Էդգար Կարապետյանը՝ փարիզյան պոդիումում․ հաջորդ կանգառը՝ Միլան

Նորաձեւության միջազգային հարթակներում հաջողության հասնելու համար անհրաժեշտ են ոչ միայն արտաքին տվյալներ, այլեւ պրոֆեսիոնալիզմ, փորձ եւ նպատակներին հասնելու վճռականություն։ «Միստր Արմենիա 2018», «Mister Model Worldwide 2018» եւ «Mister Glam World Ambassador 2019» տիտղոսակիր ԷԴԳԱՐ ԿԱՐԱՊԵՏՅԱՆԸ հերթական քայլն է կատարել միջազգային նորաձեւության աշխարհում՝ մասնակցելով Փարիզի նորաձեւության օրերին (Paris Fashion Days)։

«Իրավունք»-ի հետ զրույցում նա պատմել է փարիզյան ցուցադրությանը մասնակցելու, եվրոպական նորաձեւության առանձնահատկությունների, միջազգային հարթակներում իր հետագա ծրագրերի, ինչպես նաեւ Հայաստանում մոդելային ոլորտի զարգացմանը խոչընդոտող խնդիրների մասին։

— Էդգար, ինչպե՞ս ստացվեց, որ հրավիրվեցիք մասնակցելու Paris Fashion Days-ին։

— Առաջարկը ստացել եմ Gold For Star մոդելային գործակալության համահիմնադիր Մարիա Ղարիբյանից։ Մասնակցել եմ քասթինգին, եւ վեց մասնակիցներից ես եմ ընտրվել Paris Fashion Days-ին մասնակցելու համար։

— Ցուցադրությունից ի՞նչ կարող եք պատմել․ ո՞ր դիզայների կամ բրենդի ցուցադրությանն եք մասնակցել։

— Ցուցադրել եմ հայտնի դիզայներ Զորիանա Սեմենյուկի ՝ «Մեյզն Զարինա» հավաքածուն։

— Ի՞նչ է նշանակում մոդելի համար մասնակցել ցուցադրության նման միջազգային հարթակում։

— Յուրաքանչյուր մոդելի համար մեծ պատիվ է մասնակցել միջազգային ցուցադրություններին, աշխատել պրոֆեսիոնալ թիմերի եւ դիզայներների հետ։

— Ո՞րն է ամենամեծ տարբերությունը հայկական եւ եվրոպական նորաձեւության ոլորտների միջեւ, որը նկատել եք։

— Համեմատել չի կարելի հայկականը եվրոպական նորաձեւության հետ։ Մոդելը գոնե մեկ անգամ պետք է մասնակցի կամ ներկա լինի եվրոպական նորաձեւության ցուցադրությանը կամ նախապատրաստական աշխատանքներին, որպեսզի տեսնի, թե ինչ է նշանակում ցուցադրություն, մոդելի ընտրություն, կազմակերպչական աշխատանքներ։

Եվրոպայում հաշվի են առնում մոդելի փորձը, պրոֆեսիոնալիզմը։ Եվրոպայում չեն առաջնորդվում անձնական ամբիցիաներով, իրենց համար առաջնահերթությունը աշխատանքն է ու որակը։

— Ո՞ր հայ դիզայների կամ հայկական բրենդի հետ կցանկանայիք աշխատել Փարիզում։

— Չկա հայ դիզայներ կամ բրենդ, ում հետ ցանկանայի աշխատել Փարիզում։

— Ի՞նչ դժվարությունների եք հանդիպել որպես հայ մոդել միջազգային ասպարեզ դուրս գալու ճանապարհին։

— Ոչ մի տեսակի խնդիր ու խոչընդոտ չի եղել, ինձ համար ավելի հեշտ է եղել միջազգային հարթակներում լինել։

— Այս մասնակցությունից հետո ի՞նչ նոր նպատակներ եք դրել ձեր առջեւ։

— Նպատակ ունեմ մասնակցելու Փարիզի եւ Միլանի նորաձեւության շաբաթների ցուցադրություններին, քանի որ Փարիզում եղած ժամանակ մասնակցել եմ օնլայն քասթինգների ու դրական արձագանքներ եմ ստացել։

— Ի՞նչն է Ձեզ համար ավելի կարեւոր՝ միջազգային ճանաչումը, թե՞ Հայաստանում Ձեր ոլորտի զարգացումը։

— Միանշանակ միջազգային իմ ճանաչումը, իսկ Հայաստանում չի զարգանում մոդելային ոլորտը։

— Ի՞նչ կարծրատիպի եք ամենաշատը հանդիպել որպես հայ մոդել։

— Հայաստանում չի ընդունվում այն փաստը, որ տղան կարող է մոդել լինել, պոդյում բարձրանալ կամ մասնակցել գեղեցկության մրցույթների, դրա համար ինչպես նշեցի, Հայաստանում չի զարգանում այս ոլորտը։

— Երբեւէ եղե՞լ է ֆոտոշարք կամ ցուցադրություն, որտեղ Ձեզ խնդրել են անել մի բան, որը Ձեր սահմաններից դուրս էր։

— Ո՛չ, չի եղել նման առաջարկ, որովհետեւ ամեն ինչ արվում է ու առաջարկվում է թույլատրելի չափի սահմաններում։

— Ի դեպ, տարիներ առաջ շատ ավելի հաճախ էին հայ մոդելները մասնակցում միջազգային մրցույթների, փառատոնների՝ լիներ այն գեղեցկության, թե նորաձեւության։ Ինչո՞ւ է գնալով ավելի քչանում նման մեծ նախագծերին հայերի մասնակցությունը, թե՞ այն պարզապես մնում է ստվերում ու հաճախ չի լուսաբանվում։

— Ճիշտ եք նկատել, գնալով այս ոլորտն անկում է ապրում Հայաստանում, ցանկացած պարագայում շահի խնդիր է։ Նախ միջազգային հարթակների հետ համագործակցող գործակալություններ չկան, լինելու դեպքում՝ չգիտեմ ինչ պայմաններ կառաջարկվի մոդելին, շատ ներքին քննարկվող հարցեր կան։

Գեղեցկության միջազգային մրցույթներում Հայաստանն ընդհանրապես մասնակիցներ չի ունենում, որովհետեւ բոլոր ծախսերը մասնակիցն է հոգում՝ մասնակցության վճար, հագուստների ձեռքբերում, ճանապարհածախս եւ այլն։ Ոչինչ չի արվում ոչ մոդելային եւ ոչ էլ գեղեցկության ասպարեզում հնարավորություններն ընդլայնելու համար։

ՀՐԱՆՏ ՍԱՐԱՖՅԱՆ

Այս թեմայով Նպատակն արդարացնում է միջոցը․ ԸՆԿԵՐ ՓԱՆՋՈՒՆԻ Պատմության  փոխարեն  կդասավանդեն ապագա՞․ ԶԱՐՄԱՆՔ Սխալված միլիարդատերը ճիշտ է փնտրում 17 000 000 դրամի պահանջ. «ՔՊ»-ն որոշել է թալանել և սնանկացնել մեր ընտանիքը. էդգար Ղազարյան Բա ՔՊ-ն ո՞նց ա պատգամավորի առաջ դուռ փակում․ Էդգար Ղազարյան