«Մսամթերքի եւ խմիչքների շուկայում առկա է 15 տոկոս գնաճ»

Մեզ հետ զրույցում, անդրադառնալով երկրում առկա նախատոնական գնաճին, «Իրազեկ եւ պաշտպանված» սպառող ՀԿ նախագահ Բաբկեն Պիպոյանը տեղեկացրեց, որ իրականացնում են ուսումնասիրություններ: Սակայն, ըստ նրա, արդեն իսկ ֆիքսել են մի շարք ապրանքատեսակների թանկացում.

«Տեղական խնձորը, լոլիկը ակնհայտ թանկացած է

- Հայաստանում Նոր տարվա նախաշեմին ունենք ակնհայտ գնաճ, առաջնային ապրանքների մի մասը թանկացել է մոտ 15%-ով: Հիմնականում այն ապրանքները, որոնք 15%-ով չեն թանկացել, ընդհանուր գումարի մեջ ցածր տեսակարար կշիռ են կազմում: Այսինքն՝ ամանորյա ծախսերին բաժին հասնող ապրանքատեսակների թանկացումը եղել է շատ ավելի բարձր տոկոսով: Այս պահին էլ մոնիտորինգը դեռ ընթացքի մեջ է, բայց հստակ է, որ նախորդ տարիների համեմատ կա ամանորյա սեղանի հետ խիստ առնչվող ապրանքների գնաճ՝ շուրջ 15 տոկոսով:
- Կոնկրետ ո՞ր ապրանքների մասին է խոսքը:
- Քանի որ ամանորյա գնումների մեջ մեծ տեսակարար կշիռը կազմում է թե՛ վերամշակում անցած, թե՛ վերամշակում չանցած մսամթերքը եւ խմիչքները, կարող եմ վստահորեն փաստել, որ այս շուկաներում առկա է 15 տոկո գնաճ: Մնացած ապրանքների թանկացման մասով մոնիթորինգը կավարտենք մի քանի օրից:
Օրինակ, ունենք պտուղ-բանջարեղենի շուկայում գնաճ: Եվ այստեղ ուշագրավն այն է, որ թեպետ բանանի, արքայախնձորի գները այս տարի՝ նախորդ տարիների համեմատ նվազել են, բայց տեղական խնձորը, լոլիկը ակնհայտ թանկացած է:
Այն, որ մեր տեղական գյուղմթերքը, պտուղ-բանջարեղենը թանկ է, քան դրսից ներկրվածը, խոսում է գյուղատնտեսության ոլորտի բարձիթողի վիճակի մասին: Մենք լուրջ գյուղատնտեսություն չունենք, ինչից էլ օգտվում է անհատ ձեռնարկատերը, ֆերմերը: Նրանք իրենց ապրանքը վաճառում են այն գնով, ինչով որ իրենց ձեռնտու է: Սրա այլընտրանքը կլիներ միայն այն դեպքում, եթե մենք ունենայինք լուրջ գյուղատնտեսություն, եթե ֆերմերային տնտեսությունների եւ ջերմոցային տնտեսությունների համար կոնկրետ գին սահմանվեր, այդ դեպքում անհատ ֆերմերը այսօր շուկայի գին թելադրող չէր լինի: Բայց այս ոլորտը գտնվում է բարձիթողի վիճակում, չկան սահմանված տեղական ապրանքների իրատեսական գներ, որեւէ մեկը չգիտի՝ մեր երկրում ինչ արժե մեկ կիլոգրամ լոլիկը, խնձորը, կամ մեկ լիտր կաթը: Գոնե ինքնարժեքի տեսքով, որ դրանից ելնելով, հնարավոր լիներ ռեալ գների մասին կարծիք ստանալ:

Թանկացել են ոչ միայն ամանորյա ապրանքները

- Խոսեցիք ամանորյա նշանակության ապրանքատեսակներից: Դրանց թանկացումը կապված է միայն տոնական սեղանների ընձեռած հնարավորության հե՞տ: Այսինքն, ի՞նչ վիճակ է այն ապրանքատեսակների մասով, որոնք ամանորյա սեղաններին էական դեր չունեն, եւ չկա դրանց պահանջարկի աճ:
- Ասվածը չի նշանակում, որ մենք մնացած ուղղություններում ներկա պահին գնաճ չունենք: Տեսեք, որպես օրինակ վերցնենք կարագը, որը նախորդ տարվա համեմատ հարյուր տոկոսով թանկացել է, սակայն այն ամանորյա սեղանի վրա էական ազդեցություն չի ունենում: Բայց փոխարենը, կարագի եւ դրա թանկացման ազդեցությունն առօրյա կենցաղում էական է: Ոչ շատ էական, բայց գնաճ ունենք քաղցրավենիքի եւ պահածոների շուկայում: Բայց քանի որ տոկոսային համեմատություններ դեռ չենք արել, այս պահին զերծ կմնամ սիրողական մեկնաբանություններ անելուց:
ԻԼՈՆԱ ԱԶԱՐՅԱՆ
 

Այս թեմայով Հայտնի փաստաբանը հայտարարութրամբ է հանդես եկել Վերաֆինանսավորման տոկոսադրույքը թողնվել է անփոփոխ՝ 6.75 տոկոս Տարադրամի շուկայում ինչ փոխարժեքներ են սահմանվել մայիսի 4-ի համար Ֆիննական շոգեբաղնիք, ճապոնական չան. ԲԱՑԱՏ հանգստյան գոտին Ձեզ է սպասում ՀՐԱՏԱՊ. Շուկայում 20 հոգի վիրավորվել է, 7 հոգի մահացել. ինչ է կատարվել