Մտածող քաղաքացին վտանգավոր է Նիկոլի համար. Սամվել Նիկոյան

ՀՀԿ Գործադիր մարմնի անդամ, ԱԺ մի քանի գումարման պատգամավոր, Ազգային ժողովի նախկին նախագահ (2011-2012) ՍԱՄՎԵԼ ՆԻԿՈՅԱՆԻ գնահատմամբ` առկա աղետից պետք է փրկվենք նախեւառաջ կամքով եւ ոգեղենությամբ:

— Հաշվի առնելով վերջին շրջանում տեղի ունեցող հրաժարականներն ու հարուցված քրեական գործերը` կարելի՞ է ասել, որ իշխանական բուրգը սկսել է ճաքեր տալ:

— Կարծում եմ` շատ շուտ է խոսել իշխանական բուրգի ճաքերի մասին: Խնդիրը հետեւյալն է` Նիկոլին միշտ անհրաժեշտ է, որպեսզի հասարակության մի մասին անընդհատ ինչ-որ իրադարձություններով կերակրի: Այլեւս «հների» կերպարներն այն հնչեղությունը չեն ունենում, դրա համար անցել է յուրայիններին: Բնակչության, երեւի, 20 տոկոսը դեռեւս մնում է իր ազդեցության տակ, որոնց թույլ չի տալիս, որ մտածեն: Նիկոլը գիտի` մտածող քաղաքացին վտանգավոր է իր համար: Եվ որպեսզի քաղաքացին հանկարծ չսկսի մտածել, նա անընդհատ կերակրում է իրադարձություններով: Այնպես որ, ձեր հիշատակած դեպքերն էլ հերթական օպերացիան է:

— Փաստորեն, հիմա նաեւ «հին» ու «նախկին» դարձավ նաեւ էկոնոմիկայի նախարար Վահան Քերոբյա՞նը…

— Հիշեցի այս իշխանության օրոք ամենաբարձր պաշտոն զբաղեցնողներից մեկին` գլխավոր դատախազ Արթուր Դավթյանին: Երբ  նրան աշխատանքից հանեցին, մեկ էլ տեսանք, որ եկել է ու կանգնել մարդկանց մոտ` հավաքներից մեկի ժամանակ: Եթե ես այդ պահին նրան տեսած լինեի, կգնայի ու դուրս կշպրտեի: Նա իրավունք չուներ այդտեղ լինելու, որովհետեւ Նիկոլի հետ հավասար պետք է պատասխան տա, այլ ոչ թե գա կանգնի եւ հանկարծ փորձի սրբագրվել: Իսկ Վահան Քերոբյանն ուրիշ տարբերակ է, նա էլ, երեւի, չհասկացավ` ինչպե՞ս դարձավ նախարար, ինչպե՞ս հանեցին, ինչո՞ւ եկավ, ինչո՞ւ է գնում:

— Ասում եք` «շատ շուտ է խոսել իշխանական բուրգի ճաքերի մասին», իսկ ե՞րբ է դա հնարավոր:

– Իշխանական բուրգը հենց այնպես չի ճաքի: Եթե ընդդիմությունը փոքր-ինչ ավելի գործնական քայլերի դիմի, նորից կերակրատաշտի գործոնը նրանց կմիավորի: Բայց նաեւ հասկանում եմ, որ իշխանության մեջ կան շատ մարդիկ, որոնք հասկանում են` այնպիսի իրադարձություններ են տեղի ունեցել մեր երկրում, որոնք ժամանակի եւ տարածության մեջ երբեք մոռանալու չեն: Հայ ժողովուրդը չի հանդուրժելու այս ամենը, եւ իրենք չեն ուզում Նիկոլի հետ կիսել այդ շատ դաժան պատասխանատվությունը, որն անխուսափելիորեն լինելու է: Իհարկե, շատերը գտնում են տարբերակ, որ փախնեն այդ պատասխանատվությունից: Ոմանք էլ գտնում են, որ իրենք մեղավոր չեն առկա խնդիրներում: Մյուս կողմից Նիկոլն էլ է հասկանում, որ պետք է այնպես անել, որ լինի կոլեկտիվ պատասխանատվություն: Իսկ այդ կոլեկտիվում բոլորը, ովքեր հաց են տանում իրենց տուն, թող իմանան, որ իրենց հացի մեջ արյուն կա: Սա նրանց երեխաներն էլ պետք է հասկանան: Դավաճան Մելիք Ֆրանգուլի գերեզմանը մինչեւ այսօր անարգվում է, չեն մտածո՞ւմ, որ իրենցից որեւէ մեկն արժանանալու է այդ բախտին:

— Չե՞ք կարծում, որ հասկացողն արդեն հասկացել է, չհասկացողն էլ մինչեւ աղետն իր տունը չհասնի, այդպես էլ չի հասկանալու, բայց եթե հասնի էլ, արդեն շատ ուշ կլինի երկրի համար:

— Ավելին ասեմ` 100 տարի առաջ էլ իրավիճակը նույնն էր: Մի գյուղ գալիս կոտորում էին, ջարդում, այրում, սպանում ու բռնաբարում, կողքի գյուղը հանգիստ նստած սպասում էր: Պետք է կարողանալ պայքարել, պետք է համախմբվել: Այս ներքին փոխադարձ մեղադրանքները, կշտամբանքները, անցյալի հիշեցումները ոչ մի տեղ չեն տանում: Սա որեւիցե մեկին օգուտ չէ: Զարմանում եմ` լուրջ դեմքով մարդիկ նստում են ու քննարկում` 2018 թվականին ինչ տեղի ունեցավ: Դա չէ խնդիրն այսօր, եթե 2018 թվականին մարդը ելել է փողոց ու քեզ հայհոյել է, ջհանդամը, եթե հիմա գոնե սկսել է հանկարծ հասկանալ, որ աղետի մեջ ենք բոլորս: Պետք է այդ մարդուն փաթաթվել եւ ասել` դու իմ եղբայրն ես: Այո՛, չպետք է նայել, թե ինչ վերաբերմունք է ունեցել 2018 թվականին, ինչ արել արել է, բայց հիմա աղետից պետք է փրկվենք:

ՀՐԱՆՏ ՍԱՐԱՖՅԱՆ

Այս թեմայով Մի կողմ դնենք տարաձայնությունները, համահայկական այս շարժումը պետք է ձեւավորի մեր ապագան. Վարդանյան Բամբասանք Զարմանք Արեւմուտքի կրկնակի ստանդարտներն ու ժողովրդավարության նիկոլական դեմքը. Լիլիթ Գալստյան Փլուզվող իշխանության պատկերը. Լիլիթ Գալստյան