Երբ նազելի հայուհիները, կապուտաչյա սլավոնուհիներն ու սեւամորթ կոկետուհիները նույն բեմահարթակում են

ԵՐԲ ՆԱԶԵԼԻ ՀԱՅՈՒՀԻՆԵՐԸ, ԿԱՊՈՒՏԱՉՅԱ ՍԼԱՎՈՆՈՒՀԻՆԵՐՆ ՈՒ ՍԵՎԱՄՈՐԹ ԿՈԿԵՏՈՒՀԻՆԵՐԸ ՆՈՒՅՆ ԲԵՄԱՀԱՐԹԱԿՈՒՄ ԵՆ

Օրերս Մոսկվայում կայացավ երկար սպասված «ArmFashionDay»-ը` հայկական նորաձեւության օրը, որի շրջանակներում ներկաների ուշադրությանը ներկայացվեց  հայազգի 7 մոդելավորողի հագուստների հավաքածուները եւ, իհարկե, իրենց կատարումներով օրն էլ ավելի տոնական դարձրեցին սիրված երգիչ-երգչուհիները: Նշենք, որ երեկոն վարեց ԳԱՅԱՆԵ ԲՐԵՈՎԱՆ, ով անմնացորդ աջակիցն է  հայերի, հայկականի ու գեղեցիկ մտահաղացումների, ինչպիսին «ArmFashionDay»-ի կազմակերպիչ,  ՌԴ ում բնակվող մեր հայրենակցուհի, հաղորդավարուհի ՆԱԻՐԱ ՆԻԱԶՅԱՆԻ նախաձեռնած միջոցառումն էր: Եվ ամփոփելով տեղի ունեցած միջոցառումն` «Իրավունքն» առիթ ունեցավ զրուցելու հենց Ն. Նիազյանի հետ:

-Նաիրա, որքանո՞վ  արդարացվեցին Ձեր սպասումները:

- Մասնակից 7 դիզայներներն իրենց աշխատանքներով հիացրեցին ներկաներին` գեղարվեստի իրենց ընկալման առանձնահատկություններով, ոճային ու գունային բազմազանությամբ` հագեցած ազգային տարրերով պատրաստված զարդանախշերից  մինչեւ բոհեմային շքեղ  աքսեսուարներով: Հավաքածուները ներկայացնող մանեքենուհիներն էլ չէին զիջում իրենց  էկզոտիկությամբ. Արտյոմ Սյունեցու հայկական հավաքածուն ներկայացնող նազելի հայուհիներին փոխարինելու էին գալիս երկարոտնյա կապուտաչյա սլավոնոհիններն ու մոդելավորող Արաքսյա Վիտայի կոկետ սեւամորթ գեղեցկուհիները:

- Իսկ ովքե՞ր էին հայկական նորաձեւության տոնի հյուրերը:

- Երեք ժամյա երեկոն անցավ մեկ ակնթարթի նման: Հյուրերը քաղաքական, մշակութային, շոուբիզնեսյան ներկայացուցիչներն էին, տնային տնտեսուհիներ, որոնց սպասումները` տեսնելու հարմարավետ հագուստից մինչեւ բեմական շիկ, կարծում եմ դիզայներներին հաջողվեց հրամցնել: Շոուն հատկանշական էր նաեւ  խոստացված աստղաբույլի  հիասքանչ կատարումներով, ինչն  ավելի բովանդակալից ու  հագեցած  դարձրեց  երեկոն: Ամեն հավաքածու ուղեկցվում էր հայտնի արտիստի կատարմամբ` Հայկ Էս,  Էդգար, Դիանա Դիկովսկի,Նշան Հայրապետյան, Արտյոմ Հարությունյան, Մարիա Սիվցովա, Սեւակ Խանագյան, Ժաննա Խուդավերդյան, Օքսանա Կոզակովա, իսկ երեկոյի հատուկ հյուրը Արտեմ Վալտերն էր:

- Անդրադառնանք նաեւ ցուցադրված հավաքածուներից մի քանիսին առանձին-առանձին…

- Հայկական նորաձեւության տոնին մասնակցելու նպատակով  Երեւանից Մոսկվա էր ժամանել  դիզայներ Արտյոմ Սյունեցին, ով Վանի թագավորությանը նվիրված հայկական տարազների  իր հավաքածուով գեղեցկուհի հայուհիներին ներկայացրեց  շքեղ թագուհիների կերպարներով:

Դիզայներ Նարինե Հարությունյանը` նորաձեւության լայն շրջանկներին հայտնի իր  կանացիության եւ նրբագեղության տեսականիներով, չնայած աշխատանքային խիտ գրաֆիկին, մեծ սիրով մասնակցություն ունեցավ  սփյուռքում  առաջին անգամ կազմակերպված հայկական նորաձեւության երեկոյին՝ մեկ անգամ եւս շլացնելով բոլորին:

Արմինա Գոմցյանի ներկայացրած հավաքածուն մեգապոլիսի խելահեղ ռիթմով ապրող աղջիկների  ցանկությունների ճիչն  էր` դասականի եւ ռոմանտիիկի  համադրմամբ:

Դիզայներ Արաքսյա Վիտան իր հավաքածուն ստեղծել էր հարմարավետության սկզբունքով, ինչն, ըստ դիզայների, հնարավորութուն է տալիս  գեղեցկուհիներին իր ստեղծած  հագուստները կրել ողջ օրվա, աշխատանքի  ընթացքում եւ երեկոյան` հարստացնելով զարդերով:

Աննա Մուրադյանը մանկուց է ստեղծում գլխարկներ եւ ցուցադրության շրջանակներում էլ ներկայացավ գլխարկների «ԱնդրիԵլա»  հավաքածուով (ի դեպ, «Armfashionday»-ը  Աննայի առաջին մեծ հարթակն էր):

Ռեգինա Ակոպովան իր հավաքածուն անվանակոչել էր «Ջազի երանգներ», եւ նվիրել հանգուցյալ հայրիկի՝ ջազ երաժշտի վառ հիշատակին:

Այնպես որ, բոլոր դիզայներների դեֆիլեներն կամ ցուցադրումներն էլ յուրօրինակ էին եւ հագեցած:

- «Իրավունքի» հետ զրույցում մոդելավորող Անի Մանուկյանը նշել էր, թե քանի որ փակումն իրեն է վերապահված, հանդիսատեսին անակնկալ է սպասվում: Կպատմե՞ք անակնկալի մասին:

- Այո, իսկապես Անի Մանուկյանը ներկայացավ մեզ  խոստացած անակնկալներով. Կինոյի եւ թատրոնի դերասանուհի Յանա Կրայնովան հանդես եկավ որպես մանեքենուհի եւ ցուցադրումն էլ անցավ Օքսանա Կոզավոկայի կենդանի կատարումների ներքո:

- Ինչպիսի՞ արձագանքներ կան միջոցառումից հետո:

- «Armfashionday»-ի շուրջ արձագանքներն անթիվ են`ամենաբարձր գնահատականներից՝ նոր տաղանդավոր հայերի հանդիսատեսի դատին ներկայացնելու եւ ավելի մեծ  մասշտաբների ներկայացում կազմակերպելուց, որը  շատերին հնարավորություն կտա ներկա գտնվելու,  մինչեւ դիտողական կարծիքներ: Որպես երեկոյի կազմակերպիչ` պետք է նշեմ, որ գնահատում եմ հնչող բոլոր կարծիքներն ու վերանայում կատարած աշխատանքը: Եվ ցանկանում եմ նշել, որ հայկական նորաձության օր անվանումը չի պարտադրում կամ սահմանափակում ներկայացող դիզայներների հավաքածուների տեսակները (ներկայանալու միայն հայկական էլեմենտներով կարված տեսականիով): Մենք բոլորս ապրում եւ ստեղծագործում ենք հայրենիքից դուրս, եւ այս երկրի «ֆեշն» ոլորտին մոտ քայլելու համար պետք է ստեղծագործել  համապատասխան ձեւաչափերով, եթե  նաեւ նկատի ունենանք, որ  ներկայացող բոլոր դիզայները ցանկություն ունեն դուրս գալու մեծ շուկա:

- Այսինքն` կարելի՞ է ասել, որ այսպիսի նորաձեւության օրերը շարունակական կլինեն:

- «Armfashionday»-ը կլինի շարունակական. հաջորդը տեղի կունենա 2016 թ. գարնանը: Այնպես որ, սիրով հրավիրում ենք հագուստի, աքսեսուարների ոլորտում ստեղծագործող մեր  տաղանդավոր հայրենակիցներին իրենց կատարած աշխատանքները  հանդիսատեսին`  ռուսաստանյան լայն շրջանակների դատին ներկայացնելու համար:

- Եվս մեկ անգամ շնորհավորում եմ Ձեզ, որովհետեւ ինչպես նախորդ անգամ հաջողվեց  Ձեզ Ռուսաստանում համախմբել հայ երգիչներին, հիմա էլ մեկ հարկի տակ կարողացաք համախմբել հայ մոդելավորողներին:

- Շնորհակալ եմ` իմ կատարած աշխատանքը գնահատելու համար. այն հայեցի է եւ համախմբող, երբեմն շատ լայնամասշտաբ իմ ունեցած հնարավորություններից, բայց շատ փոքր իմ  ցանկություններից: Ես շարունակելու եմ իմ հայրենանվեր գործունեությունը` սպասումով, որ մի օր մեծարգո հայրենակիցներից կարձագանքեն`աջակցելու ցանկությամբ:

ՀՐԱՆՏ ՍԱՐԱՖՅԱՆ