ԱՄՆ հետախուզությունը Ֆրանսիային տեղյակ էր պահել հնարավոր ահաբեկչությունների մասին

ԱՄՆ հետախուզությունը Ֆրանսիային տեղյակ էր պահել հնարավոր ահաբեկչությունների մասին

Ամերիկյան հետախուզությունը իմացել եւ դեռեւս մայիսին ֆրանսիացի գործընկերներին տեղյակ է պահել Փարիզում պատրաստվող ահաբեկչությունների մասին։ Ամերիկյան կողմը հատկապես ընդգծել է, որ ոմն Աբդելհամիդ Աբաուդը շատ վտանգավոր անձ է։ Ամերիկյան հետախուզությունը դուրս էր եկել նրա հետքի վրա դեռեւս հունվարին Բելգիայում տեղի ունեցած ահաբեկչություններից եւ ձերբակալումներից հետո։

Գործում, որը ուշ երեկոյան ներկայացրել էին ամերիկան լրատվամիջոցները, ասվում է, որ Աբդելհամիդը Աթենքից ղեկավարել է Բրյուսելի ահաբեկչությունները, իսկ նրա խմբավորման անդամները եղել են եվրոպական տարբեր քաղաքներում, գրում է Le Parisien-ը։

Դեռեւս մայիսին ամերիկյան հատուկ ծառայություններն իրենց եվրոպացի գործընկերներին հայտնել են, որ ԻՄ-ը Եվրոպայում տարբեր ահաբեկչություններ կազմակերպելու բոլոր հնարավորություններն ունի, եւ առաջին տեղը կարող է լինել Փարիզը։

Նշվում է, որ Փարիզի ահաբեկչությունները կազմակերպած անձինք տարվա սկզբից գտնվում էին ԱՄՆ «no-fly list»-ում եւ իրավունք չունեին գտնվել ԱՄՆ տարածքում։

Ֆրանսիայի կառավարությունը չի հերքում, որ տեղյակ է եղել ահաբեկչությունների հնարավորության մասին, սակայն տեղեկություններ չի ունեցել, թե երբ, որտեղ եւ ինչպես դրանք կարող էին կազմակերպվել։