«ՔԱՂԱՔԱԿԱՆ ՊՈՌՆԿՈՒԹՅԱՆ ՋԱՏԱԳՈՎՆԵՐԸ» ՏԵՍԱՆՅՈՒԹԻ ՀԱՄԱՐ ԲՀԿ ԻՐԱՎԱՊԱՀՆԵՐԻ՞Ն Է ԴԻՄԵԼՈՒ

«ՔԱՂԱՔԱԿԱՆ ՊՈՌՆԿՈՒԹՅԱՆ ՋԱՏԱԳՈՎՆԵՐԸ»

ՏԵՍԱՆՅՈՒԹԻ ՀԱՄԱՐ ԲՀԿ ԻՐԱՎԱՊԱՀՆԵՐԻ՞Ն Է ԴԻՄԵԼՈՒ

Երեկվանից  լրատվական կայքերում լայն արձագանք է ունեցել «քաղաքական պոռնկության» ջատագովները» անվանումով  տեսանյութ, որտեղ խոսվում է  ԲՀԿ-ի անցյալի ու ներկայի մասին: Մասնավորապես, տեսանյութի հեղինակը կամ հեղինակները  մեջբերել են ԲՀԿ-ի տասն ամիս առաջ արված հայտարարությունը սահմանադրական բարեփոխումների մասին, որոնց այսօր նույն կուսակցությունը կողմ է: «Իրավունք»-ը ԲՀԿ պատգամավոր Վահան Բաբայանից, ում խոսքերից եւս մեջբերում կա տեսանյութում, պարզեց` ինչ արձագանք կտա այդ ամենին: Դա իրավապահ մարմինների խնդիրն է: Շուտով մենք կգտնենք` ով է  դա արել, օրենքով սահմանված կարգով ենթարկելու ենք պատասխանատվության:

ԲՀԿ պատգամավորը չբացառեց, որ իրավապահներին դիմում կուղարկեն, քանի որ, ըստ կուսակցականի, ԲՀԿ-ի հասցեին վիրավորանք է հնչել:

Տեսանյութը սկսվում է ՀՅԴ խմբակցության ղեկավար Արմեն Ռուստամյանի ընդդիմադիր ելույթից մի հատվածի մեջբերմամբ:

ՀՅԴ խմբակցության անդամ Արծվիկ Մինասյանն «Իրավունք»-ին ասաց, որ տեղյակ չէ` խոսքն ինչ տեսանյութի մասին է: Բայց, ըստ ՀՅԴ  անդամի, սա ցույց է տալիս` որքան է կեղտոտվել մշակույթը, այդ կեղտի մեջ որքան է այն ուժերի դերակատարությունը, որոնք նեղ խմբային շահերից այն կողմ ոչինչ չեն տեսնում: «Չկա ոչ միայն հանրային բարոյականություն, այլեւ տարրական էթիկա: Նման ուժերը հանրության կողմից պետք է մերժվեն ու արհամարհվեն»,- եզրափակեց  դաշնակցական պատգամավորը:

ՍՈՆԱ ԴԱՎԹՅԱՆ