Տեղի կունենա ՌԴ եւ ՀՀ վաստակավոր արտիստ Մարիամ Ղամբարյանի 90-ամյակին նվիրված միջոցառումներ

Մարտի 25-31-ը Հայաստանում տեղի կունենան Հայաստանի եւ Ռուսաստանի վաստակավոր արտիստ, դաշնակահար ՄԱՐԻԱ ՂԱՄԲԱՐՅԱՆԻ ծննդյան 90-ամյակին նվիրված մի շարք հոբելյանական միջոցառումներ, որոնք կընթանան ՀՀ մշակույթի նախարարության աջակցությամբ:

Անվանի դաշնակահար Մարիա Ղամբարյանը հայրենական կատարողական դպրոցի փայլուն ներկայացուցիչներից է, ում արվեստն աչքի է ընկնում դաշնամուրային ոսկերչական ձեռագրով եւ հարուստ զգացմունքայնությամբ: Այն բանաստեղծական է եւ միեւնույն ժամանակ` վառ արտիստիկ: Իր կատարողական ու մանկավարժական գործունեությամբ` երաժիշտը ժառանգել եւ ստեղծագործաբար զարգացնում է իր մեծանուն ուսուցիչների` Կ․ Ն․ Իգումնովի եւ Հ․ Գ․ Նեյհաուզի ավանդույթները, արժանիորեն շարունակում նրանց ազնիվ առաքելությունը: Պատահական չէ, որ Կ. Իգումնովը բարձր է գնահատել Մ. Ղամբարյանի բացառիկ օժտվածությունը: 
      Ծնվել է 1925 թվականին, Երեւանում: Երաժշտական կրթությունը ստացել է Երեւանի «Պրոֆդպրոցում», ապա` Մոսկվայի կոնսերվատորիային կից Կենտրոնական երաժշտական դպրոցում (Ա․ Շացկեսի դասարան): 1948 թվականին ավարտել է Մոսկվայի կոնսերվատորիան (պրոֆ․ Կ․ Ն․ Իգումնովի դասարան), 1951-ին` ասպիրանտուրան (ղեկավարներ` Հ․ Նեյհաուզ, Լ․ Օբորին): Ուսումն ավարտելուց հետո, Ղամբարյանը մրցութային կարգով ընտրվել է որպես Լենինգրադի պետական ֆիլհարմոնիայի մենակատար: Այդ ժամանակվանից էլ սկսվել եւ մինչ օրս շարունակվում է նրա համերգային գործունեությունը` ելույթներ Ռուսաստանում, համամիութենական ռադիոյի` 70-ից ավելի ֆոնդային ձայնագրություններ եւ այլն:   
      Ղամբարյանին ծափահարել են նաեւ մի քանի տասնյակ երկրներում` Միացյալ Նահանգներում, Ֆրանսիայում, Գերմանիայում, Շվեյցարիայում, Ավստրիայում, Իսպանիայում, Չեխիայում, Ճապոնիայում, Կորեայում, Իսրայելում, Հունաստանում եւ այլուր: Նվագացանկը բազմազան է` դասական ու ռոմանտիկ հեղինակներից մինչեւ ժամանակակից եւ ազգային երաժշտություն, մասնավորապես` Կոմիտաս: 
      Համերգային գործունեությանը զուգընթաց, Մ․ Ղամբարյանն ակտիվորեն զբաղվել է նաեւ մանկավարժական գործունեությամբ: Սկզբում` Լենինգրադի կոնսերվատորիայում, ապա 1960 թվականից մինչ օրս` Մոսկվայի Գնեսինների անվան երաժշտության ռուսաստանյան ակադեմիայում, նա դասավանդում է մասնագիտական դաշնամուրի ամբիոնում: 2003-ից հանդիսանում է նաեւ Մոսկվայի մշակույթի եւ արվեստի պետական համալսարանի մասնագիտական դաշնամուրի ամբիոնի հիմնադիրը: 1998 թվականից Պրահայի Կառլովի համալսարանի պատվավոր պրոֆեսոր է: 

ԼԻԼԻԹ ԵՂԻԱԶԱՐՅԱՆ

Այս թեմայով Միայն հզոր Մարդը, հզոր Մայրը կարող էր մինուճար բալին ֆիզիկապես կորցնել ու չխելագարվել. Հայտնի փաստաբանի հայտարարությունը Սյունիքի Կուրիս գյուղի Սբ Սարգիս եկեղեցին կտեղափոխվի Ազգի կործանման հաշվին ֆինանս ենք վաստակում. Անի Հովսեփյան Ինչպես ռուսականը փոխարինել հայկական նմուշի վարորդական վկայականով Վանգայի չբացահայտված կյանքը. Զարհուրելի մանրամասներ