«ԻՇԽԱՆՈՒԹՅՈՒՆՆ Է ՄԵՂԱՎՈՐ «ԺԱՌԱՆԳՈՒԹՅՈՒՆ»-ԻՑ ՌՈՒԲԵՆ ՀԱԿՈԲՅԱՆԻ ՀԵՌԱՆԱԼՈՒ ՀԱՄԱՐ». ՏԵՍԱՆՅՈՒԹ

«ԻՇԽԱՆՈՒԹՅՈՒՆՆ Է ՄԵՂԱՎՈՐ  «ԺԱՌԱՆԳՈՒԹՅՈՒՆ»-

ԻՑ ՌՈՒԲԵՆ ՀԱԿՈԲՅԱՆԻ ՀԵՌԱՆԱԼՈՒ ՀԱՄԱՐ».

ՏԵՍԱՆՅՈՒԹ

Մոտ մեկ ամիս է, որ պատգամավոր Ռուբեն Հակոբյանը «Ժառանգություն» խմբակցության ղեկավար չէ ու «Ժառանգություն» կուսակցության անդամ չէ: Մինչ այդ էլ  կուսակցությունում հանգիստ ու խաղաղ չէին արշալույսները: Սակայն ռուբեն Հակոբյանի հեռանալը վերջին ակորդն էր տեղի  ունեցածի: «Իրավունք»-ը կուսակցության փոխնախագահ Արմեն Մարտիրոսյանից  պարզեց` ի վերջո, «Ժառանգությունն» իրար գլխի կհավաքվի՞, նր թափ կհավաքի: Չէ՞ որ այս պահին  Զարուհի Փոստանջյանն է ներկայացնում խմբակցությունը: «Կուսակցությունների մասին օրենքը, ընտրական օրենսգիրքն այնպես է ընդունել իշխանությունը, որ կարողանան ցանկացած պարագայում քայքայել խմբակցությունը: Իշխանությունը բոլոր միջոցները գործադրեց «Ժառանգության» դեմ»,- ասաց Մարտիրոսյանը:

Մեղավո՞ր  է իշխանությունը, որ Ռուբեն Հակոբյանը դադարեցրեց իր անդամակցությունը «Ժառանգությանը» եւ հրաժարվեց խմբակցությունը ղեկավարելուց: «Բնականաբար, Ժամանակը կգա, եւ  ժամանակի քաղաքագետները դրանք շատ լավ  կվերլուծեն»,- ասաց կուսակցության փոխնախագահը:

«Դուք վերլուծեք»,- խնդրեցինք Մարտիրոսյանին:

«Ես քաղաքագետ չեմ, որ վերլուծեմ»,- չմանրամասնեց ու փակագծերը չբացեց կուսակցության փոխնախագահը:

Հ.Գ. Քանի որ Արմեն Մարտիրոսյանը  չբացեց փակագծերը իշխանության մեղավորության մասին, փորձենք մենք կռահել` ինչ էր ուզում ասել «Ժառանգականը»: Բանն այն է, որ  նախկին «Ժառանգական», բայց հոգով, սրտով ու գաղափարներով դաշնակցական Ռուբեն Հակոբյանը չի բացառվում` հետ վերադառնա ՀՅԴ, որտեղից ժամանակին հեռացվել էր եւ որեւէ պաշտոն ստանձնի, քանի որ ՀՅԴ հնարավոր է իշխանության հետ կոալիցիա կազմի: Մամուլը վերջերս գրել էր, որ  իշխանությունը դաշնակցության հետ  բանակցություններն ավարտել է, պաշտոնների բաժանումն ավարտվել է: Իսկ թե ինչ պաշտոն կստանա Ռուբեն Հակոբյանը ՀՅԴ-ի կոալիցիա կազմելու դեպքում,  ցույց կտա ժամանակը:

ՍՈՆԱ ԴԱՎԹՅԱՆ