Մնացել են ԱԺ-ում, որ ի՞նչ անեն, ավելի լավ է մանդատները դնեն, դուրս գան. Վահան Բաբայան

Նախորդ շաբաթ Ազգային ժողովում ականատես եղանք փոխադարձ հայհոյանքների պատգամավոր Լեւոն Քոչարյանի եւ ՔՊ-ականների միջեւ: Բանը հասավ նրան, որ Քոչարյան կրտսերը խոսում էր ԱԺ նախագահ Ալեն Սիմոնյանին դուրս շպրտելու, փոխնախագահ Հակոբ Արշակյանն էլ՝ նույն կերպ Քոչարյանի հետ վարվելու մասին: Անդրադառնալով վերոնշյալին՝ պարզել ենք Ռեֆորմիստների կուսակցության նախագահ ՎԱՀԱՆ ԲԱԲԱՅԱՆԻ տեսակետը:

— Այսօր մեր քաղաքացիները կամ ընտրողները իրենք առաջին հերթին պետք է տեսնեն այդ ամենը, հատկապես նրանք, ովքեր այս տարիների ընթացքում պայքարի մեջ են եղել: Մենք ամեն ինչ ենք տեսել, շատ բան գիտենք եւ շատ լավ պատկերացրել ենք` մեզ ինչ է սպասվելու։ Այս ամենից մեր քաղաքացիները պետք է հետեւություններ անեն։ Ի՞նչ է անում Ազգային ժողովը, եկեք ավելի գլոբալ նայենք՝ պատգամավորները գնում են աշխատանքի, ստանում են բարձր աշխատավարձ հարկատուների հաշվին: Այսինքն՝ մեր բոլորի հաշվին կռվում են իրար հետ, քաշքշում են իրար, բրթբրթում են, վիրավորում են, վերջում թողնում, գնում են տուն: Սա է մեր Ազգային ժողովի ընդհանուր պատկերը: Եվ հիմա, թե ով ասաց`«արա», ով ասաց՝ «հլը էս կողմ», այլեւս երկրորդական է:

Սա ո՛չ առաջին անգամն է, ո՛չ վերջին: Այնպես որ, կոնկրետ գնահատական տալ կոնկրետ դեպքին, անիմաստ է: Այս վերջին 4 տարիները ապացուցեցին, որ այս խորհրդարանում քաղաքական բանավեճ գոյություն չունի:

— Բայց, այսպես կոչված, որոշ ընդդիմադիրներ համոզված են, որ սրանով բացահայտում ու դիմակազերծում են Նիկոլ Փաշինյանին: Ի՞նչ կասեք այս մասին:

— Փաշինյանը երբ գալիս է պառլամենտ, ինչ-որ բաներ է խոսում՝ բավականին էմոցիոնալ` շատ անգամ դուրս գալով ընդհանուր էթիկայի նորմերից եւ տրամաբանությունից: Բայց ես չեմ տեսել այնտեղ պատգամավորներ, ովքեր այդ ամենի դեմն առնեն: Անկախ ամեն ինչից, Սահմանադրությամբ առաջնային մանդատով օժտված պաշտոնյաներ են, իրենք բոլոր տիպի հարցերը կարող են տալ վարչապետի աթոռը զբաղեցնողին, նախարարներին, բանավիճել, լուրջ դեբատներ անցկացնել: Զարմանում եմ, որ ամեն անգամ Փաշինյանի ելույթները ավարտվում են իր իսկ մենախոսությամբ։ Կան պատգամավորներ, իհարկե, կարող եմ մատերի վրա հաշվել, ովքեր թե՛ հետագա հարցազրույցներում կամ նույնիսկ ամբիոնից ելույթների ժամանակ ինչ-որ կերպ անդրադառնում են:

— Բայց ասել` անհայրենիք, դավաճան ու հետո քաղաքական բանավեճեր ունենալը որքանո՞վ է ճիշտ:

— Եթե դու գնացել ես այնտեղ, ուրեմն՝ պետք է շարժվես կանոնակարգով, որովհետեւ ՀՀ օրենսդիր իշխանություն ես: Բայց եթե գնացել ես այնտեղ ու չես բանավիճելու, դեբատներ չես անցկացնելու ու չես էլ կարողանում ոչ մի ձեւով հեռացնել իշխանությանը, ուրեմն՝ մնացել ես այնտեղ, որ ի՞նչ անես: Ավելի լավ է մանդատները դնեն, դուրս գան:

ՀՐԱՆՏ ՍԱՐԱՖՅԱՆ

Այս թեմայով «Ժողովուրդ». Հովիկ Աբրահամյանի եղբայրը Հակակոռուպցիոն կոմիտեում ինքնախոստովանական ցուցմունք է տվել ՔՊ-ի կեղտոտ սպիտակեղենը փռել են արեւին Քիչ առաջ ձերբակալել են նախկին վարչապետ Հովիկ Աբրահամյանի եղբորը․ ArmLur.am «Ժողովուրդ». Քննարկվում է Ավետ Կոնջոյանին և Հայկ Սարգսյանին ՔՊ-ից հեռացնելու հարցը Նոյեմբերի 9-ը Հայաստանի փրկօղակն էր․ Հայկ Այվազյան