Եթե Աստված ստեղծել է բնությունը, մարդուն, ապրի՛ ինքը, բայց հիմա ինքը հո թոշակի չի՞ անցել. Հովիկ Աղազարյանը ապացուցում է, թե ինչու է հավատում Նիկոլ Փաշինյանին

«Ես ասել եմ հետեւյալը, որը առաջ, երբ երիտասարդ էի չեմ հավատացել Հիսուսի գոյությանը, հարություն առնելուն` առավելեւս: Բայց հետո, երբ ծանոթացա Նիկոլ Փաշինյանի հետ, ծանոթացա իր մոտոցումներին, իր որակական, բնութագրիչ գծերին, ես մտածեցի, որ այ՛ո, հնարավոր է, որ Հիսուս Քրիստոս անձնավորությունը գոյություն ունեցած լինի: Այսինքն ես ոչ թե ասել եմ, որ հավատացել եմ Հիսուսին, այլ հավատացել եմ, որ հնարավոր է` Հիսուսը Քրիստոսը գոյություն ունեցած լինի, բայց նրա Հարությանը չեմ հավատում, ես դա եմ ասել»,-անդրադառնալով ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանի լայն տարածում գտած վերջին հարցազրույցին, մեկ անգամ եւս պատգամավորն անձամբ հստակեցրեց իր ասելիքը «Իրավունքի» հետ զրույցում:

-Պարոն Աղազարյան, կոնկրետ Նիկոլ Փաշինյանի, ո՞ր որակներին ծանոթանալով եք հավատացել ՀԻսուսի գոյությանը եւս:

-Մարդկանց հետ շփվելու իր ձեւը, գաղափարներին նվիրվածությունը, արդարության կողմնակից լինելը, սկզբունքայնությունը: Բայց, տեսեք, եթե վարչապետը գտնում է, որ Հիսուսը հարություն է առել, ապա ես չեմ հավատում, դրա փոխարեն ընդունում եմ Զատիկի տոնի խորհուրդը: Այն է` բնության, կյանքի զարթոնքի խորհուրդը: Բայց երբեք չեմ հավատացել եւ չեմ հավատալու, որ մահացած մարդը կարող է հարություն առնել: Ինձ ասում են, բայց չէ՞ որ ինքը Աստծո որդին է, ես էլ ասում եմ, որ Աստծո գոյությանն էլ չեմ հավատում: Ես աթեիստ չեմ, նպատակ չունեմ ժխտել Աստծո գոյությունը, ես ասում եմ, որ ընդամենը չեմ հավատում: Ինձ ասում են, բա չե՞ք վախենում Աստծո դատաստանից, ես էլ ասում եմ, որ կվախենայի այն դեպքում, երբ ես ստեի: Ինձ կարելի է վատագույն դեպքում մոլորյալ համարել:

-Պարոն Աղազարյան, լավ Աստծուն չեք հավատում, իսկ ո՞ւմ եք հավատում, օրինակ, երբ վատ դրության մեջ եք հավատում, ո՞ւմ եք հավատում, վստահում, որ ամեն բան լավ կլինի:  

-Ես ինքս ինձ բռնացրել եմ նման դեպքերում, երբ ասել եմ վա՛յ մամա ջան, վա՛յ Տեր  Աստված: Բայց, որ սովորական իրավիճակներում նստեմ մտածեմ ու ասեմ` Աստված ջան էս մի բանը սենց, էն մի բանը նենց արա` ոչ, չի եղել: Հետո, գիտեք մի հատ ուրիշ հարց էլ կա, եթե Աստված ստեղծել է բնությունը, մարդուն, ապրի ինքը, բայց հիմա ինքը հո թոշակի չի՞ անցել, ինչ-որ տեղ ինքը երեւի ինչ-որ բան արարո՞ւմ է չէ, բա այդ դեպքում ինչու ենք մենք մեր ամեն մի քայլը կապում Աստծո հովանավորության հետ: Ձեր հավատացյալների լոգիակով Աստված մեզ ստեղծել է, որպեսզի մենք աշխատենք, արարենք եւ այլն, ուրեմն ինչո՞ւ ենք ամեն անգամ այդ մեծությանը բերում կենցաղային հարցերի մեջ: 

-Լավ, ըստ Ձեզ մարդ արարածը ո՞ւմից է ստեղծվել:

-Ես 17 տարեկանից մտածել եմ, որ եթե ընդամենը տաս րոպե ես հասկանայի այդ ամենը, ես համաձայնեի երիտասարդ տարիքում մահանալ, միայն թե իմանայի: Բայց ես այդ հարցի պատասխանը չունեմ: Ես ուրիշ բան կարող եմ ապացուցել, կարող եմ ապացուցել, որ մենք ընդհանրապես գոյություն չունենք, ուզո՞ւմ եք  ապացուցեմ:

-Ապացուցեք, խնդրեմ:

-Ինձ ժամանակ է պետք, բայց մի հարյուր տարի:

-Պարոն Աղազարյան, լավ, եթե Ձեզ էսպիսի մի հռետորական հարց տան` Դուք հավատում եք Աստծո՞ւն, թե՞ Նիկոլ Փաշինյանին:

-Շատ մեծ տոկոսային բաներով, այ՛ո, հավատում եմ Նիկոլ Փաշինյանը, բայց ես ոչ թե Աստծուն չեմ հավատում, այլ չեմ հավատում նրա գոյությանը: Ես չեմ հավատում Աստծո գոյությանը, սա իմ դիրքորոշումն է: Նիկոլ Փաշինյանը որպես մարդ հասել է նրան, որ իր շնորհիվ, ես հավատացել եմ Հիսուսի գոյությանը: