Օձունում բացվեց հերոս տանկիստ Արման Աղվանյանի հիշատակին նվիրված հուշաղբյուր-հուշահամալիրը

Լոռու մարզի Օձուն գյուղում տեղի ունեցավ 44-օրյա պատերազմում զոհված հերոս տանկիստ ԱՐՄԱՆ ԱՂՎԱՆՅԱՆԻ հիշատակին նվիրված հուշաղբյուր-հուշահամալիրի բացումը: Հուշահամալիրը բացվեց Արմանի ծննդյան օրը՝ նրա հայրիկի ջանքերով, գեղատեսիլ Օձունի բնության մեջ, որտեղ Արմանը հաճախ նշում էր իր ծննդյան օրը։ Բացմանը հաջորդեց հերոսի հիշատակին նվիրված ճաշկերույթ։

Արման Սանասարի Աղվանյանը ծնվել է 2000 թ.-ին: 2018 թ. անվճար հիմունքներով ընդունվել է Ռուս-հայկական (Սլավոնական) համալսարանի իրավագիտության ֆակուլտետը։ Զինվորական ծառայությունն իրականացրել է Արցախում՝ որպես տանկի հրամանատար եւ սերժանտ։

Պատերազմի առաջին օրվանից Արմանը որպես 872 տանկի հրամանատար ռազմական ակտիվ գործողությունների կիզակետում էր։ Վերջին անգամ զանգահարել է հոկտեմբերի 8-ին, բայց ծնողներին չի ասել, որ ինքը կռվի դաշտում է։ Արմանը զոհվեց հոկտեմբերի 9-ին, Ջրականի մատույցներում՝ հավերժ մնալով 20 տարեկան։

Զինվորական ծառայության ժամանակ Արմանին շնորհվել է «Լավագույն զինվոր-մարզիկ» շքանշանը։ Հայրենիքի սահմանների պաշտպանության գործում ցուցաբերած անձնական խիզախության եւ նվիրումի, կյանքին սպառնացող վտանգի պայմաններում ծառայողական պարտքը անձնազոհաբար կատարելու համար Արմանը Արցախի Հանրապետության նախագահի կողմից հետմահու պարգեւատրվել է «Մարտական ծառայություն» Արիության մեդալով։

Արմանին ճանաչողներն ասում են, որ նրա մեջ եռում էր կյանքը... Նա փայլում էր բոլոր առումներով, բոլոր ասպարեզներում... Մասնակցում էր բազմաթիվ օլիմպիադաների ու մարզական մրցաշարերի։ Ե՛վ կրթության, ե՛ւ սպորտի բնագավառներում նա չեմպիոն էր: Նրա նվաճումների մասին են վկայում բազմաթիվ մեդալները, պատվոգրերն ու հավաստագրերը:

Արմանը նաեւ տիրապետում էր մի քանի լեզուների, ուներ խոր գիտելիքներ, գրում էր երգեր ու երաժշտություն: Բայց ամենից առաջ նա իսկական արիացու փայլուն օրինակ էր՝ մեծահոգի ու բարի, ուժեղ, օժտված կամային բարձր հատկանիշներով, վեհ արժեհամակարգերի կրող ու լուսավոր մարդ:

7-րդ դասարանում Արմանի կողմից գրված խոսքերը շատ դիպուկ բնութագրում են հենց իրեն. «Մարդու ներքին լույսի աղբյուրը հավատն է, բարությունն ու ազնվությունը: Մարդ որքան բարի լինի, հավատավոր, այնքան աշխարհի լույսը կշատանա»:

Այս թեմայով Առավոտյան պատգամավորները կուղղեկցեն Սամվել Վարդանյանին Երեւանի քննչական տեղափոխող մեքենային Սկսում ենք Նիկոլին հանձնման, եթե կուզեք՝ զիջման կամ փոխզիջման գործընթաց. Արման Մխիթարյան Շիրինյան-Սաֆարյան «միջնորդական առաքելությունն» ավարտվել է ֆիասկոյով Ո՞վ կամ ովքե՞ր են կանգնած այս ամբողջի թիկունքում. Ռոբերտ Մարգարյան Շատ մարդ է ներքաշված այս խայտառակության մեջ. Սաղաթելյանը փակագծեր է բացում