Ի՞նչ օրակարգով է ուղեկցվել Ամենայն Հայոց Կաթողիկոսի այցը Կալկաթա

Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսը հայրապետական այցով օգոստոսի 17-ին ժամանել է Հնդկաստանի Հանրապետություն` Կալկաթայի Հայոց Մարդասիրական ճեմարան: Այս մասին տեղեկացնում են Մայր Աթոռի տեղեկատվական համակարգից:

Ճեմարանի տեսչությունն ու սաներն Ամենայն Հայոց Հայրապետի այցին մեծ խանդավառությամբ եւ հուզմունքով էին սպասում: Այս առիթով տեղի է ունեցել հանդիսություն եւընդունելություն, որը սկսվել է Տերունական աղոթքով, ապա հնչեցվել են Հնդկաստանի, Հայաստանի եւ ճեմարանի օրհներգերը:

Բարիգալստյան խոսքով հանդես է եկել  հնդկահայոց հոգեւոր հովիվ եւ Հայոց Մարդասիրական ճեմարանի կառավարիչ Հոգեշնորհ Տ. ՄՈՎՍԵՍ աբեղա ՍԱՐԳՍՅԱՆԸ` ճեմարանի նկատմամբ դրսեւորվող մշտական ուշադրության եւ հոգատար վերաբերմունքի համար տեսչության, դասախոսական կազմի եւ աշակերտության անունից խորին երախտագիտություն հայտնելով Հայոց Հայրապետին: Հայր Մովսեսը տեղեկություններ է փոխանցել նաեւ 1821 թ. հիմնադրված եւ Սփյուռքում ցայսօր գործող ամենահին կրթօջախի գործունեության եւ աշակերտների ունեցած հաջողությունների մասին (ճեմարանում այժմ ուսանում են 55 սաներ Հայաստանից, Իրաքից եւ Իրանից):

Ցերեկույթի ընթացքում ճեմարանի սաները հանդես են եկել ազգային երգ ու պարով եւ գեղեցիկ բեմականացմամբ: Իսկ հանդիսության ավարտին իր օրհնության խոսքը ներկաներին է ուղղել Ամենայն Հայոց Կաթողիկոսը: Վեհափառ Հայրապետը մասնավոր իր գնահատանքն է հայտնել հնդկահայոց հոգեւոր հովիվ եւ ճեմարանի կառավարիչ Հայր Մովսեսին, Կալկաթայի Ս. Նազարեթ եկեղեցու վարչության անդամներին, ճեմարանի տեսչական կազմին, ուսուցիչներին եւ սաներին՝ գոհունակությամբ ընդգծելով հայրապետական նախորդ այցելությունից հետո ճեմարանի կյանքում արձանագրված առաջընթացն ու ձեռքբերումները:

Նորին Սրբությունը մեծապես կարեւորել է պատմական կրթական հաստատության առաքելությունը մատաղ սերնդի հայեցի դաստիարակության գործում` հորդորելով նույն նախանձախնդրությամբ եւ ջանադրությամբ շարունակել կերտել փառքը Հայոց Մարդասիրական ճեմարանի եւ ազգին պարգեւել հայրենասեր ու եկեղեցանվեր հայորդիներ:

Օգոստոսի 18-ին Գարեգին Բ Հայրապետը հանդիպումներ ու առանձնազրույցներ է ունեցել Ճեմարանի տեսչության եւ ուսուցչական կազմի հետ: Նորին Սրբության մասնավոր թելադրությունն էր` ամեն ջանք գործադրել ճեմարանի կրթական մակարդակն ամենաբարձր աստիճանին հասցնելու համար:

Նույն օրը Նորին Սրբությունը մտերմիկ ու երկար հանդիպում է ունեցել աշակերտների հետ` զրուցելով նրանց առօրյայից, կրթական գործընթացից եւ հուզող խնդիրներից: Վեհափառը պատանիներին հորդորեց առավել ջանասիրությամբ գիտելիքներ ամբարել եւ հավատարիմ մնալ իրենց հայրենի ավանդներին՝ ազգի արժանավոր զավակներ դառնալու համար:

Ամենայն Հայոց Կաթողիկոսը, ուղեկցությամբ ճեմարանի կառավարիչ Հայր Սուրբի եւ կառավարչի օգնական Բարեշնորհ ՎԱՐԱԶԴԱՏ սարկավագ ՔՈՉԱՐՅԱՆԻ, շրջեց ու մանրամասն ծանոթացավ ճեմարանի եւ սաների կեցության պայմաններին` անհրաժեշտ ցուցումներ տալով դրանք առավել բարվոք դարձնելու համար:

Այցի օրերին Նորին Սրբությանը ուղեկցում էին Կալկաթայի Ս. Նազարեթ եկեղեցու վարչության ավագ անդամներ տիար ՍՈՒՆԻԼ ՍՈԲԹԻՆ եւ տիկին ՍՅՈՒԶԱՆ ՌՈՒԲԵՆԸ:

Այս թեմայով Նաիրի Սարգսյանը` Երեւանի ավագանու ընտրություններին իր եւ եղբոր մասնակցության լուրերի մասին Սերժ Սարգսյանի գործով ընթանում է դատական նիստ Հայաստանի դիրքերը եղել ու լինելու են շատ թույլ. Սուրեն Սարգսյան Ինչու Լեւոն Քոչարյանն առանձնապես աչքի չի ընկնում վերջին շրջանում․ ԲԱՄԲԱՍԱՆՔ Կարո՞ղ է ամերիկան արեց… ԶԱՐՄԱՆՔ