ՔԱՀԱՆԱ. «ԻՍԿԱԿԱՆ ԱՍՊԵՏՆԵՐԸ ՍԱՀՄԱՆԻՆ ԿԱՆԳՆԱԾ ԶԻՆՎՈՐՆԵՐՆ ԵՆ»

ՔԱՀԱՆԱ. «ԻՍԿԱԿԱՆ ԱՍՊԵՏՆԵՐԸ ՍԱՀՄԱՆԻՆ ԿԱՆԳՆԱԾ  ԶԻՆՎՈՐՆԵՐՆ ԵՆ»

Այսօր ավարտվում է Առաջավորաց պահքը, որին  հետեւում է սիրահարների արագահաս բարեխոս Սուրբ Սարգսի տոնը, որն այս տարի նշվում է հունվարի 23-ին: Արդեն 11 տարի Արարատյան Հայրապետական Թեմի նախաձեռնությամբ այդ օրը Երեւանում իրականացվում է մշակութային եւ կրթական մի շարք միջոցառումներ: Հունվարի 23-ին Սուրբ Սարգիս անվամբ բոլոր եկեղեցիներում կպատուցվի Պատարագ: Այնուհետեւ ժամը 14:00-ին Առաջնորդանիստ Սուրբ Սարգիս եկեղեցու մոտից տեղի կունենա խաչերթ դեպի սիրահարների այգի, որտեղ էլ կկայանա հանդիսավոր համերգ: Այդ օրը Մայր Աթոռից Սուրբ Սարգիս եկեղեցի կտեղափոխվի նաեւ Սուրբ Սարգսի մասունքները: ԱՀԹ  Արաբկիր համայնքի հոգեւոր հովիվ տեր ԲԱԲԿԵՆ քահանա ՀԱՅՐԱՊԵՏՅԱՆԻ խոսքով` Սուրբ Սարգսի տոնը սիրվել է հայ ժողովրդի կողմից եւ այն համարվում է ազգային տոն. «Մենք պարտավոր ենք մեր ժողովրդի ծոցում եղած գանձերը որպես ժառանգություն տալ երիտասարդներին ու սերունդներին: Կցանկանամ, որ այդ օրը մարդիկ գան եկեղեցի ու հաղորդվեն»,-նշեց տեր Բաբկեն քահանա Հայրապետյանը: Նրա բնորոշմամբ այսօրվա իսկական ասպետները սահմանին կանգնած զինվորներն են.«Թող Սուրբ Սարգիսը բարեխոս լինի մեր զինվորների համար»,-ավելացրեց քահանա Հայրապետյանը:

«Ռոտոնդա» թատերախմբի ղեկավար ՄԱՐԻՆԵ ԱՍԱՏՐՅԱՆՆ անդրադառնալով Սուրբ Սարգսի տոնի հետ կապված ժողովրդական ավանդույթներին փաստեց, որ պահպանվել են բազմաթիվ ավանդույթներ: Սակայն ամենահայտնի ավանդույթը, որն այսօր տարածված է ժողովրդի մեջ, այն է, որ մարդիկ շարունակում են իրենց զավակներին անվանակոչել Սարգիս անունով:

ԶՎԱՐԹ ԽԱՉԱՏՐՅԱՆ