ԱՐՏԱՎԱԶԴ ՎԱՆՅԱՆ «ԴՊՐՈՑՆԵՐՈՒՄ ԿՍԿՍԵՆ ԳՈՐԾԵԼ ՀԱՄԱՃԱՐԱԿԱՅԻՆ ՖԻԼՏՐՆԵՐ»

ԱՐՏԱՎԱԶԴ ՎԱՆՅԱՆ «ԴՊՐՈՑՆԵՐՈՒՄ ԿՍԿՍԵՆ ԳՈՐԾԵԼ

ՀԱՄԱՃԱՐԱԿԱՅԻՆ ՖԻԼՏՐՆԵՐ»

ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը լրագրողների հետ հանդիպման ընթացքում ներկայացնելով գրիպի և սուր շնչառական վարակների իրավիճակը՝ ասաց, թե այսօրվա դրությամբ կարելի է ասել, որ բավական լուրջ հաջողություններ կան գրանցված:

«2016 թվականի հունվարին, հիմնականում տոնական և հետտոնական օրերին, արձանագրվել  է սուր շնչառական վարակների աշխուժացում, որին էլ նպաստել են ջերմաստիճանի կտրուկ նվազումը, տոնական օրերին ակտիվ շփումները և գրիպի շրջանառող հարուցիչը (H1N1)»,-հայտարարեց Արտավազդ Վանյանը՝ շարունակելով, թե երբ դեկտեմբեր ամսին մահացություններ եղան գրիպից, հոսպիտալացումները քիչ էին, սակայն ձեռնարկած կանխարգելիչ միջոցառումների, ինչպես նաև բնակչության շրջանում իրազեկվածության բարձրացման արդյունքում այսօր հանրապետությունում նկատվում է ստացիոնար կազմակերպություններ սուր շնչառական վարակներով և թոքաբորբերով հոսպիտալացման կայուն իրավիճակ, իսկ ամբուլատոր պոլիկլինիկական կազմակերպություններ դիմելիության և շտապբուժօգնության կանչերի նկատելի նվազում:

«Հղիների շրջանում ստացիոնար դիմելիությունը նվազել է շուրջ 60%-ով: 46%-ով նվազել է նաև վերակենդանացման բաժանմունքներում բուժում ստացող հիվանդների թիվը»,-ասաց Վանյանը:

Բանախոսի խոսքով, սակայն,  չի նշանակում, թե գրիպը նահանջել է և պետք է թուլացնել զգոնությունը.«Ուսումնական հաստատություններում այսօրվանից սկսած  համապատասխան աշխատանքներ են իրականացվելու, որպեսզի դասերն սկսվելուն պես նորմալ ջերմաստիճան լինի»:

Վանյանը դրական գնահատեց դպրոցական և նախադպրոցական արձակուրդների երկաձգման որոշումը, որը նպաստեց հիվանդության մարմանը: Եվ պետք է զգոն լինել, որ դպրոցական և նախադպրոցական հաստատություններում գրիպի երկրորդ ալիք չլինի, դրա համար նախեւառաջ պետք է պահպանել անհրաժեշտ ջերմային ռեժիմն այդ հաստատություններում:

Iravunk.com-ի թղթակցի հարցին, թե ի՞նչ կախարգելիչ միջոցառումներ են իրականացվելու այդ առումով դպրոցներում, Վանյանը նկատեց.«Դպրոցներում  կսկսեն գործել համաճարակային ֆիլտրներ, որոնք բոլոր դպրոցականներին հսկողության տակ կառնեն, այսինքն` ովքեր ջերմություն կունենան կամ սուր շնչառական հիվանդության նախանշաններ, նրանց տուն կուղարկեն: Նաև դպրոցներում ժամանակավորապես չեն իրականացվի ֆիզիկական կուլտուրայի դասեր»:

ԻԼՈՆԱ ԱԶԱՐՅԱՆ