Բյուջետային տարին փակվել է, ու ֆինանսների փոխնախարարը չի հասցրել նամակ գրել Ձմեռ պապին

ԲՅՈՒՋԵՏԱՅԻՆ ՏԱՐԻՆ ՓԱԿՎԵԼ Է, ՈՒ ՖԻՆԱՆՍՆԵՐԻ

ՓՈԽՆԱԽԱՐԱՐԸ ՉԻ ՀԱՍՑՐԵԼ ՆԱՄԱԿ ԳՐԵԼ ՁՄԵՌ ՊԱՊԻՆ

ՀՀ ֆինանսների նախարարի առաջին տեղակալ ՊԱՎԵԼ ՍԱՖԱՐՅԱՆԸ գործադիրի նիստից հետո ամանորյա տրամադրությամբ բավական երկար շփվեց լրագրողներիս հետ: Իհարկե, զրույցը ծավալվեց նաեւ տոնական հարցերի շուրջ:

– Պարոն փոխնախարար, ի՞նչ կենացներ են հնչում Ձեր տոնական սեղանին:

– Բյուջեի կատարողականի կետերի հետ կապված... (ծիծաղում է-հեղինակ): Իհարկե, հայկական, ավանդական կենացներ, բայց ես այն տարիքում չեմ, որ հիմիկվանից պլանավորեմ, թե ինչ կենացներ պետք է լինեն:

– Ձմեռ պապից ի՞նչ եք ուզել այս տարի:

– Ինձ թվում է` Ձմեռ պապից արդեն ուշ է ինչ-որ բան ուզել, որովհետեւ մինչեւ դեկտեմբերի 31-ը պիտի գա: Եվ մինչեւ հիմա մտածեմ, թե ինչ եմ ուզում Ձմեռ պապից, չի հասցնի բերի, եւ քանի որ բյուջետային տարին փակվում է, մնում է 2017 թվականի համար մտածեմ:

– Իսկ Ձեր թոռնիկը նամակ գրե՞լ է Ձմեռ պապին:

– Մի թոռնիկ ունեմ, որը դեռեւս մեկ տարեկան երեք ամսական է: Ձմեռ պապին ինչ-որ բերում է, ինքն ուրախանում է դրանով ու պահանջներ չի ներկայացնում:

– Իսկ Ձեր կինն ի՞նչ է ուզել Ձմեռ պապից:

– Չի համաձայնեցրել ինձ հետ:

– Վերադառնալով առավել լուրջ հարցի, որը ֆինանսական միջոցներին է վերաբերում, կասե՞ք ինչպես ենք փակում եռամսյակը:

– Փակում ենք սպասումով, տեսնենք ինչպես կլինի: Մենք սոցիալական ծախսերի առումով որեւէ խնդիր չենք ունենա, բայց պետական բյուջեի հարկային եկամուտների մասով կունենանք շեղում:

– Ինչո՞վ է պայմանավորված եւ ի՞նչ չափի շեղման մասին է խոսքը:

– Բավարարվեք նրանով, որ ես ասացի շեղում կա: Մեկ շաբաթ հետո կոնկրետ թիվը կլինի:

ՀՐԱՆՏ ՍԱՐԱՖՅԱՆ