ՆՈՐ ՄԱՆՐԱՄԱՍՆԵՐ ԳՈՐԾԱՐԱՐԻ ՏՂԱՆԵՐԻ ՍՊԱՆՈՒԹՅՈՒՆԻՑ

ՆՈՐ ՄԱՆՐԱՄԱՍՆԵՐ ԳՈՐԾԱՐԱՐԻ ՏՂԱՆԵՐԻ ՍՊԱՆՈՒԹՅՈՒՆԻՑ

«Իրավունքը» անդրադարձել էր նոյեմբերի 16-ին Հանքավանի «Տաք ջուր» կոչվող տարածքում հնչած կրակոցներին, որի  հետեւանքով մահացել էին եղբայրներ 25-ամյա Վարդան եւ 35-ամյա Վահե Գալստյանները, նրանց ընկեր, 27-ամյա Արմեն Հովհաննիսյանը: Հիշեցնենք, որ նախնական տեղեկություններով` այս ամենի պատճառը եղել է ծառահատումը: Ըստ այդմ, սպանված երիտասարդները` Վարդան ու Վահե Գալստյանները, իրենց պատկանող ծառերը կտրելու համար մեղադրվողի՝ Հայրապետ Սեփոյանի հոր հետ վիճել են, ծեծել: Վերջինիս որդին էլ` հոր վրեժը լուծելու համար, ինքնաձիգով կրակել է Վահեի մեքենայի վրա, ինչի հետեւանքով մեքենայում գտնվող երեք երիտասարդները մահացել են:
Եվ ահա մեր աղբյուրը տեղեկացնում է, որ. «Մեքենայի մեջ եղել են ոչ միայն երեք սպանված տղաները, այլ եւս երկուսը: Սակայն նրանք չեն իջել մեքենայից եւ այդ կերպ կարողացել են փրկել իրենց կյանքը: Իրականում հենց այդ հինգ հոգին են ծեծի ենթարկել անտառապահին, իսկ երբ տղան իմացել է, հրացանը վերցրել է եւ առանց որեւէ բան ասելու՝ կրակահերթ արձակել»: Ըստ նույն աղբյուրի. «Սեփոյանները, սակայն, այս օրերին, շրջանառում են վարկած, թե իրենց որդին` սպանվածների տղաների ձեռքից է վերցրել հրացանը եւ դրանով էլ կատարել է սպանությունը, սակայն փրկվածները պատմել են, որ նա միանգամից կրակոցներով շարժվել է զոհերի ուղղությամբ»:
ԻԼՈՆԱ ԱԶԱՐՅԱՆ