«Կտրուկ դեմ եմ կոնսերվատորիայի տեղափոխմանը». ԵՐՎԱՆԴ  ԵՐԶՆԿՅԱՆ

«Իրավունքը» զրուցել է ՀՀ ժողովրդական արտիստ, Երևանի պատվավոր քաղաքացի, պրոֆեսոր, կոմպոզիտոր ԵՐՎԱՆԴ  ԵՐԶՆԿՅԱՆԻ  հետ:

- Պարոն Երզնկյան, Դուք նաև դասավանդում եք Երևանի պետական կոնսերվատորիայում: Ինչպիսի՞ն է Ձեր դիրքորոշումը` Երևանի պետական կոնսերվատորիան «Ակադեմիական քաղաք» տեղափոխելու վերաբերյալ:

- Ես կտրականապես դեմ եմ, որովհետև անհնարին է Երևանի պետական կոնսերվատորիան ուրիշ տեղ տեղափոխելը: Կոնսերվատորիան հենց իր տեղում էլ գտնվում է, և կարծում եմ` հարկ չկա ուրիշ տեղ տեղափոխելու:

-Կոնսերվատորիայում կան նաև արժեքավոր երաժշտական գործիքներ, չե՞ք կարծում, որ տեղափոխությունից կարող են վնասվել:

-Դրանք մանրուքներ են: Կարևորը երաժշտական գործիքները չեն: Ամենակարևորը մարդիկ են, որոնք սովորում և դասավանդում են այդ բուհում: Կոնսերվատորիան կառուցված է այն վայրում, որտեղ Օպերայի և բալետի պետական շենքն է, Հայաստանի պետական ֆիլհարմոնիան է, երաժշտական դպրոցներն են: Մեր քաղաքի կենտրոնական հատվածում են գտնվում բոլոր բուհերը: Եվ կենտրոնն ինքնին արդեն բուհական քաղաք է: Ուսուցիչներն աշխատում են և՛ ֆիլհարմոնիայում, և՛ դպրոցներում, և՛ բուհերում: Ես, օրինակ, աշխատում եմ կոնսերվատորիայում: Եթե տեղափոխվի այդ ամենը ուրիշ տեղ, ամեն ինչ կքանդվի: Դասախոսները կդժվարանան գնալ աշխատանքի: Եվ իրենց տեղը կաշխատեն ավելի ցածրամակարդակ դասախոսներ:

-Կոնսերվատորիայի շենքը նաև ունի մշակութային արժեք: Ի՞նչ կասեք այդ մասին:

-Իհարկե, մշակութային արժեք ունեցող շենք է: Նախկինում կոնսերվատորիան ուրիշ վայրում էր գտնվում, հետո բերեցին ներկայիս տեղը, որն ավելի կենտրոնում է, ավելի է համապատասխանում  դասավանդման պրոցեսին և ավելի մեծ է: Կարծում եմ, որ իդեալական շենք է, որը կարելի էր ավելի սիրունացնել, կահավորել…

ՆՈՒՆԵ ԶԱՔԱՐՅԱՆ

Այս թեմայով Չեմ զարմանա, որ քննությունն էլ այդ նույն` զույգով միզող ոստիկաններն իրականացնեն. Երվանդ Վարոսյան «Կոլոմբինա»-ն կունենա ուրույն հանդիսատես, կմասնակցի փառատոների. առաջնախաղ՝  «Երվանդ Ղազանչյան» թատերասրահում Ովքեր են եկեղեցու դեմ «ասպատակող» սադրիչները/Թամելա Արզումանյան (Մաս 1-ին) Ինչ է սպասվում Պարոնյանի անվան թատրոնում նոյեմբերին Փոշմանածները