«ՄՈԴԵՐՆ ԹՈՔԻՆԳԸ» ԵՐԵՎԱՆՈՒՄ ՆՈՍՏԱԼԳԻԿ ԵՐԵԿՈ Է ԽՈՍՏԱՆՈՒՄ

Մարտի 27-ին համաշխարհային համերգային շրջագայության շրջանակներում Երեւանում կենդանի համերգով հանդես կգա աշխարհահռչակ «Մոդերն Թոքինգ» խմբի առաջատար վոկալիստ ԹՈՄԱՍ ԱՆԴԵՐՍԸ` Մոդերն Թոքինգ բենդի հետ միասին: Աշխարհահռչակ վոկալիստը տեսաուղերձում իր հայաստանյան երկրպագուներին խոստանում է հրաշալի երեկո. «Ուրախ եմ, որ մարտի 27-ին գալիս եմ Երեւան եւ ոգեւորված եմ, որ ձեզ եմ ներկայացնելու «Մոդերն Թոքինգի» բազմաթիվ հիթեր: Այնպես որ, սպասվում է մեծ ու ուրախ երեկո, հուսով եմ` կհանդիպենք Մարզահամերգային համալիրում»:

Ի դեպ, համաշխարհային խումբը համերգի ընթացքում կկատարի 80-ականների անմոռանալի, սիրված հիթեր` You're My Heart, You're My Soul, Cheri Cheri Lady, Brother Louie, No Face, No Name, No Number եւ այլն, որոնք թեպետ տարիների վաղեմություն ունեն, բայց չեն կորցրել իրենց արդիականությունը նաեւ այսօր: Այդ մասին փաստում են Թոմաս Անդերսի եւ «Մոդերն Թոքինգ» բենդի  համաշխարհային շրջագայությունները, որում ներառվել է նաեւ Երեւանը, որը կհյուրընկալի համաշխարհային մեծ հռչակ վայելող խմբին: Խումբը Հայաստան կժամանի տասը հոգով, որոնց կմիանան նաեւ տեղի պրոֆեսիոնալները: Կազմակերպիչները խոստանում են` Մարզահամերգային համալիրում մեծ իրադարձություն է լինելու ոչ միայն երգերի, այլեւ շոուի առումով` սպասվում են լուսային էֆեկտներ եւ հնչողության բարձր որակ:  Թոմաս Անդերսը ելույթ կունենա կենդանի նվագակցությամբ: Ըստ կազմակերպիչների` համերգը չունի տարիքային սահմանափակում. «Մոդերն Թոքինգի երգերը շատ սիրված են Հայաստանում, որը վկայում է հայ հանդիսատեսի մեծ հետաքրքրվածությունը եւ ոգեւորությունը համերգի նկատմամբ: Մեծ շոու ծրագիր է սպասվում, որը հետաքրքիր կլինի նաեւ երիտասարդներին: Մենք նկատել ենք, որ շատ երիտասարդներ տոմսեր են գնում նաեւ իրենց ծնողների, տատիկ-պապիկների համար` մեկնաբանելով, որ յուրահատուկ նոստալգիա է սպասվում նրանց համար»,- նշվում է ամերիկյան Էլ Էյ Քոնսրթ գրուփի եւ հայկական Յունիթի Փրոդաքշնի կողմից:

Կազմակերպիչները համոզված են` Երեւանում նման հայտնիություն ունեցող համաշխարհային հյուրերի համերգներն իրենց տեսակի մեջ խթան են զբոսաշրջության զարգացման համար. «Տվյալ համերգի նկատմամբ մեծ հետաքրքրություն կա հարեւան երկրների կողմից: Այդ օրերին մայրաքաղաք կայցելեն մեծ թվով զբոսաշրջիկներ»,- նշում է հայաստանյան համերգի համակազմակերպիչ, Unity Production-ի պրոդյուսեր Անդրե Սիմոնյանը եւ հավելում. «Մոտ 3000 հյուրեր են լինելու արտերկրից` Վրաստանից, Ռուսաստանից, Իրանից եւ եվրոպական երկրներից: Իհարկե, այդ զբոսաշրջիկները միայն համերգին չեն մասնակցի, կծանոթանան հայերի եւ հայկական մշակույթի հետ, ինչպես նաեւ գումար կծախսեն, որը կմնա Հայաստանում»:

Հավելենք, որ «Մոդերն Թոքինգ» բենդի երեւանյան համերգին կհաջորդեն համերգներ Գերմանիայում, Պորտուգալիայում, Չեխիայում եւ այլուր:

ԼԻԼԻԹ ԵՂԻԱԶԱՐՅԱՆ

Այս թեմայով ՀՐԱՏԱՊ. Մարդու իրավունքը ժամկետանց փաստաթուղթ չէ, երբ մարդը դադարում է հավատալ արդարադատությանը, վտանգվում է ոչ միայն նրա իրավունքը՝ այլ իրավական պետության հիմքը ENIGMA-ի լեգենդար նախագծի ձայնը՝ Էնդրյու Դոնալդսը համերգ կտա Երևանում Ալեն Սիմոնյանի դուստրը մասնակցում է հոր հարսանիքին Հոգեբանական բարեկեցության ծրագիր ուսուցիչների համար. Լուսանկար Գլենդելում հայերի հանցավոր խումբ է բացահայտվել. 5 անձ ձերբակալվել է անձնական տվյալների գողության և խարդախության կասկածանքով