Ա. ՌՈՒՍՏԱՄՅԱՆ. «ՍԵՐԺ ՍԱՐԳՍՅԱՆԸ, ՏԵՍՆԵԼՈՎ «ՈՉ»- Ի ՊՐԻՄԻՏԻՎԻԶՄԸ, ՄԻ ՕՐ ԱՍՈՒՄ Է`ՄԱԾՈՒՆԸ ՍՊԻՏԱԿ Է»

Ա. ՌՈՒՍՏԱՄՅԱՆ. «ՍԵՐԺ ՍԱՐԳՍՅԱՆԸ, ՏԵՍՆԵԼՈՎ «ՈՉ»-

Ի ՊՐԻՄԻՏԻՎԻԶՄԸ, ՄԻ ՕՐ ԱՍՈՒՄ Է`ՄԱԾՈՒՆԸ ՍՊԻՏԱԿ

Է»

Սահմանադրական բարեփոխումներին դեմ  «Ոչ»-ի ճակատը դեկտեմբերի մեկին սկսում է քաղաքացիական անհնազանդություն: «Ոչ»-ի ճակատի անդամ Ժիրայր Սեֆիլյանը հայտարարել էր`տուն գնալ չկա: ՀՅԴ խմբակցության ղեկավար Արմեն Ռուստամյանից «Իրավունք»-ը պարզեց`  քաղաքացիական անհնազանդությունը օրինակա՞ն եւ իրավակա՞ն մեթոդ է` պայքարելու սահմանադրական բարեփոխումների դեմ:

«Ընդդիմությունը կարող է իր բոլոր հնարավորություններն օգտագործել, բայց դա պետք է օրենքի սահմաններում տեղավորվի: Պարզապես անհնազանդության կոչերը հիմք են, որ իշխանությունը մտածի` ինչ-որ բաներ են լինելու օրենքից դուրս:  Չենթարկվել պետական մարմիններին, օրենքին, դա էլ կարող է քաղաքացիական անհնազանդություն լինել»,- ասաց Արմեն Ռուստամյանը:

Ա. Ռուստամյանը չի բացառում`քաղաքացիական անհնազանդության մասին կոչերը գուցե հնչում են քարոզչական նպատակով. «Դեպքը պետք է կատարվի, որ նոր տրվի գնահատական: Միայն հայտարարություններով դժվար է ասել`դրանք հակաօրինական կլինեն, թե չէ»:

- Կարծիք կա, որ քաղաքացիական անհնազանդություն ասվածը մայդանային շունչ է պարունակում:

- Դե դա կա: «Ոչ»-ի ճակատը խուսափում է բովանդակային քննարկումից: Ի՞նչ է նշանակում դեկտեմբերի մեկից սկսել: Մինչեւ այդ չե՞ն էլ ուզում անդրադառնալ  նոր սահմանադրության բովանդակությանը…

- Մինչեւ դեկտեմբերի մեկը «Ոչ»-ի ճակատը կմոբիլիզանցի մարդկանց` փողոց հանելու համար...

- Դե մոբիլիզացնում են մարդկանց, որ «ոչ» ասեն իշխանությանը, ոչ թե սահմանադրությանը: Տրամաբանությունը, թե ինչու պետք է մարդիկ փողոց դուրս գան, պայքարեն, ենթադրում է բովանդային քննարկում: Ես վստահ եմ, սակայն, որ  դեկտեմբերի մեկին բովանդակային քննարկում չեն նախատեսում: Գալու են իրենց քաղաքական հայտարարությունն անեն ընդդեմ իշխանության: «Ոչ»-ն ունի պարզ եւ պրիմիտիվ տրամաբանություն` դեմ ենք նախաձեռնողին եւ նախաձեռնությանը: Սա նշանակում է`նախաձեռնությունը չեն քննարկում, այլ նախաձեռնողի անձը:

- Ընդդիմադիրներն ասում են, որ իրենք ինչքան հանդիպել են քաղաքացիների հետ, լսել են միայն «Ոչ»: «Այո» ասող  նոր սահմանադրությանը չկա:

- Ովքե՞ր են հանդիպել:

-Օրինակ Հեղինե Բիշարյանը, Արամ Մանուկյանը քաղաքացիների հետ հանդիպման ժամանակ  հիմնականում «ոչ» են լսել:

- Ես էլ ասում եմ` էնքա՜ն այո» կա, եկեք տանեմ ցույց տամ: Հո տենց ասելով չի: Ես էլ մարզեր գնում, ընդ որում` շուրջօրյա:

- Ո՞ր մարզն է  ավելի շատ «այո» ասում:

- Դե պասիվություններ կան` կան մարզեր, որոնք լավ իրազեկված չեն:  «Այո»-ի մասով մարտավարական առումով չեմ ուզում հիմա ոչինչ ասել: Ավելի շատ կան չկողմնորոշվածներ: Մի մեծ մասը հանրության  «այո» կամ «ոչ»  է ասում` այս կամ այն քաղաքական ուժին կամ անձին վստահելով, քանի որ դժվար է մոտ 200 հոդված կարդալ:  Բայց ինքը հավատում է քո մեկնաբանություններին: Իսկ ես տեր եմ իմ մեկնաբանություններին, մինչեւ հիմա էլ հակառակը չեմ փաստել:

- Դուք տեր եք Ձեր մեկնաբանություններին, մնացածնել էր ասեն, որ հնազա՞նդ են...

- Մնացածներն էլ իրենց ասածներին պետք է տեր լինեն: Տեքստից չկտրված չմեկնաբանեն: «Ոչ»-ն ասում է՝ դեմ եմ Սերժ Սարգսյանին, քանի որ ինքն է  նախաձեռնել: Ինչն էլ նա նախաձեռնի, դեմ եմ: Դե Սերժ Սարգսյանն էլ, տեսնելով «Ոչ»-ի պրիմիտիվիզմը, օրերից մի օր ասում է` մածունը սպիտակ է, դուք բոլորդ ասելու եք` մածունը սեւ է, որովհետեւ Սերժ Սարգսյանն  է ասել` մածունը սպիտակ է:

ՍՈՆԱ ԴԱՎԹՅԱՆ