Ինչ է քննարկել Ամենայն Հայոց Կաթողիկոսը Արարատյան Հայրապետական թեմի հոգեւոր դասի հետ
Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում սեպտեմբերի 3-ին եւ 4-ին հյուրընկալեց Արարատյան Հայրապետական թեմի քաղաքամայր Երեւանի եւ Արարատի մարզի հոգեւոր տեսչության հոգեւոր սպասավորներին` գլխավորությամբ Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի եւ Արարատի մարզի հոգեւոր տեսուչ Գերաշնորհ Տ. Գեւորգ եպիսկոպոս Սարոյանի:
Հանդիպումներին Հանրակրթության պետական չափորոշչի եւ առարկայական չափորոշիչների նախագծերի, դրանցում առկա խնդիրների եւ հնչեցված մտահոգությունների շուրջ զեկույց ներկայացրեց Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Հոգեշնորհ Տ․ Զաքարիա ծայրագույն վարդապետ Բաղումյանը՝ անդրադառնալով նաեւ «Հայոց Եկեղեցու պատմություն» առարկայի շուրջ ստեղծված կացությանը։
Ծավալուն քննարկման ընթացքում քահանա հայրերն իրենց համայնքների անունից մտահոգությունն արտահայտեցին կրթական բարեփոխումների իրականացմանը միտված փաստաթղթերի մշակման գործընթացի, մտավորականների եւ գիտակրթական հաստատությունների կողմից բարձրաձայնված խնդիրների եւ ակնկալվող վերջնարդյունքների առնչությամբ՝ կարեւոր նկատելով ազգային նկարագրով, հոգեւոր-ազգային արժեհամակարգով ամուր հայորդու, ՀՀ քաղաքացու ձեւավորումը։
Անընդունելի նկատվեց նաեւ «Հայոց Եկեղեցու պատմություն» առարկայի առնչությամբ ԿԳՄՍ նախարարության որդեգրած մոտեցումը, որի հետեւանքով այլ առարկաների մեջ տարրալուծման ճանապարհով դուրս է մղվում ուսուցանվող առարկայի ուսումնական նյութի գերակշիռ մասը, աղճատվում առարկայի նպատակն ու առաքելությունը՝ կերտելու հայ ինքնությունը եւ ամբողջապես հաղորդ դարձնելու աշակերտներին Հայոց Եկեղեցուն, նրա դավանանքին, տոնածիսական համակարգին, խորհուրդներին, քրիստոնեական ու ազգային արժեհամակարգի հիմնարար սկզբունքներին եւ քրիստոնեական բարոյագիտությանը:
Կարեւորելով Եկեղեցու առաքելությունը քրիստոնեական-ազգային արժեհամակարգի կերտման ու պահպանման գործում, նրա կրթադաստիարակչական գործունեությունը եւ հովվական աշխատանքում սերտ կապն ուսումնական հաստատությունների հետ՝ հոգեւոր սպասավորները մտահոգիչ նկատեցին վերջին ժամանակներում դպրոցներում եւ կրթական այլ հաստատություններում անցկացվող ազգային-եկեղեցական տոներին նվիրված միջոցառումներին հոգեւորականների ներգրավման եւ մասնակցության հարցում տնօրինությունների կողմից դրսեւորվող զգուշավոր եւ մերժողական կեցվածքը:
«Կենսաբանություն» առարկայի պետական առարկայական չափորոշչում Էվոլյուցիոն տեսության եւ առարկայական չափորոշիչների նախագծերում սեռական դաստիարակությանը վերաբերվող թեմաների մասին զեկույց ներկայացրեց Դիվանատան եկեղեցական-ժողովական գրասենյակի պատասխանատու Արժանապատիվ Տ. Տիգրան քահանա Բադիրյանը` մասնավորաբար անդրադառնալով այդ կապակցությամբ կյանքի եւ ընտանիքի սրբության հասկացություններին: Համացանցային գրագիտության եւ հոգեւոր քարոզչության նպատակով սոցիալական ցանցերի արդյունավետ գործածության հնարավորությունների մասին զեկույցով հանդես եկավ Համացանցային ծառայությունների գրասենյակի տնօրեն Արժանապատիվ Տ. Համբարձում քահանա Դանիելյանը:
Նկատի ունենալով տեղեկատվական տեխնոլոգիաների եւ սոցցանցերի հսկայական ազդեցությունը հասարակության կյանքում` ներկայացված նյութի շուրջ քննարկումներում կարևորվեց հոգեւոր հովիվների կողմից այդ միջոցների ծառայեցումը հոգևոր արժեքների սերմանման եւ թեմական ու հովվական աշխատանքի լուսաբանման գործին:
Սոցցանցերում գռեհկաբանության, գործածվող լեզվի եւ տիրող անհանդուրժողողական մթնոլորտի վերացման հարցում կարեւորվեց նաեւ հոգեւոր սպասավորների ակտիվությունը եւ հետեւողական աշխատանքը:
Զրույցի ընթացքում Ամենայն Հայոց Կաթողիկոսը հանգամանորեն անդրադարձավ քահանա հայրերի բարձրաձայնած հարցերին, որոնք վերաբերում էին հովվական ծառայությանը, Եկեղեցու կրթադաստիարակչական եւ սոցիալական առաքելությանը, համավարակի շրջանում առկա դժվարությունների հաղթահարմանը, ազգային եւ հայրենական կյանքը հուզող զանազան խնդիրների առնչությամբ Եկեղեցու որդեգրած դիրքորոշումներին:
Վերջում Հայոց Հովվապետն իր հայրական օրհնությունը փոխանցեց քահանա հայրերին` հորդորելով ակտիվ, նախանձախնդիր եւ համարձակ լինել հովվական ծառայության մեջ՝ նպաստելով Եկեղեցու առաքելության առավել արդյունավորմանը։ Ամենայն Հայոց Կաթողիկոսն ընդգծեց, որ Հայոց Եկեղեցու առաքելությունը բոլոր ժամանակներում եղել է սպասավորությունը հայ ժողովրդին` հանուն նրա հոգեւոր զորացման, ազգային ինքնության պահպանման, ազգային նվիրական իղձերի իրականացման եւ հայրենիքի անկախ ու խաղաղ կյանքի կերտման: