Երկու ձեռքով կողմ եմ ՊԵԿ-ի կողմից առաջարկած փոփոխություններին․ Տնտեսագիտության պրոֆեսոր Վարդան Բոստանջյանը «Խոպանչիներին հարկելու մասին» աղմկահարույց օրենքի մասին

Բյուջեն լցնելու ոչ խելամիտ քա՞յլ, թե՞ աշխատանքային միգրացիան կանոնակարգելու հեռանկար ու նպատակ։ «Եկամտահարկի մասին» և «Շահութահարկի մասին» օրենքներում կատարվելիք փոփոխությունները բուռն քննարկումների առանցքում են հայտնվել: Տնտեսագետները, գործատուները, արտագնա աշխատանքի մեկնողներն  ու օրենսդրական նախագծի հեղինակները նույն օրինագծի մասին խիստ տարբեր ու հակասական կարծիքներ ունեն:

Որքանո՞վ է խելամիտ հարկել Հայաստանից դուրս աշխատող մարդուն, անգամ եթե նա Հայաստանի Հանրապետության քաղաքացի է: Այս հարցի շուրջ քննարկումները խորհրդարանի շրջանակներից դուրս են եկել ու hայտնվել արդեն աշխատողների ու գործատուների, տնտեսագետների ու քաղաքագետների մտահոգության կենտրոնում: Տնտեսագիտության դոկտոր-պրոֆեսոր Վարդան Բոստանջյանը անդրադառնալով վերը նշվածին <<Իրավունքի>> հետ զրույցում նախ նկատեց․

-Դուք գիտեք իմ տեսակետը այս իշխանությունների վարած քաղաքականության վերաբերյալ, մեկ խոսքով նշեմ, ունեմ ընդգծված բացասական վերաբերմունքը նրանց վարած քաղաքականության վերաբերյալ։ Բայց տվյալ պարագայում թե՛ իրավաբանական, թե՛ ֆիզիկական անձանց պարտավորությունների պատշաճ կատարումը ուղղակի անհրաժեշտ է։ Տվյալ պարագայում սա շատ ճիշտ է, ես սա ասում եմ, որպես տնտեսագետ, շատ կուզեի հավանություն չտալ, բայց չեմ կարող։ Եթե արտագնա աշխատող հարկ է վճարում այլ երկրում, ապա իր երկրում եւս պարտավոր է տարբերությունը վճարել։ Կամ եթե ինքը դեռեւս հանդիսանում է ՀՀ քաղաքացի, բայց այնտեղ քաղաքացիություն չի ստացել ու գրանցված չէ, որպես հարկատու, կրկին պարտավոր է հարկ վճարել։ Որովհետեւ այստեղ է գտնվում է նրա ընտանիքը, նրա երեխային դասավանդող ուսուցիչը այդ հարկերից  է աշխատավարձ ստանում, նրա մայրը այդ հարկերից ստացվող գոմարներով է առողջապահական անվճար օգնություն ստանում եւ այլն։ Փախնել պատճաշ եւ իրական հարկերից ուղղակի չի կարելի, այնպես որ ես երկու ձեռքով կողմ եմ ՊԵԿ-ի կողմից առաջարկած փոփոխություններին։