Քաղաքական պատասխանատվությունից հնարավոր չէ ազատվել պարզապես շեֆ փոխելով․ Դանիելյան

Արդյոք Աննա Գրիգորյանն այն ժամանակ, երբ Նիկոլ Փաշինյանի հետ ուս ուսի տված քայլում էր փողոցներում, իր իրական ղեկավար չէ՞ր համարում այսօրվա քաղաքական առաջնորդ Քոչարյանին, որի թիմում հետագայում հայտնվեց՝ քաղաքական ճամբարափոխության արդյունքում։ Թե՞ այն ժամանակ Քոչարյանի քաղաքական անցյալն ու գործունեությունը նրա համար անընդունելի էին, իսկ այսօր հանկարծ դարձել են ընդունելի։

 

Զարմանալիորեն նման են իրար նախկին նիկոլականները, որոնք, այս կամ այն պաշտոնը չստանալով կամ Փաշինյանի թիմից դուրս մնալով, հանկարծ սկսում են ամեն ինչում մեղադրել Սերժ Սարգսյանին՝ փորձելով մոռացության մատնել սեփական քաղաքական անցյալն ու պատասխանատվությունը։

 

Նույն օրինակն Աննա Գրիգորյանի կողքին կանգնած Զարուհի Փոստանջյանն է և այլք, որոնք ժամանակին Սերժ Սարգսյանի դեմ պայքարում էին Նիկոլ Փաշինյանի հետ ուս ուսի տված, իսկ այսօր փորձում են ներկայանալ բոլորովին այլ քաղաքական դիրքերից։

 

Ի դեպ, խորհուրդ կտամ նրանց կարդալ իրենց ներկայիս քաղաքական առաջնորդ Քոչարյանի գիրքը։ Հետաքրքիր կլինի տեսնել, թե ինչպիսի գոհունակությամբ էր նա խոսում և որքան բարձր էր գնահատում 2018 թվականի հեղափոխության մասնակիցներին, այդ թվում՝ «լեթարգիական քնից արթնացած» քաղաքացիներին, որոնցից ոմանք, ըստ էության, հետագայում հայտնվեցին հենց իր քաղաքական ճամբարում՝ արդեն ոչ թե քողարկված, այլ բացահայտ։

 

Որքան ուզում եք, փորձեք մեզ մեղադրել ձեր իսկ քաղաքական սխալների համար, բայց մի կարևոր հանգամանք երբեք չեք կարող փոխել։ Դուք պայքարել եք Արցախի հերոս, Արցախն ազատագրած և պատերազմներում հաղթանակներ տարած Սերժ Սարգսյանի դեմ՝ կանգնելով այն Նիկոլ Փաշինյանի կողքին, որի իշխանության տարիներին Արցախը հայաթափվեց, հազարավոր հայորդիներ զոհվեցին, իսկ մեր ժողովրդի առջև ծառացան գոյաբանական մարտահրավերներ։

 

Եվ այսօր նույն մարդիկ փորձում են Սերժ Սարգսյանին մեղադրել սեփական ձախողումների, քաղաքական անհաջողությունների և չիրականացված երազանքների համար՝ կարծես 2018 թվականին ոչինչ չի եղել, կարծես իրենք չեն մասնակցել այդ գործընթացներին, կարծես չեն պայքարել Նիկոլ Փաշինյանին իշխանության բերելու համար։

 

Քաղաքական ճամբարափոխությունը քաղաքական կենսագրության ջնջում չէ։ Դուք կարող եք այսօր լինել քոչարյանական, վաղը՝ մեկ այլ քաղաքական ուժի ներկայացուցիչ, բայց չեք կարող ջնջել այն փաստը, որ 2018 թվականին Նիկոլ Փաշինյանի հետ միասին պայքարել եք Սերժ Սարգսյանի դեմ և ձեր մասնակցությունն եք ունեցել նրան իշխանության բերելու գործընթացում։ Իսկ այսօր, երբ արդեն տեսանելի են այդ իշխանափոխության ողբերգական հետևանքները, սեփական քաղաքական պատասխանատվությունն ընդունելու փոխարեն կրկին փորձում եք մեղավոր կարգել Սերժ Սարգսյանին։

 

Ո՛չ, այդպես չի լինելու։ Դուք չեք կարող մի օր Նիկոլ Փաշինյանի հետ հեղափոխություն անել, իսկ հաջորդ օրը ներկայանալ որպես նրա իշխանության դեմ պայքարի սկզբունքային առաջամարտիկներ՝ մոռանալով ձեր իսկ անցյալը։ Պատմությունը հիշելու է ոչ միայն նրանց, ովքեր իշխանության ղեկին էին, այլև նրանց, ովքեր ճանապարհ հարթեցին այդ իշխանության համար։

 

Եվ վերջում՝ մի պարզ ճշմարտություն։ Սերժ Սարգսյանի դեմ ձեր և ձեր ներկայիս քաղաքական ղեկավարի չստացված պայքարը կարող եք այսօր ներկայացնել ինչպես ցանկանում եք, բայց Նիկոլ Փաշինյանի իշխանության գալուն ձեր ունեցած մասնակցությունը չեք կարող ջնջել։ Իսկ քաղաքական պատասխանատվությունից հնարավոր չէ ազատվել պարզապես շեֆ փոխելով», - գրել է ՀՀԿ ԳՄ անդամ, ԵԿ ղեկավար ՀԵՆՐԻԽ ԴԱՆԻԵԼՅԱՆԸ։