Երբ ԵՄ բարձրաստիճան պաշտոնյաների այցերը դիտարկվում են իրենց զոհ ներկայացնելու համատեքստում

«Օրեր առաջ Հայաստան այցելեց Եվրոպական միության արտաքին քաղաքականության եւ անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի գլխավորած պատվիրակությունը, ում հետ հանդիպումներում ի դեմս մի շարք հարցերի անդրադարձ կատարվեց Հայաստան-Եվրամիություն հարաբերություններին, որն այցի առանցքային քննարկման թեման էր», - երեկ ԱԺ հայտարարությունների ժամին նշեց ԱԺ ՀՀԿ խմբակցության պատգամավոր ԿԱՐԻՆԵ ԱՃԵՄՅԱՆՆ ու մասնավորապես ընդգծեց. «Որքան էլ մեր ընդդիմախոսները փորձում էին ցույց տալ, թե Եվրասիական տնտեսական միությանը Հայաստանի անդամակցությունից հետո  Հայաստան-ԵՄ հարաբերությունները վտանգված են, պետք է փաստել, որ ԵՄ-ի հետ հարաբերությունների զարգացումն ու խորացումը շարունակվում են մնալ երկրի արտաքին քաղաքականության օրակարգում: ԵՏՄ անդամակցությունից հետո 2015 թվականի մայիսին Ռիգայում կայացած Արեւելյան գործընկերության 4-րդ գագաթնաժողովը կարեւոր շրջափուլ էր ՀՀ-ԵՄ հարաբերություններում, որտեղ ֆիքսվեցին կողմերի մոտեցումները Հայաստան-ԵՄ հարաբերությունները նոր իրողությունների պայմաններում կառուցելու գործում: Իսկ արդեն 2015-ի վերջին հաջողությամբ մեկնարկեց Հայաստան-Եվրամիություն նոր համապարփակ իրավական փաստաթղթի շուրջ բանակցությունները, որն այս պահին հաջողությամբ ընթանում է»: Վերոնշվածից ելնելով` ըստ պատգավորի, Ֆ. Մոգերինիի հետ հանդիպման ժամանակ հայաստանյան քաղաքական ուժերի համար օրակարգային պետք է լիներ  Եվրամիության հետ հարաբերությունների զարգացման եւ խորացման հարցը. «Սակայն, Եվրոպական միության արտաքին քաղաքականության եւ անվտանգության հարցերով բարձր ներկայացուցչի հանդիպումները քաղաքական ուժերի հետ ցույց տվեց, որ ԵՄ պաշտոնյան խորհրդարանական գրեթե բոլոր խմբակցություններին հետաքրքրում էր բացառապես նեղ կուսակցական, անձնական խնդիրների համատեքստում եւ տարօրինակ է, որ բացի Հայաստանի Հանրապետական կուսակցությունից, որեւէ քաղաքական ուժ լուրջ քննարկման առարկա չէր դարձրել մեր երկրի համար այդքան մեծ կարեւորություն ներկայացնող ՀՀ-ԵՄ բանակցությունների գործընթացը: ԵՄ-ի հետ հարաբերությունների կարեւորությունը, այսպես կոչված, «արեւմտամետ» կողմնորոշումների ու մարդու իրավունքների, ժողովրդավարության մասին օդում հնչեցված հայտարարությունները չեն»: Ապա հավելեց. «Փաստացի քաղաքական օրակարգում դրված է փաստաթուղթ, որը բանակցությունների հաջող ընթացքի դեպքում որակապես նոր մակարդակ կտեղափոխի Հայաաստան-Եվրամիություն հարաբերությունները, սակայն, չգիտես ինչու, հայաստանյան քաղաքական ուժերը ԵՄ բարձրաստիճան պաշտոնյաների այցերը դիտարկում են սեփական ամբիցիաները ի ցույց դնելու կամ իրենց զոհ ներկայացնելու համատեքստում»: Այնուամենայնիվ, Կ. Աճեմյանը համոզված է. «Հայաստան-Եվրամիություն նոր համապարփակ իրավական փաստաթղթի շուրջ բանակցությունները սահմանված ժամկետում բարեհաջող կավարտվեն, ինչը կնպաստի Եվրամիության հետ տարբեր ձեւաչափերով համագործակցության խորացմանն ու ընդլայնմանը»:

ՀՐԱՆՏ ՍԱՐԱՖՅԱՆ

Այս թեմայով Ադրբեջանական բենզինի թաքնված ականները. Մեկնաբանում են տնտեսագետները Ադրբեջանից Վրաստանի տարածքով Հայաստան է ժամանել նավթամթերքով բեռնված գնացքը Դուք զբաղված եք մարդկանց մոլորեցնելով, ոչ թե մտահոգ եք երկրի հզորացմամբ և խաղաղության հաստատմամբ Եվրոպացիները Խաչատուրյանին լարել, ուղարկել էին Աշխաբադ TRIPP-ի կյանքի կոչվելը որեւէ կերպ չի կարող սպառնալ Իրանի անվտանգությանը. Իրանահայ խմբագիրը մանրամասներ է ներկայացնում