Վեկտոր չունեցող շարժման նախաձեռնողներից մեկը ո՞ր երկրում ի՞նչ հարց է լուծում. ԶԱՐՄԱՆՔ

Բավական անհասկանալի վարքագիծ է դրսեւորում Բագրատ սրբազանի շարժման առանցքային դեմքերից ՍՈՒՐԵՆ ՊԵՏՐՈՍՅԱՆԸ: Ազգային ժողովի մոտ` Դեմիրճյան-Բաղրամյան փողոցների խաչմերուկում հունիսի 12-ին ոստիկանության կողմից հատուկ միջոցների կիրառումից հետո լուրեր տարածվեցին, թե վերջինս անհետացել է: Այնուհետեւ ձեւակերպվեց, որ նրան ինչ-ինչ մարդիկ առեւանգել են: Իրավապահ մարմինները վստահեցրին, որ համենայնդեպս, նա բերման ենթարկվածների, առավել եւս ձերբակալվածների մեջ չկա: Երկու օր անց Սուրեն Պետրոսյանը հայտարարությամբ հանդես եկավ, թե` որեւէ պայմանավորվածություն իր հետ չի կարող լինել, սկսած պայքարը շարունակվում է, ինքն էլ իր ուղուց չի շեղվելու: Ավելին` վախեցնելու կամ այլ փորձերը չեն կարող իր վրա ազդել: Բայց թե ո՞վ էր վախեցնում կամ ո՞րն է իր ուղին, եւս հայտնի չէ, որովհետեւ Սուրեն Պետրոսյանը Հայաստանում չէ։ Նրա կուսակից Հասմիկ Գաբրիելյանը լրատվամիջոցներից մեկի հետ զրույցում ասել է, որ կվերադառնա այսօր` հունիսի 18-ին։ Իսկ թե ո՞ր երկիր է գնացել ու երբ, նշել է, որ չի կարող ասել։ Հետաքրքիր է չէ՞, վեկտոր չունեցող շարժման նախաձեռնողներից մեկը ո՞ր երկրում ի՞նչ հարց է լուծում, հատկապես, որ հունիսի 12-ի թեժ պահին մի շարք քաղաքացիներ բերման են ենթարկվում, իսկ նա անհետանում է:

Ոչ պակաս ուշագրավ է նաեւ օրերս տեղի ունեցած Ռուսաստանի հայերի միության նախագահ ԱՐԱ ԱԲՐԱՀԱՄՅԱՆԻ հիմնած «Արարատյան ալյանս» մտքի կենտրոն ինստիտուտի կազմակերպած «Արարատյան ալյանսի շուրջը» խորագրով համաժողովը: Միջոցառման ավարտին սպասվում էր հայտարարության ընդունում, որն այդպես էլ մինչեւ այսօր չի ընդունվել: Ա. Աբրահամյանը հանդես եկավ իշխանությանը քննադատող ելույթով, «Իրավունքի» հարցին ի պատասխան` խոսեց, որ ՀԱՊԿ-ից դուրս գալը սխալ է, բայց այդպես էլ պարզ չդարձավ, թե համաժողովն ի՞նչ արդյունքների հանգեց կամ ո՞րն էր գլխավոր ուղերձը: Մի տեսակ արդեն ավանդույթ է դարձել, որ Ա. Աբրահամյանը գալիս է Երեւան, խոսում է ինչ-ինչ ակտիվ նախաձեռնությունների մասին եւ հետո եւս մեկ տարի լռում է: Լավ, Նիկոլ Փաշինյանի մասին դատապարտող հայտարարություն չանելն ու բավարարվելը միայն քննադատող ելույթով դեռ մի կողմ, բայց Ռուսաստանի հայերի միությունը գոնե կարող էր չէ՞ կոշտ արձագանքել, որ ԱԺ ամբիոնից արդեն ասվում է, որ Հայաստանը դուրս է գալու ՀԱՊԿ-ից:

Իսկ Արեւմուտքը շարունակում է երկակի ստանդարտներ բանեցնել: ԵՄ արտաքին գործերի եւ անվտանգության քաղաքականության հարցերով բարձր ներկայացուցիչ ԺՈԶԵՊ ԲՈՐԵԼԸ ո՛չ ավել, ո՛չ պակաս հայտարարել է, թե` «Ագրեսորը չի կարող թելադրել հրադադարի պայմանները»: Ո՛չ, բոլորովին էլ նա նկատի չունի Ադրբեջանին, այլ հերթական հակառուսական ելույթն է ունեցել: Անդրադառնալով վերոնշյալին` Միջազգային եւ անվտանգության հարցերի հայկական ինստիտուտի փորձագետ Գեւորգ Մելիքյանը նշում է. «Տես է, երբ իրենց պետք է, լավ էլ հասկանում են միջազգային հարաբերություններում անարխիկ համակարգի եւ հակամարտային միջավայրի առանձնահատկությունները, եւ որ ագրեսորը չի կարող իր պայմանները թելադրել հրադադարի, խաղաղության, սահմանագծման/զատման կամ այլ հարցերում` լինի Գերմանիան, Ճապոնիան, Ռուսաստանը, Ադրբեջանը կամ Թուրքիան: Մնում է պարզել, թե այդ ի՞նչ փոխվեց, որ հանկարծ Ադրբեջանն ագրեսորի կարգավիճակից վերածվեց «ուժ կիրառելու լեգիտիմ իրավունք» ունեցողի»:

Զարմացած է «Իրավունք»-ը

Այս թեմայով Ահավոր բուլինգ է իրականացվում բոլորիս երեխաների դեմ. Սեմյոն Բաբայան Քոչարյանականների խնդիրը իշխանափոխությունը չէ, այլ մանդատները պահելն է եւ թիվ մեկ ընդդիմություն լինելը. Բաբայան Ինչ ոջիլ է կծել Աննա Հակոբյանին На обижанних воду возят. ԸՆԿԵՐ ՓԱՆՋՈՒՆԻ Այսպես, որ շարունակվի, Աղազարյանի անունը, որպես արժեք, գրանցելու են ՅՈՒՆԵՍԿՕ-ում. ԶԱՐՄԱՆՔ