Բաքվում շինծու գործերով նիստում Բակո Սահակյանը հայտարարել է, որ մասնակցել է Շուշիի ազատագրմանը

Բաքվի զինվորական դատարանում այսօր տեղի է ունեցել Արցախի ղեկավարների և այլ պաշտոնյաների շինծու գործերով հերթական դատական նիստը՝ դատավոր Զեյնալ Աղաևի նախագահությամբ։ 

Ադրբեջանական լրատվամիջոցների հաղորդմամբ՝ այսօրվա նիստին քննարկվել է 1992 թվականի մայիսին Շուշիի ազատագրման գործողությունը։ Սկզբում գլխավոր դատախազի օգնական Թուղայ Ռահիմլին ցուցադրել է Շուշիի շրջանի Մալիբեյլի և Գուշչուլար գյուղերի, իբր, «հրկիզման և անդադար հրետակոծության տեսագրությունը»։

Ներկայացվել է Շուշիի ազատագրումը ղեկավարած գեներալ-մայոր Արկադի Տեր-Թադևոսյանի՝ Կոմանդոսի հայտնի տեսաձայնագրությունից հատվածներ էին, որտեղ նա ելույթ է ունեցել օպերացիայի և դրան մասնակցած անձանց մասին։ Տեսանյութում նաև քննարկվում են Շուշիի ազատագրման համապարփակ նախապատրաստական ​​աշխատանքները։ Շեշտվում է, որ Վազգեն Սարգսյանը հաստատել է ծրագիրը, մարտական ​​հրամանը պատրաստել է Սեյրան Օհանյանը։

Տեսանյութում ասվում է, թե Շուշիի ազատագրման ծրագիրը հայկական զինված ուժերի կողմից մշակվել է խիստ գաղտնիության պայմաններում՝ Վազգեն Սարգսյանի, Արկադի Տեր-Թադևոսյանի և այլ հրամանատարների մասնակցությամբ։ Նշվում է, որ գործողությունն իրականում պետք է իրականացվեր ապրիլի 24-ին, բայց հետաձգվել է զենքի պակասի և այլ պատճառներով։ Դատարանում ցուցադրված այլ տեսանյութերում, իբր, հիշատակվում են Շուշիի ազատագրումը չորս ուղղություններով գլխավորած անձանց անունները՝ Սամվել Բաբայան, Սեյրան Օհանյան, Վալերի Չիչյան և Արկադի Կարապետյան։

Ուսումնասիրվել է նաև Շուշիի ազատագրման շրջանի օկուպացիայի վերաբերյալ Հայաստանի նախկին նախագահ Սերժ Սարգսյանի հայտարարությունների, ինչպես նաև գեներալ-գնդապետ, ՀՀ Ազգային հերոս Գուրգեն Դալիբալթայանի տեսագրությունը։ Արցախի նախկին նախագահ Արկադի Ղուկասյանը, պատասխանելով գլխավոր դատախազ Վուսալ Ալիևի ավագ օգնականի հարցերին, ասել է, որ մինչև 1990 թվականն աշխատել է «Խորհրդային Ղարաբաղ» թերթում։ 1992 թվականի վերջին նշանակվել է ԼՂ վարչապետի քաղաքական հարցերով խորհրդական։ Արցախի նախկին նախագահ Բակո Սահակյանն էլ հայտարարել է, որ մասնակցել է Շուշիի ազատագրման գործողությանը Վիլեն Միքայելյանի գլխավորած ջոկատի կազմում։

«Դա արևելյան ուղղությունն էր։ Ես գիտեմ, որ այս ուղղության հրամանատարը Արկադի Կարապետյանն էր»,- հավելել է նա։ Սահակյանը հայտարարել է, որ Շուշիի գործողությունը ղեկավարել են Վազգեն Սարգսյանը, Արկադի Տեր-Թադևոսյանը, Սեյրան Օհանյանը և ուրիշներ։

«Նրանք իրենք էլ բազմիցս ասել են, թե ովքեր են եղել և ինչպես են մասնակցել Շուշիի գործողությանը։ Ես սա ասում եմ, որովհետև այստեղ գաղտնի մաս չկա։ Այդ ժամանակ ես չկարողացա հանդիպել նրանցից որևէ մեկի հետ։ Բայց, ինչպես ավելի վաղ ասացի, ես նրանցից յուրաքանչյուրի հետ ավելի ուշ հանդիպել եմ»,- նշել է նա։

Սահակյանը նաև ասել է, որ բարձր է գնահատում Արկադի Տեր-Թադևոսյանի գործունեությունը և նրան շնորհել է «Արցախի հերոսի» կոչում։

Հաջորդ դատական ​​նիստը նշանակվել է մայիսի 1-ին։

Այս թեմայով Բաքվում պահվող լիբանանահայ Վիգեն Էուլջեքչյանն արդեն 15 օր է՝ հացադուլ է անում Ունեմ խաղաղության ուղերձ և բոլորիս շնորհավորում եմ այսօրվա հետ կապված, նաև Շուշիի ազատագրման հետ կապված.Արման Սարգսյան Մեր հաղթանակները մեզանից չեն խլի. Պրոֆեոր Չարչյանը օրվա խորհրդի մասին Վուչիչի Մոսկվա թռչող ինքնաթիռը վայրէջք է կատարել Բաքվում Պակիստանի պաշտպանության նախարարությունը հայտարարել է, որ խոցել է հինգ հնդկական ինքնաթիռ