Զարմացած

Վաղուց ոչ գվվում էր, ոչ բվվում էր ՎԱՐԴԱՆ ՕՍԿԱՆՅԱՆԸ, նույնիսկ հասցրել էինք կարոտել, քանզի ոչ միայն խորհրդարանում, այլ նույնիսկ «Ֆեյսբուքում» ծպտուն չէր հանում: Եվ ահա Վարդան Սիվիլիթասիչը խոսեց, եւ պարզվում է, որ հանրաքվեի օրը նա զարմանալիորեն որոշել էր իրեն հետախույզի տեղ դնել.

«Քվեարկության հատուկ գնացել էի ուշ երեկոյան, որպեսզի պատկերացում կազմեի օրվա ընթացքում քվեարկողների թվի եւ քվեարկության ընթացքի մասին, նաեւ` հարցուփորձի միջոցով: Երբ սեղանի հետեւում նստած հանձնաժողովի անդամը, մատյանի էջերը թերթելով, փորձում էր գտնել իմ անունը, նկատեցի, որ արդեն օրվա վերջում հազիվ 30 տոկոսն էր քվեարկել»: Այնուհետ մեր Ջեյմս Բոնդը ծանոթանալով իր ընտրատեղամասի արդյունքներին, 144-ը` «այո», 328-ը` «ոչ», եկավ խորիմաստ եզրակացության, որ ամբողջ երկրով է նույն պատկերը, եւ եզրակացրեց. «Ես կարծում եմ, որ դեկտեմբերի 6-ին տեղի է ունեցել լրջագույն հանցագործություն, որի արդյունքում հայ ժողովուրդը զրկվել է Հայաստանի ապագային վերաբերող ամենակարեւոր հարցի շուրջ իր կամքն արտահայտելու հնարավորությունից»: Դե ինչ, զարմանալով հանդերձ, մնում է հորդորել ԱՄՆ Կենտրոնական հետախուզական վարչությանը, որպեսզի անպայման պարգեւատրի իր լրտեսական ուսումնական հաստատությունների շրջանավարտ Օսկանյանին` փայլուն արդյունքի համար: Հայրենիքը, այսինքն` Ամերիկան, նրան չի մոռանա:
Սակայն Ամերիկան, պարզվում է, զարմանալիորեն երախտամոռ է գտնվել իր գրանտակերների եւ շպիոնական կուրսերի երիտասարդ շրջանավարտների նկատմամբ, ավելին` բավականին դրական գնահատելով հանրաքվեն, կոտրել է նրանց նուրբ սրտերը: Ու այդ կոնտինգենտը սկսել է իր կերակրիչ «քեռի Սեմին» ամոթանք տալ, որը կարելի է ամփոփել «Ժառանգության» խոսնակ ԴԱՎԻԹ ՍԱՆԱՍԱՐՅԱՆԻ բանաձեւով. «Դժվար թե ավելի խայտառակ հայտարարություն լիներ, քան արել է ԱՄՆ դեսպանատունը»: Զարմանալի է, արդյոք այդ ջահելները մոռացել են ժողովրդական իմաստնությունը, որ չի կարելի թքել այն ջրհորի մեջ, որից խմում ես: Բա որ վաղը դեսպանը նեղանա ու բոլորիդ կաթիկից կտրի, ի՞նչ եք անելու...
Կաթողիկոս Գարեգին Երկրորդը իր նստավայրում ընդունել է Ռուսաստանի ԿԸՀ նախագահ Վլադիմիր Չուրովին: Սովորական լուր է, կաթողիկոսը արտերկրից ում ասես կարող է ընդունել, բայց ապշեցուցիչ ձեւով դրան ցավագին արձագանքեց քաղաքագետ ՌՈՒԲԵՆ ՄԵՀՐԱԲՅԱՆԸ: Ահավասիկ` մի փոքրիկ մեջբերում նրա խորաթափանց փորձագիտական կարծիքից. «Բայց խի՞, էլի... Քլորամինով Մայր Տաճարը մաքրել է պետք... Այսինքն, Ռուսաստանից եկած ամեն մի անթրաշ գրպանահատ համբալ պիտի արժանանա Ամենայն Հայոց Կաթողիկոսի ընդունելությանը: Կարող ա՞ դա էլ ա ԵՏՄ շրջանակներում Հայաստանի «պարտավորությունների» ծիրին մեջ: Գժվել ե՞ք, արա՛»: Զարմանալով հանդերձ, մնում է ընդամենը հռետորական հարց հնչեցնել` իսկ ի՞նչ պետք է սովորեն այդ քաղաքագետից մայր բուհում քաղաքագիտություն ուսումնասիրող ուսանողները:
Կրոնի հարցում էլ ԱՐԵՎՄՈՒՏՔԸ զարմանալիորեն ծայրահեղությունից ծայրահեղություն է ընկնում: Այն դրվագներից, որ մահմեդականներին չվիրավորելու համար արգելում էին տոնածառ դնելը եւ աշխատավայրում խաչ կրելը, այլեւս ոչ ոք չի զարմանում: Բայց ահա ԱՄՆ նախագահի թեկնածու Դոնալդ Թրամպը եւ Ֆրանսիայի ազգայնական կուսակցապետ, ՏԻՄ ընտրություններում հաղթանակած Մարին Լեպենը կոչ են անում գրողի ծոցն արգելել իսլամը, ոչ մի մահմեդականի ներս չթողնել եւ փակել մզկիթները: Սկսեցին սեփական քաղաքացիների կրոնական ավանդույթները հանուն մահմեդականների տրորելով, իսկ հիմա զարմանալիորեն ուզում են աշխարհի մեկ քառորդի ոչ մի ներկայացուցչի ներս չթողնել: Լավ, ո՞րն է ձեր, գրողը տարած, «եվրոպական չափանիշը»` գոմիկների ամուսնություննե՞րը, թե` իսլամի արգելքը: Իսկ Ֆրանսիայի վարչապետ Մանուլ Վալֆը հայտարարել է, որ պետք է փակել «արմատական մզկիթներն ու ընկերությունները եւ արտաքսել մեր արժեքների դեմ հանդես եկող ու արմատական գաղափարներ քարոզող բոլոր արտասահմանցիներին»: Հիմա պատկերացնո՞ւմ եք, թե ինչ կկատարվեր, եթե հանկարծ որեւէ բարձրաստիճան պաշտոնյա Հայաստանում հայտարարեր, որ պետք է փակել բոլոր աղանդները եւ արտաքսել բոլոր աղանդավորական քարոզիչներին: Ուրեմն ձեզ կարելի է, մեզ չի՞ կարելի: Բայց, միեւնույնն է, մենք գոնե հստակ գիտենք որոնք են մեր արժեքները, ու վաղ թե ուշ երկիրը կմաքրենք բոլոր տեսակի վարակներից: Իսկ դուք դեռ կողմնորոշվեք...

Զարմացած է
ՀՈՎՀԱՆՆԵՍ ԳԱԼԱՋՅԱՆԸ