Տեղի է ունեցել ֆրանսահայերի պատմության ամենախայտառակ ճաշկերույթը

Ֆրանսիայում մարտի 20-ին տեղի է ունեցել ֆրանսահայ կազմակերպությունների համակարգող խորհրդի ավանդական ճաշկերույթը, որին, որպես կանոն, մշտապես մասնակցել են Ֆրանսիայի կառավարության բարձրաստիճան ներկայացուցիչները՝ նախագահի գլխավորությամբ: Սակայն, այս անգամ Ֆրանսիայի նախագահ Էմանուել Մակրոնը չի մասնակցել, իսկ մնացյալ հյուրերի հետ կապված խնդիրներ են ծագել: «Իրավունք»-ի հետ զրույցում ֆրանսահայ ռազմական եւ հետաքննող լրագրող ԼԵՈ ՆԻԿՈԼՅԱՆՆ ասաց, որ տեղի է ունեցել ֆրանսահայերի պատմության ամենախայտառակ ճաշկերույթը:

— Ձեր գնահատմամբ՝ ինչո՞ւ Ֆրանսիայի նախագահն այս անգամ չմասնակցեց հայերի կազմակերպած ճաշկերույթին:

— Նախ ասեմ, որ տարին մեկ անգամ ճաշկերույթ կազմակերպելու եւ Ֆրանսիայի կառավարության բարձրաստիճան ներկայացուցիչներին եւ նախագահին հրավիրելու մտահղացումը եղել է իմը դեռ տարիներ առաջ: Հրեաների կազմակերպությունը նման ճաշկերույթներ անում էր, իսկ մենք միայն ցույցեր էինք անում: Իմ այս միտքը հավանեցին ու սկսեցին կազմակերպել ճաշկերույթներ՝ սկսած Ֆրանսիայի այն ժամանակվա նախագահ Ֆրանսուա Օլանդից: Ճաշկերույթներին գալիս էին նաեւ Փարիզի քաղաքապետը, տարբեր քաղաքապետեր, նախարարներ, պատգամավորներ: Սակայն, էմանուել Մակրոնն այս անգամ չեկավ եւ որոշել է, որ իր կապը հայերի հետ կլինի միայն Հայաստանի կառավարության միջոցով, այսինքն՝ Նիկոլ Փաշինյանի հետ: Չէ որ իշխանափոխությունից հետո Հայաստանում տեղի ունեցած Ֆրանկոֆոնիայի օրերին Մակրոնը եկավ Հայաստան ու քոչարի էր պարում Փաշինյանի հետ: Թեպետ Ֆրանկոֆոնիայի միջոցառումների նախապատրաստական աշխտաանքներն ամբողջությամբ իրականացրել էր Սերժ Սարգսյանը եւ իր կառավարությունը, բայց այն հայտնվեց Նիկոլ Փաշինյանի ձեռքի տակ: Բացի այդ, այս անգամ ճաշկերույթին չմասնակցելը պայմանավորված է նրանով, որ Էմանուել Մակրոնը նախորդ հավաքույթից վատ հիշողություններ ունի: Նրան հայերն անհարմար հարցեր են տվել Արցախի մասին, մինչդեռ նա ասում է, որ Արցախը չի ճանաչում, չի էլ ուզում ճանաչել, նա անգամ Հայաստանը չի ուզում ճանաչել: Իհարկե, պարզ է, որ ժողովրդի համար մի քանի մշակութային նախաձեռնություններով հանդես կգա, բայց նա ճանաչում է Ադրբեջանի տարածքային ամբողջականությունը, որի մեջ մտնում է Արցախը: Սա է եղել պատճառը, որ Էմանուել Մակրոնին քիչ է մնացել նույնիսկ հայհոյեն, իսկ նա դիմելով Մուրադ Փափազյանին, ասել է՝ մի մոռացեք, որ դուք մի կազմակերպության փոխնախագահ եք եւ խոսում եք Ֆրանսիայի նախագահի հետ: Դրանից հետո Մակրոնը որոշել է էլ ոչ մի ճաշկերույթի չգնալ, ընդ որում՝ ոչ միայն հայերի, այլեւ մուսուլմանների կողմից կազմակերպված: Նա միայն մասնակցում է հրեաների կազմակերպած ճաշկերույթներին, քանի որ նրանց լոբբին իսկապես շատ ուժեղ է: Անգամ նրանց Ամանորը նշել են Ելիսեյան պալատում, օրեր առաջ էլ իրենց կազմակերպության 80-ամյակն են տոնել այնտեղ՝ Մակրոնի մասնակցությամբ: Իսկ հայերին Ֆրանսիայի նախագահը բանի տեղ չի դնում:

— Իսկ ովքե՞ր են ներկայացված եղել ճաշկերույթին Ֆրանսիայի կառավարությունից եւ սենատից:

— Այս տարի Ֆրանսիայի կառավարությունից ներկա էր Գաբրիել Աթալը, որը Ֆրանսիայի վարչապետն է եւ նաեւ Մակրոնի սիրածն է: Ի դեպ, նույն վարչապետը եղել է ամուսնացած Ֆրանսիայի այսօրվա արտաքին գործերի նախարար Ստեֆան Սեժուրնեի հետ: Այո՛, մի զարմացեք, Ֆրանսիայում ընդունված է համասեռամոլների ամուսնությունը: Իսկ Ֆրանսիայի մշակույթի նախարարին չեն էլ հրավիրել, ինչը մեծ սխալ է: Նրան հայերը մեղադրում են, որ պրոադրբեջանական գործունեություն է իրականացնում: Թեպետ նա ինչ-որ ժամանակ եղել է Ալիեւի ընտանիքի հետ մտերիմ, բայց սա հին պատմություն է, որը չեն մոռանում: Իսկ իրականում նրան չհրավիրելու պատճառն այն է, որ եղել է Փարիզի քաղաքապետ Անն Իդալգոյին դեմ, իսկ վերջինս Ֆրանսիայի հայկական կազմակերպությունների համակարգող խորհրդի (CCAF) համանախագահ Մուրադ Փափազյանի ընկերուհին է: Ամեն դեպքում, չի կարելի ամբողջ կառավարությանը հրավիրել, իսկ նրանցից մեկին ասել՝ դու հրավիրված չես, թքեմ քո երեսին: Ինչպես գիտեք, շուտով Եվրախորհրդարանի ընտրություններն են, եւ Ֆրանսիայի սենատում Մակրոնի դեմ ամենաուժեղ ընդդիմությունը Ֆրանսիայի Ազգային ճակատի նախագահ Մարին Լը Պենն է, որն ունի 100-ից ավելի պատգամավոր, եւ  կա ձախակողմյան քաղաքական գործիչ Ժան-Լյուկ Մելանշոն, որը եւս ունի մոտ 100 պատգամավոր: Այսպիսով վերոնշյալ ճաշկերույթին որոշել են նրանց եւս հրավիրել՝ հաշվի առնելով, որ ժողովրդի ինչ-որ հատվածի են ներկայացնում: Բայց հրավիրատոմսերն ուղարկելուց եւ նրանց մասնակցության համաձայնությունը ստանալուց հետո՝ խնդիր է ծագել, թե պետք է միայն դեմոկրատները գան, այլ ոչ թե աջակողմյան ու ձախակողմյան քաղաքական ուժերի ներկայացուցիչները: Եվ ստիպված են եղել զանգահարել ու ասել, թե միտքներս փոխել ենք, էլ հրավիրված չեք, մի եկեք: Խայտառակ վիճակ, ամոթ էլ է: Նույնն է, թե մեկին հրավիրես ծնունդի կամ հարսանիքի, բայց մի օր առաջ զանգես եւ ասես՝ ռադդ քաշիր, էլ չեմ ուզում գաս: Ի դեպ, Մարսելի հայերը բոյկոտել են այդ ճաշկերույթը, քանի որ դեմ են դուրս եկել Մուրադ Փափազյանին, թե ինչ իրավունքով ես հայհոյել Փաշինյանին՝ Մակրոնի առջեւ: Լուրջ ներքին խնդիրներ կան հայերի շրջանում:

ՀՐԱՆՏ ՍԱՐԱՖՅԱՆ

Այս թեմայով Գերմանիան արագորեն պատրաստվում է Ռուսաստանի հետ հնարավոր պատերազմի. Բեռլինում ՌԴ դեսպան Հայաստանի և Ֆրանսիայի միջև ստորագրված ռազմավարական գործընկերության մասին հռչակագիրը Մակրոնը ժամանեց Երեւան Օնիկ Գասպարյանը երեւի «մոռացել» է, որ նիկոլյան ԱԺ-ն արդեն ուսումնասիրել է 44-օրյա պատերազմի թեման եւ արդյունքները թաքցրել ՌԴ դեսպանը հետաքրքրվել է առաջիկա համապետական ընտրությունների նախապատրաստական ընթացքից