն են:

Զրույցը` ԻԼՈՆԱ ԱԶԱՐՅԱՆԻ

Այս թեմայով Անարդար ա, որ լոռեցի էս տղեն սպանվեց գերության մեջ. Արամ Գեւորգյան Քծնում են Նիկոլին, որ հայտնվեն նախընտրական դժբախտ ցուցակում. Աճեմյան ԱՀԱ ԹԵ ՈՒՐ Է ՆԻԿՈԼԸ ՏԱՆՈՒՄ ՀԱՅԱՍՏԱՆԸ ԱԶԳԱԴԱՎՈՒԹՅԱՆ 88 ԵՐԱՆԳՆԵՐԸ ԱԼԻԵՎԸ ՆՈՐԻՑ ՍՊԱՍՈՒՄ Է ՀԱՅԱՍՏԱՆԻ «ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ» ՕԳՆՈՒԹՅԱՆԸ