«Փաստ». Հայաստանում գործարար համայնքը հայտնվել է չափազանց խոցելի վիճակում

«Փաստ» թերթը գրում է. «Վերջին աղմկահարույց իրադարձությունները ևս մեկ անգամ ցույց են տալիս, որ Հայաստանում գործարար համայնքը հայտնվել է չափազանց խոցելի վիճակում։ Օրերս քրեական հետապնդում է հարուցվել «88» սուպերմարկետների ցանցի հիմնադիր, խոշոր գործարար Նարեկ Նալբանդյանի և «Սպայկա» ընկերության ղեկավար Դավիթ Ղազարյանի նկատմամբ։ Շրջանառվող տեղեկությունների համաձայն, երկրի այս խոշոր տնտեսվարողների և գործատուների դեմ իրավական ընթացակարգեր են նախաձեռնվել ընդամենը մեկ անձի ցուցմունքի հիման վրա։ Երբ նման մակարդակի ընկերությունների ճակատագիրը դրվում է կասկածի տակ նմանատիպ հիմքերով, դա ոչ թե լոկալ իրավական վեճ է, այլ լուրջ ազդանշան ողջ բիզնես միջավայրին։

Այս պրակտիկայի հիմքում հաճախ ընկած է կարճաժամկետ քաղաքական կամ պոպուլիստական շահը։ Հանրային հաճոյախոսության, մի քանի ավել «լայք» կորզելու կամ «արտոնյալների դեմ պայքարի» իմիտացիա ստեղծելու համար պետական ապարատն ու տեղեկատվական հոսքերն ուղղորդվում են բիզնեսի դեմ։ Գործարարին նախքան դատարանի վերջնական վճիռը հանրության աչքում «օրինազանց» ներկայացնելն ու նրա դեմ վարչական գործիքակազմ կիրառելը դարձել է սովորական մեթոդ։ Սակայն այսրոպեական քաղաքական դիվիդենտները վճարվում են երկրի ռազմավարական ապագայի հաշվին։

Տնտեսական տեսանկյունից նման վարքագիծն ունի կործանարար հետևանքներ։ Պետության կողմից իրականացվող անկանխատեսելի քայլերի հետևանքով աստիճանաբար քանդվում է վստահությունը սեփական պետության և նրա իրավական համակարգի նկատմամբ։ Խոշոր բիզնես միջավայրը դառնում է տագնապային ու անկայուն։ Ո՛չ տեղական, ո՛չ էլ առավել ևս օտարերկրյա ներդրողը պատրաստ չէ կապիտալ տեղադրել մի միջավայրում, որտեղ տնտեսական հաջողությունը կամ սեփականության անվտանգությունը կախված են քաղաքական քմահաճույքներից կամ անհիմն ցուցմունքներից։

Եթե այս միտումը շարունակվի, Հայաստանում ուղղակի մարդ չի մնա, որը ցանկություն կամ համարձակություն կունենա խոշոր, երկարաժամկետ ու ռազմավարական նախագծեր իրականացնել։ Տեղական կապիտալը պարզապես կհոսի դեպի ավելի կանխատեսելի ու պաշտպանված իրավազորություններ, իսկ երկիրը կկորցնի աշխատատեղեր, հարկային մուտքեր և տնտեսական աճի հնարավորություն։ Երբ պետությունը դադարում է լինել բիզնեսի երաշխավորն ու դառնում է նրա հիմնական սպառնալիքը, տուժում է ոչ թե առանձին վերցրած գործարարը, այլ ողջ հասարակությունն ու պետությունը։

Առավել մանրամասն թերթի այսօրվա համարում

Այս թեմայով Վիշապը քար առ քար քանդում է ավերակները. 4 նշան, որ նոյեմբերի 2-ը կօգնի նրանց հաղթահարել այն, ինչը թվում էր չափազանց մեծ Չմտածված հայտարարություններով հնարավոր է միայն սրել իրավիճակը.Տնտեսագիտության դոկտորը ԵՏՄ-ից դուրս գալու մասին Երևանում հարս ու սկեսուր հայտնվել են դատարանում Երևանում 3 անչափահաս տղաների ծայրահեղ ծանր վիճակում երեկ տեղափոխել են հիվանդանոց Սեդրակիչը «քսի՞ֆ է» ուղարկել