«Ինձ համար ավելի կարեւոր էր լինել Նադյայի կողքին, քան` զբաղվել երգով». Կրտսեր Նադեժդա Սարգսյան

Շատերը կմտաբերեն փոքրիկ Նադեժդա Սարգսյանին, որ տարիներ առաջ, տարբեր միջազգային մրցույթներից անպայման վերադառնում էր մրցանակներով, այդ թվում նաեւ «Դո-Ռե-Մի» վոկալ խմբի հետ միասին: Հաճախ էր ՀՀ վաստակավոր արտիստ Նադեժդա Սարգսյանը շեշտում, որ Նադեժդա Սարգսյան անուն-ազգանունը հավերժ է հնչելու հայկական երգարվեստում ու հումորով նշում` Նադեժդա Սարգսյանից պրծում չկա... Հենց դա նկատի ունենալով` տիկին Նադյան քրոջ դստերը կնքեց իր արդեն բրենդ դարձած անուն-ազգանունով, ու հենց ինքն էլ կնքամայր դարձավ փոքրիկ Նադյայի երգարվեստ մուտք գործելուն: Սակայն կրտսեր Նադեժդա Սարգսյանը որքան էլ փորձեց շեղել իր կյանքի անիվը, իրեն այլ մասնագիտության մեջ դրսեւորելով, միեւնույնն է, մորաքրոջ կնքած ուղին նրան կրկին վերադարձրեց երգարվեստ: Թերեւս, դրա լավագույն ապացույցը վերջերս կրտսեր Նադեժդա Սարգսյանի արդեն հասուն տարիքում առաջին «Քեզ հետ» երգի տեսահոլովակի շնորհանդեսն է, որը նրան վերադարձրեց երգարվեստ:

«Իրավունքի» հետ զրույցում Նադեժդան ասաց, որ երգն իրականում նվիրված է մորաքրոջը. «Երգը հենց Նադեժդա Սարգսյանին է նվիրված, պարզապես մտածված ոչ մի տեղ չենք նշում, քանի որ նա մեզ հետ է... Ի դեպ, «Քեզ հետ» երգի անունը կրում է հենց իմ առաջին ձայնասկավառակը, ճիշտ է, արդեն ունեինք երգ, որը գրել էր ամերիկացի երաժիշտ Թիան Թայլորը, ուղղակի ողջ թիմը քննարկումից հետո եկավ այն եզրակացության, որ դա չի կարող լինել ձայնասկավառակի առաջին երգ: Այդպես, հենց Նադեժդա Սարգսյանի խոհանոցում, որտեղ նա միշտ սիրում էր նստել, հյուրասիրել, մենք նստած տասը րոպեում, գրեցինք «Քեզ հետ» երգի բառերը»:

Ըստ Նադյայի` երգն ու տեսահոլովակն անակնկալ է եղել հենց Նադեժդա Սարգսյանի դստեր` երգչուհի Էմմիի համար. «Երգը պատրաստ լինելուց հետո որոշեցինք` անակնկալ-նվեր կլինի Էմմիին, ու արագ սկսեցինք տեսահոլովակի նկարահանումները, որը տեւեց 2 օր: Իրականում ուզում էինք, որ Էմմիի ծննդյան օրվան նվեր անեինք, բայց հետո հասկացանք` ավելի լավ կլինի տեսահոլովակի կարճ տարբերակը թողարկենք նրա ծննդյան օրը: Ամեն ինչ այդպես էլ եղավ, ու տեսահոլովակն արդեն թողարկվեց ապրիլի վերջին»:

Մեր այն հետաքրքրական հարցին, թե Էմման ինչպես արձագանքեց անակնկալ-տեսահոլովակին, Նադեժդան ծիծաղելով անկեղծացավ. «Էմման ասաց` չնայած երգը շատ եմ հավանել, բայց ինքնագլուխ բաներ եք անում, տեսահոլովակը կարող էր ավելի լավը լիներ, եթե ինձ ասեիք: Բայց հավատացե՛ք չեմ ուզում, որ ինչ-որ մի տեղ ինձ համար զանգեն, ասեն... Չեմ ուզում օգտագործել Էմմիի համբավը, որովհետեւ նա արդեն կայացած երգչուհի է: Անգամ տեսահոլովակում ոչ մի տեղ նշված չէ, որ նվիրված է Նադեժդա Սարգսյանի հիշատակին, որովհետեւ չենք ուզում օգտագործել նրա անունը, որ տպավորություն չստեղծվի, թե ուրիշների շողքի տակ փորձում ենք առաջ գնալ: Մենք, իմ թիմով, ամեն տեղ կզանգենք, կգնանք ու կդիմենք ինքներս»:

Կրտսեր Նադեժդան, երգարվեստում իր վերցրած երկարատեւ դադարը բացատրեց այսպես. «Ճիշտ է, ես Նադեժդա Սարգսյանի մեծ դպրոցն եմ անցել, 4,5 տարեկանից մինչեւ 16 տարեկանը մասնակցել եմ միջազգային մրցույթների ու մրցանակներով վերադարձել: Բայց այս դադարի ընթացքում ավելի շատ բան հասկացա, ավելի շատ բան սովորեցի, ուսում ստացա, արդեն դասավանդում եմ «Դո, Ռե, Մի» վոկալ ստուդիայում: Ըստ իս, այս տարիների դադարն ինձ ավելի էր հարկավոր: Այդ ընթացքում բոլորս զբաղված էինք մորաքրոջս առողջությամբ, դա էլ մի քիչ պատճառ հանդիսացավ իմ դադարի համար` ինձ համար ավելի կարեւոր էր լինել Նադյայի կողքին քան` զբաղվել երգով: Նրա մահվանից հետո ուժերս հավաքեցի եւ որոշեցի վերադառնալ երգարվեստ, եւ այդ անուն-ազգանունը բարձր պատվով հավերժ պահել հայկական երգարվեստում, հակառակ դեպքում` ավելի լավ կլինի անուն-ազգանունս փոխեմ»:

Այնուամենայնիվ, Նադյան արդեն աշխատում է երկրորդ տեսահոլովակի վրա, իսկ սեպտեմբերին նախատեսել է թողարկել նոր ալբոմ-ձայնասկավառակ, որից հետո նախատեսել է մեծ համերգային շրջագայություն սկսել:

Զրուցեց ԼԻԼԻԹ ԵՂԻԱԶԱՐՅԱՆԸ

Այս թեմայով Վենսը բանակցություններ է վարում Իրանի հետ պատերազմի ավարտի շուրջ. Axios TRIPP-ը անձամբ Թրամփի բիզնես պրոյեկտը չէ. Սիմոնյան Հրատապ. Նրա ազատությունը սարերի հետեւում չէ. Հայտնի փաստաբանի հայտարարությունը Երբ ցանկանում էի խոսել երեխայիս հետ գրական հայերենով, ստիպված էի լսել՝ «Մի՜ հաչա այդ շան լեզվով»․ Անի Օհանյան Թրամփը պատրաստվում է երկամյա դիմակայության դեմոկրատների կողմից վերահսկվող Կոնգրեսի հետ