Սահմանադրական փոփոխությունների քարոզչությունը չպետք է վերածվի հակամարտության. Հ. Բաբուխանյան

ՍԱՀՄԱՆԱԴՐԱԿԱՆ ՓՈՓՈԽՈՒԹՅՈՒՆՆԵՐԻ ՔԱՐՈԶՉՈՒԹՅՈՒՆԸ ՉՊԵՏՔ Է ՎԵՐԱԾԵԼ ՀԱԿԱՄԱՐՏՈՒԹՅԱՆ

Ինչպես գրում է armenpress.am-ը «Սահմանադրական իրավունք միություն» կուսակցության Սահմանադրական փոփոխությունների հանրաքվեի քարոզարշավի շտաբը իր գործողությունները համակարգում է «Հանրապետական» կուսակցության «Այո»-ի շտաբի հետ:

«Արմենպրես»-ի հետ զրույցում` հայտնեց Ազգային ժողովի «Հանրապետական» խմբակցության պատգամավոր, «Սահմանադրական իրավունք միություն» կուսակցության նախագահ Հայկ Բաբուխանյանը:

«Մենք քարոզելու ենք, որ մեր բնակչությունը դեկտեմբերի 6-ին «այո» ասի Սահմանադրական փոփոխություններին: «ՍԻՄ» կուսակցության Սահմանադրական փոփոխությունների քարոզարշավի շտաբը, որը ղեկավարում է կուսակցության փոխնախագահ Արտակ Գրիգորյանը, Հայաստանի բոլոր մարզերում ունի իր բաժանմունքները»,-նշեց նա։

Պատգամավորը նաև նշեց, որ Սահմանադրական փոփոխությունների քարոզչությունը առաջարկություն է, տեսլական է մեր ժողովրդի ապագայի վերաբերյալ, որը ոչ մի դեպքում չպետք է վերածվի «այո»-ի և «ոչ»-ի կողմնակիցների հակամարտության:

Անդրադառնալով «ոչ»-ի ճակատի գործողություններին` Հայկ Բաբուխանյանն ասաց հետևյալը. «Ես կցանկանայի, որ սահմանադրական փոփոխությունների քարոզարշավի ընթացքում մեր ընդդիմախոսները ներկայացնեին հիմնավորված փաստարկներ: Մենք համոզված ենք, որ երկու կողմերի միջև պետք է ծավալվի առարկայական և փաստարկված բանավեճ»:

Հիշեցնենք, որ սահմանադրական բարեփոխումների հանրաքվեն նախատեսված է
2015թ. դեկտեմբերի 6-ին։ Ազգային ժողովի երկու խոշոր ուժերը` «Հանրապետական» և «Բարգավաճ Հայաստան» խմբակցություններն աջակցում են փոփոխությունների անցկացմանը։ Սահմանադրական փոփոխություններին կողմ է նաև «Հայ Յեղափոխական Դաշնակցություն» խմբակցությունը: Փոփոխություններին դեմ են հանդես եկել «Ժառանգություն», «Հայ ազգային կոնգրես» և «Օրինաց երկիր» խմբակցությունները: