ՍՊԱՐՏԱԿ ՄԵԼԻՔՅԱՆ. «ԺՈՂՈՎՐԴԻ ՄԵՋ ՉԿԱ ԱՅԴՔԱՆ ԴԵՄ, ՈՐ ԳՆԱՆ ՈՒ ԴԵՄ ՔՎԵԱՐԿԵՆ»

ՍՊԱՐՏԱԿ ՄԵԼԻՔՅԱՆ. «ԺՈՂՈՎՐԴԻ ՄԵՋ ՉԿԱ ԱՅԴՔԱՆ ԴԵՄ, ՈՐ ԳՆԱՆ ՈՒ ԴԵՄ ՔՎԵԱՐԿԵՆ»

«Ժողովրդավարություն եւ աշխատանք» կուսակցության ղեկավար, ՀՀԿ պատգամավոր Սպարտակ Մելիքյանը վերջերս հաճախ է լինում լրատվամիջոցների ուշադրության կենտրոնում: Բանն այն է, որ ըստ լուրերի` Սպարտակ Մելիքյանի ֆինանսական գործերը բարվոք չեն: «Իրավունքն» այս եւ այլ հարցերի մասին խոսեց օրենսդիր մարմնի ներկայացուցչի հետ:

–Պրն Մելիքյան, Ձեր ֆինանսական ոչ բարվոք վիճակի մասին լրատվամիջոցները հաճախ են գրում: Տեղեկություններն իրականությանը համապատասխանո՞ւմ են:
– Ավելի շատ իմ մասի՞ն եք մտածում, թե՞ ընդհանուր (ծիծաղում է -խմբ.): Իմ գործերը նորմալ են, իմ հարցերը լուծում եմ: Որոշակի խնդիրներ կան, որոնց լուծումը ժամանակով է պայմանավորված:
– Իսկ միգուցե մեր երկրի սոցիալ-տնտեսական դժվար իրավիճակո՞վ:
– Նաեւ դրանով: Դա ինչ կապ ունի: Երկրի սոցիալ-տնտեսական իրավիճակը բոլորի վրա է ազդել: Պատգամավորը եւս մարդ է, նրա վրա էլ կարող է ազդել:

«ԲՈԼՈՐ ՀԱՐՑԵՐԸ ԱՅՍ ՍԱՀՄԱՆԱԴՐՈՒԹՅԱՄԲ ՉԵՆ ԼՈՒԾՎՈՒՄ, ՍԱԿԱՅՆ...»

–Պրն Մելիքյան, Սահմանադրական բարեփոխումների քարոզարշավն արդեն սկսվել է, ձեւավորվել են «Այո»-ի եւ «Ոչ»-ի շտաբերը: Մասնակցո՞ւմ եք Սահմանադրական բարեփոխումների քարոզարշավին: Եթե այո, ինչպե՞ս եք համոզում Ձեր ընտրողներին:
– Իհարկե, մասնակցում եմ, ինչպե՞ս կարող եմ չմասնակցել, անտարբեր մնալ: Կողմնակից եմ այո քվեարկելուն, փորձում եմ համոզել ժողովրդին, բացատրել, որ սա առաջընթաց է: Բոլոր հարցերը, այս Սահմանադրությամբ չեն լուծվում, սակայն հարցերից մեկը, որը դեռ պատգամավոր չլինելով բարձրացրել եմ, այն է, որ հարկավոր է անցնել ամբողջովին համամասնական ընտրակարգին: Շատ հարցեր էլ, որոնք միգուցե կլուծվեն հետագայում:
– Ձեր ընտրողներն ընթերցե՞լ են Սահմանադրությունը:
– Եթե ասեմ` բոլորը կարդացել են, իհարկե` ոչ: Բայց այն ընտրողները, ովքեր իրոք շահագրգռված են տեսնելու, թե ինչ փոփոխություններ կան, նրանք կարդացել են: Մնացածը փորձում ենք տեղում բացատրել:

«ՄԵԾԱՄԱՍՆԱԿԱՆՈՎ ԸՆՏՐՎԱԾ ՊԱՏԳԱՄԱՎՈՐՆԵՐԸ ՀԱՃԱԽ ԻՐԵՆՑ ԸՆՏՐԱՏԱՐԱԾՔՈՒՄ ԴԱՌՆՈՒՄ ԵՆ ԻՇԽԱՆԻԿՆԵՐ»

–ՀՀԿ-ական Ձեր գործընկերներից մեկը` Լեւոն Մարտիրոսյանը, «Իրավունք»-ի հետ զրույցում ասել էր, որ խորհրդարանական կառավարման համակարգին անցնելու դեպքում ցանկալի կլինի միայն մեծամասնական ընտրակարգի գոյությունը:
– Ես կատեգորիկ դեմ եմ մեծամասնական ընտրակարգին, քանի որ այդ ընտրակարգով ընտրված պատգամավորները հաճախ իրենց ընտրատարածքում դառնում են իշխանիկներ: Դա սխալ երեւույթ է, հատկապես երբ քաղաքական կուսակցությունները պետք է պատասխանատվություն կրեն ժողովրդի առջեւ: Մեծամասնականով ընտրված պատգամավորը ավելի շահագրգիռ է իր ընտրատարածքում հարցեր լուծել…
– Դե, մեծամասնականով ընտրված օրենսդիր մարմնի ներկայացուցիչները փորձում են անկախ լինել: Դա ճի՞շտ չեք համարում:
– Ոչ: Պատկերացրեք`131 պատգամավոր կա: Եթե ամեն մեկը փորձի իր կողմը քաշել… Ընդհանուր հարցեր կան, որոնք պետք է լուծել:
– «Ոչ»-ի ճակատի ներկայացուցիչները վերջերս հայտարարում էին, որ իրենց հանդիպումները քաղաքացիների հետ ցույց են տվել, որ գրեթե բոլորը «ոչ» են ասում նոր Սահմանադրությանը, «այո» գրեթե չկա:
– Սուտ է, նման բան չի կարող լինել: Նրանք ամբողջ ժողովրդի հետ հո չե՞ն հանդիպել: Եթե Հայաստանում Սահմանադրական բարեփոխումների հանրաքվեին կմասնակցի 1.000.000 ընտրող, նրանք չեն էլ հասցնի բոլորի հետ հանդիպել:
– «Ոչ»-ի ճակատի հակափաստարկներից մեկը սոցիալ-տնտեսական վիճակն է` ժողովուրդը սոված է, նրա ինչին են պետք սահմանադրական բարեփոխումները:
– Եթե դրան նայենք, ապա վերջին 25 տարում` անկախությունից ի վեր, միշտ էլ եղել են սոցիալական խնդիրներ: Ուրեմն պետք է ասեինք` մեզ անկախություն պետք չէ՞, Սովետը փլուզել պետք չէ՞ր: Կարծում եմ` սխալ մոտեցում է:

«ԴԵՄ ՔՎԵԱՐԿՈՂՆԵՐԻ ՔԱՆԱԿԸ 18 ՏՈԿՈՍ Է»

–«Ոչ»-ի ճակատին կհաջողվի՞ տապալել սահմանադրական բարեփոխումները:
– Ոչ, քանի որ ժողովրդի մեջ չկա այդքան դեմ, որ գնան ու դեմ քվեարկեն: Կան «դեմ»-եր, «այո» ասողներ ու կասկածողներ, որոնց հետ աշխատանք է տարվում: Որքան ես եմ հանդիպել, կատեգորիկ դեմ քվեարկողների քանակը 18 տոկոս է: Բայց կա 30 տոկոս չկողմնորոշված: Կհաջողվի ոչ-ին դեպի իրեն տանել 30 տոկոս չկողմնորոշվածներին, կստացվի ինչ-որ բան: Բայց կարծում եմ` չի ստացվի:
– 2016 թ.-ի բյուջեի նախագծի մասին տարբեր կարծիքներ կան: Ձեր գնահատականը ո՞րն է:
– Դժվար է լինելու, բայց պետք է առաջ գնալ, այլ տարբերակ չկա:
– Կա՞ն ոլորտներ, որտեղ հատկացումները նախորդ տարվա համեմատ պետք է ավելացվեին:
– Կարծում եմ` մեծ ուշադրություն պետք է դարձնել ՓՄՁ-ի զարգացմանը: Աշխատատեղ ապահովելու արդյունավետ ճանապարհը ՓՄՁ-ի զարգացումն է: Խոշոր գործարարների, հիմնարկների վրա հույսը դնելը անիմաստ է: Մյուս խնդիրը ԵՏՄ-ի հետ կապված` կա տենդենց` ավելի լավ պայմաններ ստեղծել, որպեսզի մեր գործարարների արտադրությունը ոչ միայն ունենա, այլեւ պահի: Կա հակառակ գործընթացը, որը պայմանավորված է ռուբլու արժեզրկմամբ, սակայն դրա դեմ պայքարել է պետք:
– Ընդդիմադիրներից մի քանիսի գնահատմամբ` 2016-ին բյուջեն յոլա գնալու բյուջե է:
– Յոլա գնալն էլ է լավ: Երբ հնարավորություն չի լինում ապրելու, յոլա գնալը դեռ լավ է:

ՍՈՆԱ ԴԱՎԹՅԱՆ