ԹԵՎԱՆ ՊՈՂՈՍՅԱՆ. «ՊԵՏՔ Է ՀԱՍԿԱՆԱԼ` ՈՎ ԻՆՉԻՆ Է ԸՆԴԴԻՄԱՆՈՒՄ»

ԹԵՎԱՆ ՊՈՂՈՍՅԱՆ. «ՊԵՏՔ Է ՀԱՍԿԱՆԱԼ` ՈՎ ԻՆՉԻՆ Է ԸՆԴԴԻՄԱՆՈՒՄ»

Ինչպես հայտնի է, դեկտեմբերի 18-ը վերջին օրն էր, երբ ՀԱԿ-ի նախաձեռնած ստորագրահավաքին կարող են միանալ պատգամավորները:
Ստորագրահավաքին միացած Թեւան Պողոսյանը, ով ի դեպ «այո» է ասել Սահմանադրությանը, այն հարցին, թե շատ ընդդիմադիրներ չեն միացել այդ նախաձեռնությանը եւ անգամ խիստ քննադատությունների էին ենթարկում այն, ասաց.

–Ցանկացած պատգամավոր ազատ է իր որոշումներն ընդունել` ըստ իր սեփական համոզմունքի: Ամեն դեպքում, կարեւոր չէ, թե ով միացավ, ով` ոչ: Ես ուրախ եմ, որ կա քաղաքական ուժ, որը փորձում է պայքարել ընտրակեղծարարների դեմ, որ ցանկացած կեղծարար իմանա, որ վաղ թե ուշ իր ձեռքը բռնելու են, նա միշտ չի կարողանալու իր կեղծիքներն անցկացնել: Դրա համար ես իմ լուման էլ եմ դրել այդ հարցում: Այնպես չէ, որ ես ի սկզբանե մեծ հավատ ունիեի, որ այդ գործընթացը բարեհաջող է ավարտվելու, ինձ որ հարցնում էին` ասում էի, որ այսօրվա գոյություն ունեցող համակարգի մեջ ես համարում եմ սա անպտուղ աշխատանք:
– Պարոն Պողոսյան, ԲՀԿ-ական Ստեփան Մարգարյանը հայտարարում էր, որ եթե քսանվեց հոգին լրանա, նա կմիանա, որպեսզի ցուցակը ամբողջանա: Այս առումով` ի՞նչ եք կարծում:
– Ես հիմա իմ գործընկերների ասածները չեմ ցանկանում մեկնաբանել, նրանք արդեն իրենց ասածները հիմնավորել են:
– Կարելի՞ է ասել, որ ընդդիմությունը մեկ անգամ եւս փաստեց, որ միասնական լինել չի կարող:
– Իհարկե այդպես չէ, ուղղակի պետք է հասկանալ, թե ով ինչին է ընդդիմանում` մարդիկ կան ներքին քաղաքականությանն են ընդդիմանում, կամ, օրինակ, ՀԱԿ-ը կողմ էր ԵՏՄ-ին, բայց ես ինքս դեմ եմ եղել: Հիմա ասենք, որ ՀԱԿ-ը դարձել էր իշխանություն` իհարկե ոչ: Պարզապես կան քաղաքական ուժեր, որոնք գտնում են, որ պետք չեն փոփոխություններ, մի մասն էլ գտնում են, որ ամեն դեպքում պետք է ընդդիմանալ:

ԻԼՈՆԱ ԱԶԱՐՅԱՆ