Նրա մահով աղքատացան թատրոնն ու կինոն. վերջին հրաժեշտը՝ Ռաֆայել Քոթանջյանին
Մշակութային«Նրա մահով աղքատացան թատրոնն ու կինոն». վերջին հրաժեշտը՝ Ռաֆայել Քոթանջյանին
ՀՀ ժողովրդական արտիստ Ռաֆայել Քոթանջյանին երեկ վերջին հրաժեշտը տվեցին հարազատները, խաղընկերները, մշակութային, քաղաքական, հասարակական գործիչներն ու թատերասեր հանրությունը:
«Իրավունքի» հետ զրույցում ՀԹԳՄ նախագահ, ՀՀ արվեստի վաստակավոր գործիչ ՀԱԿՈԲ ՂԱԶԱՆՉՅԱՆԸ, վերհիշելով լուսահոգի Ռաֆայել Քոթանջյանին՝ ասաց. «Որպես դերասան՝ անկրկնելի երեւույթ էր, իր նմանը չունեցող մարդ: Եվ այդ առումով, իհարկե, շատ աղքատացան հայկական թատրոնն ու կինոն: Իսկ որպես անձնավորություն` բացառիկ բարի, բացառիկ ազնիվ, բացառիկ օրինավոր մարդ էր, մարդկային տեսակ, որը, ցավոք, հազվադեպ է հանդիպում մեր իրականության մեջ: Ափսոս, շատ ափսոս, որ մեզ լքում են նրա նման մեծերը»:
ՀՀ վաստակավոր արտիստ ԽՈՐԵՆ ԼԵՎՈՆՅԱՆՆ էլ մեծ ափսոսանքով է խոսում Ռաֆայել Քոթանջյանի եւ, առհասարակ, հայ մեծերի կորստի մասին. «Ամեն անգամ, երբ մեր մեծերից որեւէ մեկը հեռանում է, ամենքս ինչ–որ չափով աղքատանում ենք ու սպասում, որ նրանց տեղը պետք է նորերը գան, նրանց անունների կողքին պետք է գրվեն նոր արժանավոր անուններ: Բայց, ցավոք, այն դպրոցը, որից նրանք են սերել, եւ այն երկիրը, որտեղ նրանք են ապրել, այլեւս չկան… Մենք միշտ կարոտով կհիշենք նրանց կողքին լինելը, նրանցից ինչ–որ բան սովորելը: Անսահման հոգատար ու բարի ներաշխարհի տեր մարդ էր պարոն Քոթանջյանը, իր գործի իսկական վարպետ: Ես նրան միշտ այդպիսին կհիշեմ ու կպահեմ իմ սրտում: Ցավակցում եմ դերասանի ընտանիքի բոլոր անդամներին, ցավակցում եմ մեզ բոլորիս, որ կորցրինք եւս մի մեծի, լեգենդի: Նա էլ պակասեց մեր կյանքից, բայց իր հաստատուն տեղը գրավեց մեր հիշողության մեջ, երկնքում, հայկական ու սովետական ֆիլմի եւ թատրոնի պատմության էջերում»:
Դերասանուհի ՄԱՐԳԱՐԻՏԱ ԽԱՉԱՏՐՅԱՆՆ էլ փաստեց. «Ասում են` անփոխարինելի մարդիկ չկան, միշտ էլ լինում են առավել տաղանդավոր անհատներ, բայց նրա դերասանական տեսակն անկրկնելի էր, եւ նրա հետ բոլոր այն մեծերը, որոնք մեզ լքեցին, անկրկնելի գործիչներ էին: Դա ուրիշ դպրոց էր, ուրիշ կրթություն, ուրիշ կուլտուրա: Քայլող հանրագիտարան էր պարոն Քոթանջյանը: Նրա հետ խոսելն արդեն դասընթաց էր, սովորելու համար մեծագույն հարստություն: Առաջին քայլերս էստրադայում նրա հետ երբեք չեմ մոռանա: Միասին աշխատելը, նրա հետ բեմին լինելը գերագույն հաճույք էր: Միջազգային ստատուսի միակ դերասանն էր այսօրվա դրությամբ: Ցավոք, նրա նման հզորագույն դերասանը նվազագույնս ընդգրկվեց հայկական կինոարտադրության մեջ»:
ՌՈՒԶԱՆՆԱ ԽԱՉԱՏՐՅԱՆ