ԲՀԿ ՊԱՏԳԱՄԱՎՈՐ. «ԷԴՔԱՆ ԷԼ ՄԵԾ ԿԱՐԻՔ ՉԿԱ ՄԵԶ ՃՂԵԼՈՒ»

ԲՀԿ ՊԱՏԳԱՄԱՎՈՐ. «ԷԴՔԱՆ ԷԼ ՄԵԾ ԿԱՐԻՔ ՉԿԱ ՄԵԶ

ՃՂԵԼՈՒ»

ԲՀԿ պատգամավոր Մելիք Մանուկյանից (շշի Մելո) «Իրավունք»-ը հետաքրքրվեց`մասնակցություն ունի՞ սահմանադրական բարեփոխումների քարոզարշավին, նրա ընտրատարածքի ընտրողները ծանո՞թ են բարեփոխումներին: «Ակտիվությունը ո՞նց եք չափում, արագության չափո՞վ, հա՞, ոնց որ սպիդոմետրն է (ծիծաղում է-խմբ.): Էդքան էլ մեծ կարիք չկա մեզ ճղելու (նկատի ունի չարչարվելու-խմբ.): Շատ սովորական աշխատում ենք: Հանդիպումներ ենք ունենում, բացատրում ենք ընտրողներին»,-ասաց պատգամավորը:

Մեր մյուս հարցին`տեղյակ են արդյոք քաղաքացիները, ընթերցե՞լ են սահմանադրական բարեփոխումները: «Դե դուք նենց հարց եք տալիս: Հո հատ-հատ չենք հարցնում կարդացել եք բարեփոխումները:  Հետաքրքիր է, բայց բոլորն են տեղյակ են»,-ասաց օրենսդիր մարմնի անդամը:

Ինչո՞ւ մարդիկ պետք է «այո» ասեն նոր սահմանադրության նախագծին: «Բայց ինձ ինչի՞ են ասում այո»,- հարցը կարծես ճիշտ չհասկանալով ասաց պրն Մանուկյանը:

«Նկատի ունեմ` ինչո՞ւ մարդիկ պետք է «այո» ասեն նոր սահմանադրությանը»,-  նորից կրկնեցինք հարցը:

«Բայց ես ասեցի, որ նրանք իմ կարծիքով պետք է այո ասեն սահմանադրությա՞նը: Մենք բացատրում ենք, քարոզում ենք: Որոշ մասը չի հասկանում նորից ենք բացատրում»,- պատասխանեց ԲՀԿ-ականն ու ներս մտավ ԲՀԿ խմբակցության աշխատասենյակ:

ՍՈՆԱ ԴԱՎԹՅԱՆ