ՀՀՇ-ԻՑ «ՎԱՌՎԱԾ «ՔՈՉԱՐՅԱՆԱՄԵՏ» ՊԱՇՏՈՆՅԱՅԻ ԴԱՏԱՎՈՐ ԴՍՏԵՐ ՄԻԼԻՈՆՆԵՐՆ ԱՎԵԼԱՑԵԼ ԵՆ

ՀՀՇ-ԻՑ «ՎԱՌՎԱԾ «ՔՈՉԱՐՅԱՆԱՄԵՏ» ՊԱՇՏՈՆՅԱՅԻ

ԴԱՏԱՎՈՐ ԴՍՏԵՐ ՄԻԼԻՈՆՆԵՐՆ ԱՎԵԼԱՑԵԼ ԵՆ

«Իրավունք»-ը բարձրաստիճան անձանց էթիկայի հանձնաժողովից տեղեկանում է, որ վերաքննիչ քրեական դատարանի դատավոր Լիլիթ Թադեւոսյանի եկամուտները   նախորդ տարվա վերջում ավելացել են` 27.000.000 մլն-ից դառնալով 32.000.000 մլն դրամ: Նախորդ տարի  դատավորի եկամուտները հարկային տարում կազմել են 7. 316. 705 դրամ:

Չնայած իր երիտասարդ տարիքին, դատավոր Թադեւոսյանն այդքան էլ վատ չի ապրում: Ավելին` նախորդ տարի ավելացել են ոչ միայն իր, այլեւ ամուսնու` սոցիալական ապահովության ծառայության պետի տեղակալ Վահագն Գրիգորյանի եկամուտները:

Ո՞վ է Լիլիթ Թադեւոսյանը, որ կարողացել է այս երիտասարդ տարիքում միլիոններ կուտակել: Նրա հայրը ժամանակին եղել է Տիգրան Նաղդալյանի սպանության գործով մեղադրող խմբի կարկառուն ներկայացուցիչ Զելիմ Թադեւոսյանը, ում միայն երկրորդ նախագահ Ռոբերտ Քոչարյանի ղեկավարման տարիներին  է հաջողվել  դատախազությունում պաշտոն ստանալ, քանի որ ըստ մամուլի հրապարակումների, «Ղարաբաղ» կոմիտեի որոշ անդամների նկատմամբ նա հալածանքներ է սկսել` որպես Շահումյանի շրջանի դատախազ:

ՀՀՇ-ՀԱԿ-ի հանդեպ Թադեւոսյանների «հետաքրքրվածությունն» ու «մուռ հանելն» այսքանով չի ավարտվում: Լիլիթ Թադեւոսյանը  2008 թ-ին առիթ է ունեցել Կորյուն Փիլոյանի հետ մեղադրող կողմ հանդես գալ  եւ մասնակցել  ՀԱԿ խմբակցության պատգամավոր, նախկին զինդատախազ Գագիկ Ջհանգիրյանի  դատավարության գործին:

Ի դեպ, «Իրավունք»-ը եւս առիթ է ունեցել այս անդրադառնալու տիկին Թադեւոսյանին: Բանն այն է, որ 2012 թ-ին ՀՀ վերաքննիչ քրեական դատարանի դատավոր Լիլիթ Զելիմի Թադեւոսյանի նկատմամբ կարգապահական վարույթ հարուցելու պահանջ էր ներկայացվել ՀՀ արդարադատության նախարարություն` այն պատճառաբանությամբ, որ այդ դատավորը քննել էր քաղաքացու բողոքը` չպահանջելով եւ ձեռքի տակ չունենալով քրեական գործը:

ՍՈՆԱ ԴԱՎԹՅԱՆ