Սա տհասության եւ տխմարության գագաթնակետն է, սակուրան հարմարեցված չէ Երեւանին. Ադամյան

Արդեն մի քանի օր է՝ ակտիվ քննարկվում են Երեւանում իրականացվող ծառահատումները: Պատկան մարմիններից նշում են, թե ծառերը ծեր են, դրանց փոխարեն կտնկվեն ճապոնական սակուրաներ: Ի դեպ, մինչ այդ խոսակցություն էր շրջանառվում, թե թեղիների փոխարեն կտնկվեն սոսիներ, թխկիներ եւ կաղնիներ: Բայց պատկերն այսօր բոլորովին այլ է: Չնայած գեղեցկությանը ու էսթետիկ հաճույքին՝ այստեղ առկա է մեծ խնդիր, որի մասին պատկան մարմինները լռում են: Բնապահպանները բազմիցս խոսել են այն մասին, որ Երեւան քաղաքում փոշու առկայությունը բավականին բարձր սանդղակում է, ուստի՝ բուսականությունը եւ ծառերը, որոնք ֆիլտրի դեր են ստանձնում, բավականին կարեւոր նշանակություն ունեն:

«Իրավունքի» հետ զրույցում բնապահպան ՍԻԼՎԱ ԱԴԱՄՅԱՆԸ նշել է, որ սա հրեշավոր ծրագիր է: Նա կարծում է, թե ծեր ծառերը պարզապես կփոխարինվեն այնպիսի ծառերով, որոնք օգուտ կբերեն շրջակա միջավայրին եւ բնորոշ կլինեն Երեւան քաղաքին:

«Երեւանը նախկինում եղել է ամբողջը քար ու անապատ:Մարդիկ, այդ թվում՝ հայրս, գիտական ուսումնասիրություն են արել, թե որ մասում ինչպիսի ծառեր պետք է տնկեն, ինչ պիտի անեն, որպեսզի մեղմեն կիսաանապատային, տափաստանային կլիման, որ մարդիկ կարողանան պատշաճ կերպով ապրեն քաղաքում: Մեզ մոտ արեւը շատ է, եւ քաղաքաշինության անկառավարելի, անգրագետ ծրագրերի պատճառով մենք կանգնել ենք էկոլոգիական աղետի առաջ, եւ այդ անգրագետ ծրագրերը շարունակվում են, որոնք շրջակա միջավայրը ապականում են»,- նշել է Ադամյանը ու հավելել, որ երկրի ղեկավարները եկել ու նորից ուզում են ապականել քաղաքը, ու դա անում են անգրագետ ձեւով:

«Այն ժամանակ էլ էր այսպես, պարզապես, նախկինում, երբ ծառը ծերանում էր, տեղը տնկվում էր նույն ծառից, օրինակ, եթե կտրում, հանում էին բարդի, տեղը հենց բարդի էր տնկվում: 2000 ծառ պիտի հատվի, ու տեղը տնկվի սակուրաներ, սա տգիտության, տհասության եւ տխմարության գագաթնակետն է, ես էլ ուրիշ բառ չեմ գտնում այս ամենի համար: Սակուրան բալենի է, բայց տիպիկ բալենի չէ Հայաստանի ու մասնավորապես՝ Երեւանի համար, այն հարմարեցված է Ճապոնիայի կլիմայի համար, այն ՀՀ-ի հետ կապ չունի»,- պնդում է բնապահպանը:

Ըստ տիկին Ադամյանի՝ այն ծառերը, որոնք ունեին հաստ բներ, փչակներ եւ բավականին սաղարթաշատ էին, զով էին պահում մայթերը, նպաստում էին օդի մաքրմանը, ե՛ւ կաղնիներ կան, ե՛ւ հացենիներ, որոնք շատ մեծ նշանակություն ունեն շրջակա միջավայրի առողջության համար:

«Տապի ժամանակ, երբ արեւը վառում է, մարդիկ այդ ծառերի շնորհիվ կարողանում էին քաղաքում քայլել, իսկ սակուրայի վերեւի մասը խիտ չէ, ճյուղերը շատ չեն, ու չի կարողանա ապահովել այն թթվածինը, այն շուքը ճանապարհների վրա, ինչպես դա կանեին 50 տարվա հացենիները, նրանք հանցագործներ են, կգա ժամանակ, որ իրենք կդատվեն»,- ընդգծել է Ադամյանն ու հավելել, որ սակուրան ոչ մի կողմից մեր քաղաքին օգուտ չի տա, բացի վնասից:

«Քաղաքի կենսաբազմազանությունը մի շղթա է: Բավական չէ, որ սակուրան չի ապահովելու օդի մաքրությունը, կլիմայական փոփոխությունների բացասական պահերը չի վերացնելու, մարդկանց առողջությանը չի նպաստելու, դրա հետ մեկտեղ մենք ունենալու ենք լուրջ խնդիրներ Երեւան քաղաքի կենսաբազմազանության փոփոխության հետ, որը աշխարհում հայտնի է. երբ տիպիկ կենսաբազմազանությունը փոխում ես արհեստականորեն, դա բերում է էկոլոգիական շատ մեծ աղետի, այդպես եղավ Չինաստանում, Միացյալ Նահանգներում, Բրիտանիայում: Օրինակ՝ թռչունները չեն կարող այնտեղ բույն դնել ու ապրել: Ես այստեղ կոռուպցիոն ռիսկեր եմ տեսնում: Մեծ քանակությամբ ծառեր են բերվել, լավ գումարներ են լվացվել: Ես ուզում եմ հասկանալ՝ ինչպե՞ս են մտածել, ինչպե՞ս կարելի է 2000 հացենի, կաղնի հատել, որոնք մարդիկ տարիներ շարունակ պահել են, որպեսզի կարողանանք օդ շնչել: 50 տարեկան ծառը ծեր չէ»,- շեշտել է բնապահպանը ու օրինակ բերել, թե աշխարհում կան ծառեր, որոնք 100 կամ 200 տարեկան են ու հատուկ պաշտպանվում են պետության կողմից:

Ս. ԱՍԱՏՐՅԱՆ

Այս թեմայով Շնորհակալ ենք, սիրելի՛ հայուհի, այդքան մերը լինելու համար. Սիլվա Կապուտիկյանը կդառնար 105 տարեկան 2024 թվականն ավելի ծանր է լինելու. Ազատ Ադամյան Ո՞ւմ պատվիրով եւ ո՞ւր են տանում ՌԴ-ին հիմնական թշնամի համարող իշխանությունները եւ նմանատիպ հռետորաբանությամբ հանդես եկող «ընդդիմությունը». Ադամյան Հայաստանն Արեւմուտք-Ռուսաստան հակամարտության համատեքստում. նոյեմբերի 9-ը եւ դրանից հետո, ինչո՞ւ եւ ի՞նչ եղավ Արցախում «Հայաստանը` Թուրքիային, Արցախն` Ադրբեջանին». սա է եղել Արեւմուտքի պլանը «թավշյա հեղափոխությունից» մինչեւ վերջերս. Ադամյան