Զարմացած

ՀԱԿ-ը միշտ էլ մնում է ՀԱԿ, եւ անգամ նրանց մոտ, ովքեր ՀԱԿ-ից սահմանազատվում են, զարմանալիորեն դա այնպիսի հետք է թողած լինում, որ անպայման պետք է ինչ-որ մի բան ՀԱԿմեջ անեն: Այսպես, երկու լեւոնների հետ` Տեր-Պետրոսյան եւ Զուրաբյան, առավելագույն հակասություններ ունեցող ՀԱԿ խմբակցության անդամ ԼՅՈՒԴՄԻԼԱ ՍԱՐԳՍՅԱՆԸ հայտարարել է հետեւյալը. «Եթե Հովիկ Աբրահամյանն իրեն չարդարացրեց, հորեղբորս տղա՞ն է, թե փեսաս է, որ պիտի իրեն խնայենք»: Զարմանալի է, այդ ինչպես է, որ զօրուգիշեր արդարությունից եւ օրինականությունից խոսող ընդդիմադիրն առաջնորդվում է խնամի-ծանոթ-բարեկամ արատավոր սխեմայով: Եվ ստացվում է, որ եթե որեւէ պաշտոնյա տիկին Սարգսյանի հետ ազգակցական կապ ունի, ապա իրեն արդարացնի կամ չարդարացնի, քննադատության չի ենթարկվի: Լավ, գրողը տանի, բա էլ ո՞ւր մնաց ընդդիմադիրի սկզբունքայնությունը:

Հիշո՞ւմ եք հին անեկդոտը: Մի մարդ գազանանոց այցելելուց հետո հայտարարում է, որ պետք է իր հարեւանին սպանի` իրեն կոկորդիլոս անվանելու համար: Պարզվում է, որ հարեւանը նրան կոկորդիլոս է անվանել 15 տարի առաջ, եւ երբ շուրջբոլորը զարմանում են, թե ինչու հանկարծ այդքան կատաղեց այդ հին պատմությունից, ասում է. «Նոր տեսա` կոկորդիլոսն ինչ է: Ախր, շատ բեջուռա կենդանի է»: Այդ անեկդոտը հիշեցինք, քանի որ «Ա1+»-ի մեր գործընկերներին «ԱՌԱԳԱՍՏ» սրճարանի սեփականատերը դատի է տվել... 2000 թվականին հեռարձակված հաղորդման համար: Հաղորդումն էլ հայտնի դեպքն է, թե ինչպես Ռոբերտ Քոչարյանի թիկնապահները սրճարանի արտաքնոցում ծեծելով սպանել էին Պողոս Պողոսյանին: Պարզվում է, որ, թեեւ իրար կպած են «Առագաստ» եւ «Պոպլավոկ» սրճարանները, միախառնված են ու թերեւս բացի անձնակազմից, ոչ ոք մեկը մյուսից չի տարբերում, հիմա` 15 տարի անց «Առագաստի» սեփականատերը որոշել է դատի տալ, քանի որ սպանությունը տեղի է ունեցել «Պոպլավոկում»: Դե ինչ, զարմանալով հանդերձ, մնում է «Ա1+»-ի մեր գործընկերներին մաղթել, որ հանկարծ ծիծաղից փորները չպատռվի:
Իսկ աշխարհահռչակ ռոք երաժիշտ ՍԵՐԺ ԹԱՆԿՅԱՆԸ հանկարծ քնել-զարթնել է ու որոշել է հրապարակավ կարծիք հայտնել նոր Սահմանադրության մասին. «Շատ դեպքերում մաքուր խորհրդարանական համակարգը նախընտրելի է առավել ժողովրդավարական հենք ունեցող հասարակություններում: Սակայն այլ դեպքերում այն կարող է հանգեցել իշխող էլիտայի ձեռքում ուժի առավել կոնսոլիդացիայի, որն արդեն խորհրդարանում զգալի մեծամասնություն է կազմում եւ կարող է օգտագործվել որպես լծակ` շարունակելու միակուսակցական կառավարումը: Այստեղ պետք է հաշվի առնել նպատակները: Սա նախաձեռնություն չէ, որը բխել է Հայաստանի բնակչությունից (որը իրավացիորեն չափազանց ցինիկ վերաբերմունք ունի օրենքի գերակայության, ընտրակեղծիքների ու կոռուպցիայի նկատմամբ), այլ առաջ է բերվել երկրի իշխող էլիտայի կողմից»: Թանկյանին շատ սիրում ու հարգում ենք, սակայն զարմանալի է, որ նա մինչեւ հիմա անտեսում է այն հանգամանքը, որ Սահմանադրության, ընտրությունների, ՀՀ ներքին հարցերի մասին կարծիք հայտնելու իրավունքը պատկանում է բացառապես ՀՀ քաղաքացիներին: Զարմանալի է, ինչքան կարելի է ասել` եթե ուզում եք մասնակցել ներքաղաքական կյանքին, ապա բարի եղեք նախ ընդունել ՀՀ քաղաքացիությունը: Այ, այդ ժամանակ ուզում եք` Սահմանադրություն քննադատեք, ուզում եք հանրահավաք կամ ցույց արեք, ուզում եք ցանկացած թեկուզ ամենախիստ կարծիքը հայտնեք իշխանությունների մասին: Բայց մինչ այդ, գրողը տանի, բարի եղեք ձեր կարծիքը ձեզ պահել:
Այս օրերին բոլորս տեղյակ եղանք ԹՈՒՐՔԵՐԻ վերաբերմունքին Փարիզում տեղի ունեցած ահաբեկչությանը: Հիշեցնենք ե՛ւ Թուրքիայում, ե՛ւ Ադրբեջանում, երբ մարզադաշտում առաջարկվել է 1 րոպե լռությամբ հարգել փարիզյան զոհերի հիշատակը, թուրք ազգի ֆուտբոլասերները սկսել են սուլել եւ վանկարկել «Ալլահ աքբար»: Իսկ հիմա մի պարզ վկայություն, որ թուրքերը շատ են սիրում «Իսլամական պետությունը»: Այսպես, Թուրքիայի Աղր նահանգում անտառի հարցերով վարչության աշխատակից Սյուզան Քոթային ազատել են աշխատանքից այն բանի համար, որ ամիսներ առաջ մասնակցել է «Իսլամական պետության» դեմ բողոքի ակցիային: Ու նրա ղեկավարները, ովքեր պետական պաշտոնյա են, հենց այդ ցույցին մասնակցելու համար ազատում են նրան աշխատանքից: Այնպես որ, չզարմանալով հանդերձ, արձանագրենք հետեւյալ բանաձեւը` «Իսլամական պետություն»=թուրք:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ