«5-6 ոլորտների համար մի նախարարը չի կարող ինքնուրույն քաղաքականություն մշակել» (Տեսանյութ)

Շաբաթներ առաջ Հայաստանի որոշ մարզերում ու Երեւանում ֆորսմաժորային իրավիճակ էր, քանի որ մի քանի ժամով տեղի ունեցան համատարած հոսանքազրկումներ եւ հոսանքի տատանումներ: Հայտարարվեց, որ երկրի էներգետիկ համակարգում վթար է տեղի ունեցել, դրա հետեւանքով սկզբում անջատվել է Հրազդանի ՋԷԿ-ի 5-րդ բլոկը, ապա Երեւանի ՋԷԿ-ն ու ավելի փոքր կայաններ: Ավելի ուշ վարչապետ Նիկոլ Փաշինյանն ասաց, թե էլեկտրաէներգիայի խափանման պատճառների վարկածները երկուսն են, երկուսն էլ` արտաքին, ներքին պատճառ չկա: ԱԱԾ տնօրեն Արթուր Վանեցյանն էլ տեղեկացրեց, որ ԱԱԾ-ն քննություն է սկսել` պարզելու Հայաստանի էլեկտրաէներգետիկ համակարգի խափանման պատճառները: Թե ինչ հաջողվեց պարզել, այդպես էլ ձեն-ձուն չկա ո՛չ ԱԱԾ հետաքննությունից, ո՛չ էլ վարչապետի վարկածներից: Այդուհանդերձ, ինչ էր տեղի ունեցել իրականում, «Իրավունքը» պարզեց ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահ ՄԻՔԱՅԵԼ ՄԵԼՔՈՒՄՅԱՆԻՑ:

- Բնականաբար, վերջին փորձաքննության արդյունքներից տեղյակ չեմ, բայց խնդիրն իհարկե, կապված էր Իրանի Իսլամական Հանրապետությունում լարումների, տատանումների հետ: Ինչպես գիտեք, մեր համակարգն այս պահին գործող հզորությամբ` միացված է Իրանի համակարգին: Մենք Իրանից ստանում ենք գազ` մոտավորապես օրական 1.5 մլն խորանարդ մետր (նախկինում մեկ է եղել) եւ տալիս ենք էլեկտրաէներգիա` 1 խորանարդի դիմաց` 3 կվտ/Ժ: Այդ մեծ տատանումները հանգեցրին նրան, որ էլեկտրաէներգիա մատակարարող Հրազդանի ՋԵԿ-ը շարքից դուրս եկավ, քանի որ այդ պահին` հունիսի 1-ից ատոմակայանը կանգնած էր, ու դեֆիցիտ առաջացավ պահանջարկի եւ առաջարկի միջեւ: Իսկ եթե այդ դեֆիցիտն առաջանում է, պետք է անջատվի, որ վերականգնվի: Հետագայում Երեւանի ջերմային էլեկտրակայանը շարքից դուրս եկավ: Իհարկե, մի քանի ժամում այն վերականգնվեց, բայց սա խոսում է էներգետիկ անվտանգության խնդրի մասին: Ընդ որում` պետք է ասեմ, որ շարքից դուրս չեկան հատկապես փոքր ՀԵԿ-երը: Ամեն դեպքում, սա խոսում է այն մասին, որ մենք խնդիր ունենք այստեղ, եւ այստեղ դեռ քննարկելու հարցեր կան: Ի վերջո, ինչո՞ւ պետք է այդ տատանումները հանգեցնեին նման հետեւանքների, մենք կարգավորիչների, ապահովիչների համակարգ չունե՞նք, որը կհակազդեր դրան: Սրանք հարցեր են, որ պետք է հասկանանք: Եվ քանի որ այս ոլորտը համակարգող նախարարությունը եւս միավորված նախարարությունների կազմում է գտնվում, ինչը քննադատել ենք, հիմա էլ ասում եմ, որ 5-6 ոլորտների համար մի նախարարը չի կարող ինքնուրույն մշակել քաղաքականություն եւ կրել քաղաքական պատասխանատվություն: Ինչպես տեսաք, այդ ժամանակ համապատասխան փոխնախարարն էր հանդես գալիս: Սա բարդ բան է, ինչպե՞ս կարող ես 5-6 ոլորտի ծրագիր մշակել եւ ինքնուրույն կրել պատասխպանատվությունը, պետք  մտնես այդ գործի մեջ:

ՀՐԱՆՏ ՍԱՐԱՖՅԱՆ

Հարցազրույցն ամբողջությամբ դիտե՛ք տեսանյութում. 

Այս թեմայով Ալեն Սիմոնյանը Փաշինյան Նիկոլին փորձում է համոզել. ԲԱՄԲԱՍԱՆՔ Հայաստան է ժամանել Իրանի պաշտպանության նախարարը «Փաստ». Իրան-Հայաստան դաշինքը կփոխի ստատուս-քվոն Հարավային Կովկասում Տեղի է ունեցել Իրան-Ադրբեջան համատեղ զորավարժությունների բացման արարողությունը Ժողովուրդը պետք է որոշի, թե ով պետք է պաշտպանի իր շահերը. Քաղաքագետ Ժիրայր Ազիզյան