Այսօր Արցախում իրականացվում է հումանիտար ահաբեկչություն

«Իրավունքը» զրուցել է Առնո Բաբաջանյանի որդու, «Առնո Բաբաջանյան հիշատակի» հիմնադրամի նախագահ ԱՐԱ ԲԱԲԱՋԱՆՅԱՆԻ հետ:

— Պարոն Բաբաջանյան, ի՞նչ մեկնաբանություն կտաք այն ամենին, ինչ այսօր կատարվում է Արցախում:

— Դա մարդկության պատմության մեջ այնպիսի աննախադեպ իրավիճակ է, երբ ինքնիշխան պետությունը ենթարկվում է բռնության: Այդ ամենին ուրիշ անվանում տալ չես կարող: Այսօր Արցախում իրականացվում է հումանիտար ահաբեկչություն: Արցախում ապրող մարդիկ ունեն սննդի, դեղորայքի կարիք: Արցախցիներն իրենց համառությամբ և պայքարով միշտ ապացուցել են աշխարհին, որ իրենք են տերն այն հողի, որտեղ ապրում են: Շատ տխուր է, երբ Հայաստանը հանդիսանալով Արցախի Հանրապետության իրավունքների երաշխավորը, այսօր կարծես թե մի կողմ է քաշվել այդ գործընթացից: Դրա հետ մեկտեղ Հայաստանում էլ են խնդիրներ առաջացել:

— Ըստ Ձեզ՝ այդ ամենն ինչի՞ց սկսվեց:

— Այդ ամենը սկսվեց 2018 թվականից, երբ Հայաստանի Հանրապետությունում տեղի ունեցավ հեղաշրջում: Հատուկ ուժերն իշխանության բերեցին մարդկանց` փլուզելու համար երկիրը և դրանով որոշելու Արցախի և Հայաստանի Հանրապետության հարցերը: Այնուհետև նրանց կողմից հարձակումներ սկսեցին եկեղեցու, կաթողիկոսի, կրթության, պատմության, Արցախում կռված և հաղթանակած հերոսների նկատմամբ: Որոշ մարդկանց ձերբակալեցին, որոշ մարդկանց կյանքը սկսեցին «թունավորել»: Յուրի Խաչատուրովի նման մարդուն, որը մարտական գեներալ էր, ՀԱՊԿ գլխավոր քարտուղար, ձերբակալեցին: Դրանից հետ այդ մարդիկ լկտիություն ունեցան մեղադրելու ՀԱՊԿ-ին, որ ՀԱՊԿ-ը չի օգնում Հայաստանին: Այդպիսի օրինակները Հայաստանի Հանրապետությունում վերջին հինգ տարիների ընթացքում կարելի է ասել շատ են:

— Այսօր Հայաստանում կան արևմտյան ուժեր, որոնք օգտվելով ստեղծված իրավիճակից, փորձում են հակառուսական քարոզչություն տարածել Հայաստանի Հանրապետությունում: Ի՞նչ կասեք այն հակառուսական մթնոլորտի մասին, որ այսօր տիրում է:

— Մեր դաշնակիցը միշտ էլ Ռուսաստանն է եղել: Սակայն այսօր սկսվել է միջազգային մակարդակի մեծ քաղաքական խաղ, որի միջոցով փորձում են քաոս առաջացնել: Այդ բոլորը մի շղթայով միմյանց հետ փոխկապակցված են: Ինչ վերաբերում է մեր ուժին, ապա դժվար պահերին մեր ժողովուրդը կարողանում է համախմբվել և դիմակայել արտաքին ուժերին` եթե նրան չեն խանգարում: Ես գտնում եմ, որ 2020 թվականի պատերազմի ժամանակ պետությունն ինքը խանգարեց մարդկանց հաղթանակի հասնելուն:

— Հայ-ռուսական մշակութային հարաբերությունների վառ ապացույցներից մեկն էլ ՌԴ-ում մեծ շուքով Առնո Բաբաջանյանի 100-ամյակը նշելն էր, որտեղ մասնակցում էին նաև Ռուսաստանի Դաշնության ճանաչված և սիրված աստղերը: Դուք Ձեր նախորդ հարցազրույցի ժամանակ հիշատակեցիք, որ Առնո Բաբաջանյանի 100-ամյակը սառը վերաբերմունքի արժանացավ ՀՀ-ում:

— Ոչ միայն Առնո Բաբաջանյանի 100-ամյակը, այլ նաև մեծ հիասթափություն ապրեցի, երբ մեր հզոր կոմպոզիտորների` Հարությունյանի, Սարյանի, Միրզոյանի, Խուդոյանի 100-ամյակը շատ համեստորեն նշվեց Հայաստանի Հանրապետությունում: Մինչդեռ ՌԴ-ի նշանավոր կոմպոզիտոր Վալերի Գերգևը, հարգելով Հարությունյանի, Սարյանի, Միրզոյանի, Խուդոյանի, Բաբաջանյանի մշակութային վաստակը, Մոսկվայում մեծ համերգ կազմակերպեց: Եվ այդ համերգը կրկին ապացույցն էր հայ- ռուսական մշակութային բարեկամական հարաբերությունների: Առնո Բաբաջանյանի ֆոնդն էլ համերգ կազմակերպեց՝ ի հիշատակ մեծ կոմպոզիտորների, որոնք կյանքում էլ էին շատ մտերիմ ընկերներ: Նրանց միավորում էր ոչ միայն արվեստը, այլ նաև՝ ընկերությունը: Ինչ վերաբերում է Առնո Բաբաջանյանի 100-ամյակին, ապա այն նշվեց ՌԴ-ի լավագույն համերգային դահլիճներում, այդ թվում՝ Մոսկվայի Կրեմլի համերգային դահլիճում, Ղազախստանում, Գերմանիայում, Կիրգիզիայում: Ցավոք, դա չնկատեցին Հայաստանում:

— Առնո Բաբաջանյանի տուն-թանգարանի հարցն ի՞նչ փուլում է գտնվում:

— Այդքան գրվում և ասվում է, բայց Առնո Բաբաջանյանի տուն-թանգարանի հարցի լուծումը դեռ չկա: Դեռևս 2018 թվականին Արա Բաբլոյանի(որն այն ժամանակ ՀՀ կառավարության խոսնակն էր) մտահղացմամբ ցուցադրության համար Մոսկվայից Երևան բերեցինք Առնո Բաբաջանյանի մոմե քանդակը, նկարներ, անձնական իրեր: Հետո եղան խոստումներ, որ Երևանում Առնո Բաբաջանյանի անվան տուն-թանգարան կլինի: Սակայն այդ ցուցադրությունն անցավ միայն ՀՀ-ի կառավարության պատերի ներսում: Արդեն հինգ տարի է անցել և ոչ մի արդյունք: Առնո Բաբաջանյանի նկարները, անձնական իրերը, քանդակը փոշոտվում են պահեստում: Ոչ ոք չի մտածում դրա մասին: Բոլորը միայն խոստանում են: Չգիտեմ, միգուցե հիմա ուրիշ արժեհամակարգ է տիրում կառավարությունում, նախարարությունում: Աստված իրենց դատավոր…

ՆՈՒՆԵ ԶԱՔԱՐՅԱՆ

Այս թեմայով Արա՛, ձենդ մի բարձրացրու. հերիք ա զոհվածների անունները շահարկեք. իրավիճակը լարվեց Եռաբլուրում (Տեսանյութ) Եթե շարունակենք կոպիտ սխալների շարքը, կհայտնվենք ծայրահեղ ծանր վիճակում. Արա Մարջանյան Վարչական դատարանը բավարարել է Հայաստանյայց առաքելական սուրբ եկեղեցու հայցը Հովհաննավանքի գործով Փաշինյանի հետ հանդիպումը վերածվել է կոշտ առճակատման Առողջ բանականությունը հուշում է, որ այս ընտրություններում մի բան այն չէր. Պողոսյան