«Լևոն 6-րդ Կիլիկիո արքա» պատմական պիեսն արդիական է, այն պետք է բեմին հանձնվի». Բյուրեղիկ Մնեյան
Արխիվ 16-20Հայրենասիրական թեման համաշխարհային է ու հավերժական և մեծ մասամբ արտահայտվում է պատմական գործերում: Ցավոք, վերջին տարիներին համարյա լռել են այդ թեմաներով գործերը և թատրոններում հազվադեպ են բեմադրվում: Խրախուսանքի է արժանի, երբ շարժում է նկատվում այդ ասպարեզում:
Վերջերս լույս է ընծայվել Երևանի Յանուս արտիստական թատրոնի հիմնադիր, բեմադրիչ, դրամատուրգ Մխիթար Մոս-Մուշեղյանի «Երբ անցյալն է աղաղակում» պիեսների ժողովածուն, որի մեջ իր ուրույն տեղն ունի «Լևոն 6-րդ Կիլիկիո արքան» պատմական դրաման:
Երեք հարյուր տարի գոյություն ունեցող Կիլիկյան հայկական թագավորության վերջին թագավորներից է Լուսինյան տոհմի Լևոն 6-րդ հզորագույն արքան: Հանուն հայրենյաց նա անսալով թագապահական խորհրդի անդամներին, թողնում է Պետրոս 2-ի կողմից իրեն նվիրած կալվածքները Կիպրոսում, խաղաղ ապրելակերպը, բազմում է Կիլիկիո թափուր գահին` պաշտպանելու երկիրը այլոց հարձակումներից: Ինչպես ինքն է ասում. «Աստված է վկա, չեմ ձգտել արքայի կոչման, ձգտել եմ լինել պաշտպանը իմ հայրենիքի»:
Թատերական արվեստին անմնացորդ նվիրված դրամատուրգ Մոս-Մուշեղյանը ջանք չի խնայել, որ պատմական կերպարները պիեսում հնչեն իրենց գունագեղությամբ ու պատկերայնությամբ: Թագավորից բացի, իրենց հայրենասիրությամբ աչքի են զարնվում Մարիամ ծեր թագուհին, կոմսուհի Ռեմին, պարոն Վասիլը (թագապահական խորհրդի անդամներ), Պողոս Սսեցի կաթողիկոսը, Դարդելը, Լևոն արքայի կինը` Մարգարիտ թագուհին, որը աչքի է ընկնում իր խելամտությամբ ու բարեսրտությամբ:
Հետևելով հզոր արքայի ամեն մի քայլին, ականատես ենք լինում նրա հուզումնալից պահերին: Ընթերցողը բազմիցս առնչվում է թագավորի մարդկային բարձր հատկանիշների հետ, որը յուրահատուկ է մեծ մասամբ հայոց ազնվացեղ մարդկանց: Բարությունն ու զգացմունքային լինելը ցայտուն կերպով դրսևորվում է խորհրդի անդամներին դատապարտելու տեսարանում, արքայական գանձարանը դատարկ լինելու համար : Չնայած այդ մարդիկ մեղք չունեին, գանձարանը դատարկվել էր նախկին արքայի օրոք վարձկաններին վճարելու և զորքին կերակրելու համար:
Հուզումնալից է պահն այն, երբ արքան ամենքից աննկատ սրբում է արցունքները, թեկուզ ձևականորեն պետք է դատապարտի իր հավատարիմ մարդկանց, որպեսզի վտանգներից զերծ պահի Կիլիկյան Հայաստանը:
Աշխարհում առաջինը քրիստոնեություն ընդունած հայ ժողովրդի մեջ ուժեղ է հավատը և լատինասեր Լուսինյան արքան բացի լատինական ծեսով թագադրվելուց, օծվում է նաև հայկական ծեսով՝ Սուրբ Սոֆիա տաճարում, օրհնությամբ Պողոս Սսեցի կաթողիկոսի, որպեսզի ընդունելի լինի հայոց իշխանների ու ժողովրդի կողմից: Գեղեցիկ է նկարագրված օծման արարողությունը՝ «Հայր մեր» և Շնորհալու «Հավատով խոստովանիմ» աղոթքներով:
Թերթելով պիեսի էջերը, մեր առջև զարնվում է վիրավոր Լևոն արքան, ով խիզախորեն մարտնչել է մամլուքների դեմ: Վիրավոր վիճակով դարձյալ իրեն նետում է մարտի դաշտ, չանսալով ոչ ոքի հորդորներին, նույնիսկ` սպարապետի:
Մամլուքների դեմ պայքարի ընթացքում շատերն են ընկնում քաջածին հայերից, ընկնում են հերոսաբար: Սպարապետը իր կյանքի գնով փրկում է արքային, Զանգակ իշխանը քաջաբար զոհվում է` մարմնով փակելով ամրոցի գլխավոր դուռը:
Չնայած հայերի անձնազոհությանն ու խիզախությանը, եգիպտական մամլուքները պաշարում են Սիս մայրաքաղաքը: Հունվարից մինչև ապրիլ ամիսը դիմակայում են, հույս ունենալով, որ Կիպրոսի Պետրոս արքան ու Հռոմի պապը միացյալ զորքերով պետք է օգնության հասնեն: Անելանելի վիճակ է ստեղծվում պաշարվածների մոտ, այլևս անկարող են դիմակայել: Թագավորը ստիպված հանձնվում է, բայց հույսը չկորցնելով, որ մի օր Կիլիկիո թագավորությունը կրկին կհառնի և Սուրբ Սոֆիայի տաճարում կրկին կառկայծի աստվածային լույսը: Ընտանիքի , կաթողիկոսի և հայ մեծամեծների հետ գերևարվում են Կահիրե: Տարիներ հետո խոստովանահայր Դարդելի ջանքերով արքան ազատվում է գերությունից, մեկնում Եվրոպա և իր մահկանացուն կնքում Ֆրանսիայի Սենտ Օուեն պալատում: Վախճանվում է վերջին արքան իր հավատարիմ Դարդելի հետ տերունական աղոթքը ասելուց հետո, հույսով ու հավատով լցված, որ հայոց հողում հայոց դրոշը պիտի ծածանվի:
Ընկավ Կիլիկիան, կորցրեցինք բազում տարածքներ հայոց, ինչո՞ւ... Քանի որ, ինչպես ամբողջ պիեսում է խոսվում` ներքին դավադիրները գործում են: Արդիական է հնչում թեման և պետք է այն բեմին հանձնվի: Արդիական է, քանի որ հիմա էլ վխտում են դավադիրները և ուզում տապալել թավշյա հեղափոխությամբ ստեղծված մեր ժողովրդական պետությունը:
Ողջունում եմ դրամատուրգ Մոս-Մուշեղյանին և ցանկանում առավել հաջողություններ պատմական նորանոր գործեր ստեղծելու մեջ:
ՀՀ վաստակավոր արտիստ ԲՅՈՒՐԵՂԻԿ ՄՆԵՅԱՆ
https://iravunk.com/sim/?p=106955&l=am/