Անկախության հռչակագրի նկատմամբ սերը պետք է ավելի մեծ լինի, քան Նիկոլից վախերը. Շարմազանով

«Իրավունք»-ը զրուցել է ՀՀԿ Գործադիր մարմնի անդամ ԷԴՈՒԱՐԴ ՇԱՐՄԱԶԱՆՈՎԻ հետ:

— Նիկոլ Փաշինյանը սպառնում է, որ քաղաքական մեծամասնությանը պատրաստ է առաջնորդել ընդդիմության նկատմամբ հնարավոր հանրային ճնշումը, եթե վերջինս փորձի խոչընդոտել նոր Սահմանադրության ընդունման գործընթացին։ Այս մասին ի՞նչ կասեք։

— Դա նոր Սահմանադրություն չէ: Դա նշանակում է հանել Սահմանադրության նախաբանից Անկախության հռչակագիրը՝ մեր 35-ամյա սրբությունը, որի համար պայքարել են մեր ժողովուրդը, մեր հերոսները, որի համար հազարավոր նահատակներ ենք տվել, ու Եռաբլուր է առաջացել. այս ամենն ի չիք դարձնել է։ Դա Ալիեւի, Ադրբեջանի պահանջով իրականացված կամ սպասվող հանրաքվե է։ Եվ իր միակ նպատակը հետեւյալն է, որպեսզի ընդդիմությունը շանտաժի, վախի, ռեպրեսիաների տակ հետքայլ կատարի։

Բայց ինչպես տեսնում ենք՝ նույն Գագիկ Ծառուկյանի, Արմեն Աշոտյանի եւ այլ քաղաքական բանտարկյալների օրինակով, մարդիկ իրենց պայքարից չեն հրաժարվում, որովհետեւ դա պայքար չէ պաշտոնի համար։ Եթե Նիկոլի պայքարն աթոռը պահելու համար է, այս մարդկանց պայքարը անկախ հայրենիք ունենալու համար է, ավանդական պետությունում ապրելու եւ արժեքներ պաշտպանելու համար է։

Ինքը փորձելու է այդ 6-7 ձայնը, որն իրեն չի հերիքում, կորզել, իսկ եթե չստացվի ու Աստված տա՝ չստացվի, արտահերթ ընտրությունների գնալու ճանապարհին էլ ընդդիմությանը գլխատելու եւ բոլորին բռնելու է: Հավասար պայմաններ եթե լինեին, Փաշինյանը կարող է անցողիկ շեմն էլ չհաղթահարեր։

— Պարոն Շարմազանով, մի քիչ տարօրինակ չէ՞, երբ իշխանությունը փողոց փակելով է սպառնում ընդդիմությանը:

— Ինչքան Վեհափառ Հայրապետի դեմ փողոց փակեցին, ինչքան Էջմիածնում կարողացան հասնել հաջողության, այնքան էլ հիմա կհասնեն։ Հնարավոր է ճնշման ենթարկելով՝ իրենց ձայն տան, բայց ես չեմ հավատում, որ մեր հայ ժողովուրդը կգա ու ալիեւյան Սահմանադրության համար մեծ միտինգներ կանի։ Կարող է գնան իրենց ձայն տան թաքուն, մեկը՝ վախից, մեկը՝ շահից ելնելով, բայց դուրս գալ Անկախության հռչակագրի դեմ, չեմ հավատում:

Սա ո՛չ Հանրապետականի կռիվն է, ո՛չ Բարգավաճի, ո՛չ այն մեկի, ո՛չ էլ մյուսի. Անկախության հռչակագրի համար է: Ալիեւն ասում է՝ Անկախության հռչակագիրը պիտի հանեք։ Եկել, ասում են՝ Անկախության հռչակագիրը հակապետական է, այսինքն՝ հակապետական են ոչ թե Ալիեւը, ոչ թե Ադրբեջանը, ոչ թե այստեղ կապիտուլյացիա ստորագրածները, այլ մարդիկ, ովքեր իրենց կյանքով ապացուցել են, որն է ամենակարեւորը մեզ համար:

ՔՊ-ն եթե կանգնում, ասում է՝ «մենք Ադրբեջանից պահանջ չունենք», ի՞նչ եք սպասում սրանցից։ Մամուլում կարդացի, որ ՔՊ փոխնախագահն ասել է՝ «Քաղաքացիական պայմանագիրը» Ադրբեջանից պահանջ չունի: Եվ դա այն դեպքում, երբ 240 քառ.մ Հայաստանի Հանրապետության տարածքից օկուպացված է։ Մեկը մտնում է մի «բախչա», 5 սմ ավել մի բան է վերցնում, մի բախչագողություն է անում՝ դատական գործ են հարուցում, պահանջ են ներկայացնում դատարան, իսկ 240 քառ.մ Հայաստանի տարածքը թուրքը գրավել է, սրանք ասում են՝ մենք պահանջ չունենք։

Բաքվում Հայաստանն անվանում են «Արեւմտյան Ադրբեջան», իրենք ասում են՝ «պահանջ չունենք», գերիներ ունենք, իրենք էլի ասում են՝ «պահանջ չունենք»։ Ես էլ ասում եմ՝ եթե մենք հանդուրժեցինք, կոտրվեցինք, համակերպվեցինք, պիտի գնանք Զեյնաբի երգի տակ իրենք չափ տան, մենք էլ ապրենք։ Ես չեմ ուզում այդպես ապրել։ Անկախության հռչակագրի նկատմամբ սերը պետք է ավելի մեծ լինի, քան Նիկոլից վախերը։

ՆԱՆԱ ՍԱՐԳՍՅԱՆ

Այս թեմայով Եթե նման հայտարարություն ՀՀԿ իշխանությունն աներ, մեզ անարգանքի սյունին կգամեին ԵՄ «ժողովրդավարության ջատագովները»․ Շարմազանով ՀՀ ինքնիշխան տարածքի 240 քառ.կմ եք զիջել. Է. Շարմազանով Միշտ չէ ,որ ժամանակը վեր է հանում ողջ ճշմարտությունը. Շարմազանով Բա եթե եղբայրական են, ինչո՞ւ էիք հակառուսական հիստերիա գեներացնում. Շարմազանովը՝ Միրզոյանին Ալեքսանդրապոլի պայմանագրի կետերը, որը ՀՀ փաստացի վիլայեթացման ամրագրումն էր. Էդուարդ Շարմազանով