Առաջիկա նախագահական ընտրությունները պարզապես ղեկավարի ընտրություն չեն. Սաֆարյան

Մոտենում է Հայաստանի նկարիչների միության 21-րդ համագումարը՝ մի իրադարձություն, որը վճռորոշ նշանակություն է ունենալու մեր Միության ապագայի համար։ Առաջիկա նախագահական ընտրությունները պարզապես ղեկավարի ընտրություն չեն․ դրանք ընտրություն են մեր Միության վաղվա օրվա, նրա շարունակականության, կայունության և զարգացման ճանապարհի համար։

Այսօր առավել քան երբևէ կարևոր են մեզանից յուրաքանչյուրի մասնակցությունն ու պատասխանատվությունը։ Հայաստանի նկարիչների միությունը մեր ընդհանուր տունն է, մեր ստեղծագործական ժառանգության պահապանը, արվեստագետներին միավորող և համախմբող վայրը։ Մեր ընդհանուր պարտքն է պահպանել ու զորացնել այն՝ ապահովելով նրա կայուն ապագան։

Ուստի դիմում եմ ձեզանից յուրաքանչյուրին՝ անտարբեր չմնալու և սեփական ձայնի կարևորությունը գիտակցելու կոչով։

ՀՆՄ սիրելի՛ անդամներ, նոյեմբերի 21-ին՝ ժամը 09։30-ին, եկե՛ք Կինոյի տուն՝ Եկե՛ք միասին մասնակցելու այս կարևոր իրադարձությանը, տեր կանգնելու մեր իրավունքին և մեր քվեին, արտահայտելու մեր կամքն ու պատասխանատվությունը Հայաստանի նկարիչների միության ապագայի հանդեպ։

Մեզանից յուրաքանչյուրի ձայնն ունի նշանակություն։ Մեր ակտիվ ու միասնական մասնակցությամբ է ձևավորվելու այն ճանապարհը, որով առաջ է շարժվելու Միությունը։

Թո՛ղ մեր ընտրությունը լինի գիտակցված, մեր մասնակցությունը՝ ակտիվ, իսկ նպատակը՝ միասնական․ ունենալ ամուր, անկախ, կենսունակ և զարգացող Հայաստանի նկարիչների միություն։

Ձեր ձայնը կարևոր է։

Ձեր մասնակցությունը կարևոր է։

Միության ապագան մեր բոլորի ձեռքերում է։

ՀՆՄ նախագահ Սուրեն Սաֆարյան»