Մասիսի՞, թե՞ Ավինյանի գլխին են սեւ ամպեր կուտակվել

Համացանցում եւ մամուլում լայնորեն շրջանառվող տեղեկությունների համաձայն, Երեւանի քաղաքապետարանը հրահանգ է ստացել չհրապարակել այնպիսի տեսանյութեր, որտեղ կերեւա Արարատը։ Իսկ նման տեսարանների առկայության դեպքում տարբեր բաժիններ հրահանգ են ստացել հեռացնել տեսանյութը եւ նոր տարբերակով հրապարակել, որտեղ չի երեւա սուրբ լեռը։

Ի հեճուկս վերոնշյալի՝ սոցցանցերում մեկնարկել է ֆլեշմոբ։ Հարյուրավոր օգտատեր իրենց էջերում տեղադրում են Արարատի նկարը, հրապարակում երգեր ու բանաստեղծություններ Մասիսի մասին։ Եվ ահա այս ալիքը ինչ-որ կերպ զսպելու համար՝ Երեւանի քաղաքապետի մամուլի խոսնակ, ՔՊ-ական նախկին պատգամավոր Ջուլիետա Ազարյանը հանդես է եկել հայտարարությամբ։

«Երեւանի քաղաքապետարանը որեւէ հրահանգ չի՛ ստացել՝ տեսանյութերում Արարատ լեռը «չցուցադրելու» վերաբերյալ։ Քաղաքային իշխանությունը զբաղված է քաղաքային խնդիրներով՝ փողոցներով, բակերով, տրանսպորտով ու քաղաքի իրական խնդիրներով, ոչ թե տեսախցիկի կադրում հորիզոնը «խմբագրելով»։ Երբ փաստ չկա, մնում է երեւակայությանը «զոռ տալ», - ընդգծել է Ազարյանը։

Իհարկե, հազարավոր խոսքերի փոխարեն՝ ավելի խոսուն կլիներ, որ քաղաքապետի խոսնակն իր գրառման տեքստի հետ հրապարակեր Սիս ու Մասիսի նկարը, բայց՝ հերթական անգամ Ազարյանը հայտարարությունը ներկայացրել է կից իր լուսանկարով։ Տեսնելով, որ սա էլ չանցավ եւ օգտատերերն օր օրի ավելի են ողողում սոցցանցերն Արարատի նկարներով, երգերով ու բանաստեղծություններով, քաղաքապետի խոսնակը հաջորդիվ մտել է ուղիղ եթեր՝ Ավինյան Տիգրանի հետ։

«Ճիշտն ասած, եկա էս բարձր կետից Արարատ լեռան ֆոնին լուսանկար ունենամ, էն էլ մարդիկ ասում են՝ քաղաքապետն ամպերին հանձնարարել ա էսօր փակեն Արարատ լեռը։ Էս մասին ինչ-որ բան ունե՞ք ասելու», - հետաքրքրվել է Ազարյանը շեֆից։

Ավինյանն էլ շարունակելով բեմադրությունը՝ նույնքան պատրաստված արձագանքել է․ «Բան ու գործ չունե՞ք անելու․․․ Շատ շուտով ամպերը կհեռանան ու բոլորս նորից կարող ենք սելֆիներ անել Արարատի հետ»։ Այսքանով Արարատի թեմայով ֆլեշմոբը Ջուլիետա Ազարյանը համարել է փակված, բայց բացել է ավելի խորքային մի հարց։

Ի՞նչ նկատի ունի Ավինյանն՝ ասելով, որ «շատ շուտով ամպերը կհեռանան», չէ՞ որ այդ ամպերը մեր ժողովրդի գլխին իր քաղաքական թիմն է կուտակել։ Ի վերջո, իր հարազատ իշխանություններն են հեռացրել Արարատի պատկերը Հայաստանից մուտքի եւ ելքի ժամանակ անձնագրերում դրվող կնիքի վրայից, նաեւ նոր անձնագրի նմուշում Խոր Վիրապը այնպիսի դիրքից են պատկերել, որ չերեւա Արարատը։ Հենց Նիկոլ Փաշինյանն է պարբերաբար հանդես եկել Արարատն ուրանալու ու մոռանալու դիրքերից։ Եվ հիմա ստացվում է, որ Ավինյանը դուրս է գալիս սեփական թիմի դե՞մ, թե՞ Արարատի գլխին կուտակված ամպերն այդպես էլ չի ցրվի, իսկ քաղաքապետարանն էլ կշարունակի խուսանավել Մասիսի պատկերներից։

ՀՐԱՆՏ ՍԱՐԱՖՅԱՆ

Այս թեմայով Այս տարի Էրեբունի-Երևանը տոնում ենք երկու օր․ Տիգրան Ավինյան Սա է միլիարդավոր գումարների մսխման և ուժային համակարգը ներքաղաքական հարցերում կենտրոնացնելու դառը հետևանքները. Տիգրան Աբրահամյան «Ժողովուրդ». Ընդհարում Տիգրան Խաչատրյանի, Ժաննա Անդրեասյանի և Սարգիս Հայոցյանի միջև Անձամբ եք պատասխան տալու․ ԲԱՄԲԱՍԱՆՔ Քաղաքապետարանն էլ ինքն ա՞