ԱՄՆ 60 կոնգրեսականներ կոչ են արել Ռուբիոյին դադարեցնել ռազմական օգնությունն Ադրբեջանին

ԱՄՆ 60 կոնգրեսականներ կոչ են արել Պետքարտուղար Մարկո Ռուբիոյին լիովին կիրառել «Ազատության աջակցության ակտի» 907-րդ հոդվածը՝ դադարեցնել ԱՄՆ ռազմական օգնությունն Ադրբեջանին: Այս մասին հայտնում են Հայ դատի կենտրոնական գրասենյակից։

Կոնգրեսականներն իրենց կոչում հիշատակել են Բաքվի կողմից՝ Արցախի 120,000 բնիկ հայ քրիստոնյա բնակչության էթնիկ զտումը, հայկական ինքնիշխան տարածքի շարունակական օկուպացիան և հայ գերիների ապօրինի կալանքն ու նրանց նկատմամբ բռնության դեպքերը։

Վկայակոչելով բոլոր այս դեպքերը՝ օրենսդիրներն ընդգծել են, որ «Ադրբեջանն իր արարքների հետևանքով պատասխանատվության չի ենթարկվել, փոխարենը շարունակում է խաթարել տարածաշրջանում երկարատև և արժանապատիվ խաղաղություն հաստատելու ջանքերը՝ ագրեսիվ միջոցներ կիրառելով Հայաստանի դեմ»։

Նամակում օրենսդիրները կոչ են անում հրաժարվել 907-րդ բանաձևի շրջանցման իրավական գործիքից, որն օգտագործվել է 2001-ից սկսած բոլոր վարչակազմերի կողմից՝ մինչև նախագահ Բայդենը, որը 2024-ին կիրառեց դրույթը։ Նրանք շեշտում են, որ Ադրբեջանի դեմ պատժամիջոցների բացակայությունը միայն խրախուսում է նրա ագրեսիվ քաղաքականությունը։

1992-ին ԱՄՆ Կոնգրեսն ընդունել է «Ազատության աջակցության ակտ» օրենքը, որով նախատեսվում էր օժանդակել ԽՍՀՄ կազմից դուրս եկած Ռուսաստանին և նորանկախ մյուս պետություններին՝ ստեղծելու ժողովրդավարական կառավարման մոդել և ազատական տնտեսություն։ Հայաստանի համար այս ծանր ժամանակաշրջանում, երբ թեժ մարտեր էին ընթանում Լեռնային Ղարաբաղում, հայ համայնքի և հայամետ լոբբիստների ակտիվ ջանքերի շնորհիվ «Ազատության աջակցության ակտի» տեքստում ներառվեց 907-րդ բանաձևը կամ հոդվածը, որն արգելում էր ամերիկյան կառավարությանը «ուղղակի աջակցություն ցուցաբերել Ադրբեջանին, քանի դեռ ԱՄՆ նախագահը չի համոզվել և չի տեղեկացրել Կոնգրեսին, որ Ադրբեջանի կառավարությունը ակնհայտ քայլեր է անում վերացնելու [Հայաստանի] շրջափակումը և ուժի այլ կիրառումները Հայաստանի և Լեռնային Ղարաբաղի նկատմամբ»:

Այս թեմայով Թուրքիան մեծ ռազմական ուժեր է տեղակայում Սիրիայում (Տեսանյութ) Ալիևը խոսել է Հայաստանի հետ «նոր ռազմական առճակատման վտանգի» մասին ՀՐԱՏԱՊ. Նման առաջարկ ՔՊ-ին արել է Մարտուն Գրիգորյանի դաշինքի մաս կազմող կուսակցություններից մեկը նախագահը. Վահագն Ալեքսանյան Ռուսաստանում հայտարարել են, որ ԱՄՆ-ի հարձակման դեպքում պարտավոր չեն Իրանին ռազմական օգնություն տրամադրել Ադրբեջանի ԱԳՆ–ն միջազգային հանրությանը կոչ է արել «պատասխանատվության ենթարկել» Հայաստանին